Ёросъёсысь иворъёс: тол чорыган, «Кыл куазь» но фермаысь танк

Удмурт Дунне
By Удмурт Дунне Декабрь 30, 2016 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Глазов

Тол чорыган

Кылем арня пумын Куреггуртысь ӵыпет вылын тол чорыганъя вожвылъяськон ортчиз.

Ӵошатсконэ ёросысь но Глазовысь 15 команда люкаськиз. Ужрадэз ортчытӥсьёс бадӟым программа дасяллям. Нырысь ик ваньзы 2 но ӝыны час чорыгазы. Отӥяз быгатонлыксэс эскеризы капитанъёс. Чорыг лым, ӝук сиемзы но чай юэмзы бере командаос возьматӥзы спортэн эшъяськемзэс: футболэн шудӥзы, куасэн бызьылӥзы но гозы кысказы. Огъя вожвылъяськонын вормисе потӥзы «Глазов-молоко», «Луч» но «Коммунар» огазеяськонъёсысь командаос. Котькинлэсь бадӟым чорыг кутӥз Наталия Белькович («Коммунар» СПК), котькинлэсь трос чорыг люкаллям Сергей Иванов ( «Луч» СПК) но Ольга Будина («Глазовлес»). Соосты ӟечкылазы Тол бабай но Лымы ныл.

Балезино

Тӧр шорын — самовар

Ёросысь шаертодонъя музейын усьтӥськиз «Самовар котырын» адӟытон.

Ӝӧклэн шулдырез — самовар, шуиллям вашкалаос. Та чилясь кӧто «машиналы» сӥзем выставка туж тунсыко но шуныт пӧрмиз. Урамын тол кузёяське, нош музейын самовар быректэ. Адӟытонэз дасясьёс музее пырасьёслы чайлэн историез сярысь мадё, XIX даурысь самоваръёсты возьмато но пӧртэм пумо ческыт чаен куно каро.  Ёросысь нылпиос выль адӟытонэз дунъязы, веръязы ини. Та выставка быдэс толшорез ужалоз на.

Кез

Кыл куазь сярысь тодӥзы

«Кез ёросын удмурт кылэз утён» ёрос конференция ортчиз.

Ужрадэз дасязы ёрос администрация но «Удмурт Кенеш» огазеяськонлэн Кезысь ёзэз. Конференция кык люкетлэсь вал. Нырысетӥяз тросэз докладъёс чузъяськизы анай кылын. Кылсярысь, люкаськем калык туж сак кылзӥз ёросысь шаерчилэсь А. Ивановлэсь «Мессершмидтлэн удмурт пытьыез» верамзэ. Та немец тодосчи 18-тӥ даурын, Сибирьысь Санкт-Петербурге мыныкуз, уйпал удмуртъёслэн улэм-вылэмзы, дӥськутсы, осконзы, кылзы сярысь аслаз дневниказ гожъям.  Ужрадлэн кыкетӥ люкетаз Историяя, кылъя но литературая Удмурт институтлэн «Кыл куазь» проектэныз тодматскон ортчиз. Озьы ик егит удмурт кылбурчиен Анастасия Шумиловаен пумиськон вал.

Эгра

Кылмес дышетӥзы

Ёросысь мылкыд карисьёс 2 толэзь пала удмурт кылэз дышетӥзы.

Удмурт кылъя курсъёс ортчизы ёрос библиотекаын, дышетӥз Ольга Степанова. Курсъёсы 23 мурт гожтӥськиз ке, ваньзэ пумозяз ортчытыны чидаз 16-ез гинэ. Соос пӧлын вал ёрос администрациын ужасьёс, арлыдоос, кин ке быдэс семьяеныз ветлӥз. Ӝыныез удмурт кылэз чик валасьтэмъёс вал. Удмурт кылъя урокъёс ортчизы арняяз 2 пол 2-3 часэн. Ваньзы экзамен но зачётъёс сётӥзы. Сертификат люкылон нуналэ  малы дышемзэс возьматӥзы: кылбур веразы, книга-газет лыдӟизы, удмурт кылын выжыкыл пуктӥзы, кырӟазы. Сертификат сётъяз ёрос йырлэн воштӥсез Александр Шамшурин. Пусйыны кулэ, ӟучомем егит мурт паймытӥз анай кылыныз чылкыт вераськеменыз. Тодмо луиз, удмурт кылэз со ас понназ дышетэм.

Вотка

Фермаын сылэ танк

Кылем арня куспын Кварса гуртын пудо вордон комплекс усьтӥськиз.

«Вотка агрокомбинатэ» пырись ферма быдэсак выльдӥськиз. 200 йырлы чаклам скал гид чильк-вальк луиз. Татын липетэз но выжез воштэмын, туала куронъёслы тупась молокопровод кыскемын, пудоез люктаны выль тӥрлык пуктэмын,  табере йӧлэз кынтон танксы гинэ но вань ини. Вотка ёрослэн йырыз А. Русинов верамъя, районын гурт удыслы бадӟым саклык висъяське. Туэ гинэ  ёросын  8 фермаос тупатъямын яке воксё выль гидъёс ӝутэмын.

Алнаш

«Палэпын» кыз ӝуатӥзы ини

«Палэп» хозяйство котькинлэсь вазь Выль арез пумитаз.

Одӥг нунал ӵоже ёросын скаллы быдэ 14 килограмм йӧл люкаське. Кылем арысь та вакытэн ӵошатыса, со 1,4 килограммлы тросгес луэ. Котькинлы адӟем карымон тыршо «Палэп» хозяйствоын. Одӥг скаллэсь нуналаз 23 килограмм йӧл кыско. Ар ӵоже 8 сюрс килограммлэсь ятыр люкаськиз ини. Со планэн чакламлэсь тросгес. «Палэп» бӧрсьы вамышъяло «Оркино» но «Молодая гвардия» хозяйствоос, отын котькуд скаллэсь нуналаз 18 но 16 килограмм йӧл кыско.

Ижевск

Тылпу ӧз кысэ — ӟечкылазы

Тылпулэсь утиськонъя 1 номеро частьын ужасьёс та арня кутсконын ӟеч уж лэсьтӥзы.

Тылпу кысон машинаен соос вуылӥзы Ижысь 75 номеро школа-интернатэ. Таяз учыре машинаысь потӥзы Лымы ныл но Тол бабай. Инвалид нылпиосты Выль арен ӟечкылазы, кузьымъёс люкылӥзы. Озьы ик та нуналэ пиналъёслы капчи мылкыд кузьмазы кырӟанъя но эктонъя «Айкай» кун театрысь артистъёс.

Сюмси

Выжыкыл дунне

27-тӥ декабре тодмо луизы лымы мунёос лэсьтонъя «Тол выжыкыл» вожвылъяськонлэн вормисьёсыз.

Ёрос центрысь шор площаде лымы мунёос кылдӥзы. Таяз учыре ваньмызлы лэсьтоно вал «Рукавичка» выжыкылысь кыӵе ке героез. 1-тӥ инты сётэмын ёрос больницаын ужасьёслэн «Пӧзьы» мунёзылы. 2-тӥ но 3-тӥ интые потӥзы ёросысь егитъёслэн парламентысьтызы но дышетонъя управлениысь коллективъёс «Ӟичы» но «Атас» мунёосын.

Дасязы
Валентина Емельянова, Галина Семёнова

 

Удмурт Дунне
By Удмурт Дунне Декабрь 30, 2016 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<