Изэз пася ненег турын

Удмурт Дунне
By Удмурт Дунне 17 декабря, 2016 14:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Василий Владимиров.

Пичи Пурга черкогуртысь «ИП Владимиров» автосервислэн кивалтӥсез кӧня ке пол пусъемын «Удмурт Республикаысь устоез предприниматель» нимын, шаерысьтымы  «Репутация и доверие» конкурсын куинь пол вормисе потамын, пӧртэм дипломъёсын пусъемын. Но Василий Владимиров дан поттыны уг яраты. Огшоры шуэ: милям ужмы сыӵе ук, суткаяз 24 час ӧвӧл, кӧнялы ке тросгес…

 Василэн вожъяськонэз

Василий Михайлович вордӥськиз Пичи Пурга ёросысь Курчум-Норья гуртын 1956-тӥ арын Ильин нуналэ. Быдӟым нуналэ дуннеез адӟем пияшлэн нимыз но Илья луыны кулэ вал, дыр, но анай-атаез сое Василий шуо. Угось туж синмаськылӥзы гуртысьтызы Василий Михайлович дышетӥсьлы. Егит семьялэн тужгес шудо вакытэз кутскиз. Но шӧдтэк шорысь ваньмыз йырчукин берытске. Пичи Василы куать толэзь дыръя улонысь кошке анаез, 3 аресаз — атаез. Огназ кылем пияшез басьто нылпи юртэ. Ӵужанаез нуноксэ бордаз карыны тырше ке но, солы уг сёто, пересь мурт огназ будэтыны уз пӧрмыты, шуо. Но кышномурт ялан нылпи юртэ ветлэ, нуноксэ чакла.

— Нылпи юртын улонме умой уг тодӥськы ни, — шуэ Василий Михайлович. — Азям одӥг гинэ суред: вань пиналъёс кырын лымыен шудо, нош мон, укноетӥ учкыса, сылӥсько, штание ӧвӧл. Котмемзэ воштыны немаин вал, дыр…

Огпол нылпи юртэ лыктӥзы пинал утчасьёс. Шаерысьтымы кивалтон ёзын ужась адямилэн аслаз пиналыз вылымтэ, пичи Василы синмаськем. Ӧйтӧд, кыӵе луысал пияшлэн улонэз, но ӵужанаез, та сярысь тодыса, сурым поттӥз, директорлэн кабинетаз пырыса, ӝӧк вылэ мыжгаса ик, куаретӥз: пизэ со нокинлы уз сёты! Ачиз будэтыны быгатоз!

Василы 4 арес. Ӵужанаеныз ӵош.

Мамазэ тодытэк ик кылиз бере, мемейзэ Васи «мама» шуиз. Нылызлэсь пизэ кышномурт туж чакласа будэтӥз, тӧл шуккемлэсь кышкаса, укыр шуныт дӥсялляз. Ялан сюлмаськылӥз: Васи висьыны усиз ке, опекая ёзъёс пияшез берен басьтозы. Василий Михайлович серекъя: шуныт дӥсяськон сямы али но кылемын, тӧл шуккемлэсь кышкасько.

Лена апай туж тыршиз пизэ визьмо, ужась будэтыны, капчи ӧй вал ке но. Огназ йырыныз хозяйствозэ ӟеч возиз. Туж ужась, юн сямо но чылкытлыкез гажась вал. Нуноксэ индылӥз: адямилэсь кыӵезэ тодэмед потэ ке, койка улзэ, гур азьзэ учкы. Отын тузон ке, озьыен, кузё азьтэм. Юн кышномуртэ гуртоос ӧзгес яратылэ. Но ӵужанаезлэн сыӵе сямыз ик пияшез урод сямъёслэсь утиз. Угось со вакытэ гуртысь тросэз пиос кыскыны, юыны кутскылӥзы, жугиськизы.

Атаез ӧй вал бере, Васиез ӵемысь серем карыны, ултӥяны выризы. Пиос гинэ ӧвӧл, куд-ог дышетӥсьёс но. Ялан кышъям штаниен ветлӥз ук. Уксёлы ёрмеменыз ик, ужаны туж вазь кутскиз. Ньылетӥ классысен колхозын тыршиз, нош 7-тӥ классысен нюлэс дасяны ветлӥз ни.

— Гуртын котькуд коркась быдэн одӥг адями бӧляке нюлэс дасяны мынэ вал. Нош милям мон сяна кин-о мыноз? Тӥни озьы 13-14 арескам нюлэс дасяны кутски. 7-тӥ классын ик аслэсьтым ӵыпем бугроме нырысьсэ вузай, — тодаз вае Василий Михайлович. — Мыным эшъёсме кызьы ке сутоно вал ук, соослэн ваньмыз вань, уксёлы уг ёрмо, мынам — ӧвӧл. Соингес ик азьланяз дышетсконо кариськи. Гуртын кыӵе ужъёс вань? Зоотехник, агроном, бухгалтер, дышетӥсь, инженер…

Пияш бырйиз инженерлэсь ужзэ. Бугро лэсьтыса вузам коньдонэныз Глазовысь техникумын дышетскиз.

 Буйгасьтэм мылкыд

Дышетсконзэ йылпумъяса, Василий «Юж-Пурга» колхозын техник-механик луыса ужаз. Али кадь ик син азяз: сӥзьыл куазь уродъяське, зоре. Егит пиез куризы гуртысь клубез выльдыны.

— Клуб шорез вандыса куштоно, отчы Т буква выллем бугро ӝутоно, липет лэсьтоно, — тодаз вае Владимиров. — Юрттӥсе — войнае ветлэм одӥг пересь, со но юэмысь уг дугдылы. Мон ужасько, нош со клуб вадьсысь коркан эшеныз юыса пуке, мынэсьтым ужме чакла. Та клубез мон кык толэзь ӵоже лэсьтыны выри, липетсэ но, выжзэ но, борддоръёссэ но. Со гинэ ӧвӧл, 7-тӥ ноябре, гуртысь вань егитъёсты бурдъяса, отын концерт сётӥмы на. Учкисьёс медаз кынме шуыса, генератор вайи.

Сельсоветлэсь сётэм ужзэ быдэстӥз бере, пияшлы трудовой книжка лэсьтӥзы. Нош кияз трудовой шедьыса, Владимиров колхозын ӧз ӝега ни, Пичи Пурга черкогуртэ кошкиз. Татын 24 аресъем пиез соку ик техникаез тупатъянъя станцилы кивалтӥсе пуктӥзы. Быдэс ёросысь тракторъёс, комбайнъёс, косилкаос, вань туала техника Владимировлэн ки улаз вал. Та интыын Василий Михайлович вить ар ужаз.

Егит дыр. Ас киыныз пуктэм клуб азьын.

— Мон уг тодӥськы сыӵе ужез, кудзэ лэсьтыны уг быгаты, — ачиз сярысь серекъяса вера Владимиров. — Мамае дышетэ вал: пие, умой ужа, кивалтӥсьёслэсь кылзӥськы, вина эн юы, адямилэсь ноку но номырзэ но эн басьты. Мон туж кылзӥськись вал, солэн верамезъя улыны тырши. Нош туж шонер улӥсь адями кинлы кельше? Планэз одно ик быдэстыны косо вал. Но со ӵемысь бумага вылын гинэ быдэсъяськылӥз, 100 процентозь ӧзгес вуылы. Мон озьы ик гожтӥсько вал. Но кивалтӥсьёсмы пыкылыны кутскизы: тросгес, пе, гожъя. Озьы вань ужмы вал вылӥос азьын ушъяськон — вупульы кадь.

Василий Михайлович озьы улыны ӧз быгаты, шуиз: лыдпусъёсты пӧяськыса гожтон — со сыӵе ик лушкаськон. Соку солы ультиматум пуктӥзы: яке кошкиськод, яке мукет отделэ выжиськод. Владимиров калыкен вераськыны яратэ но, быгатэ но вал. Соин снабжение отделлэн кивалтӥсез луыса ужаны кутскиз.

Зэмлыкез укыр гажамысьтыз, трос шуг-секытъёсты адӟоно луиз на. Отделэн гинэ кивалтӥз ке но, туж сюлмаськиз ремонт лэсьтӥсь быдэс предприятизэс азинтон сярысь.

— Огпол вуылӥ Ижысь автозаводэ, — тодаз вае Василий Михайлович. — Шуисько: площадьёсмы вань, адямиосмы вань, ужмы ӧвӧл. Вае маке уждэс. Нош соос ӵапак йырзэс тӥяса пуко вылэм: кытчы интыяны луоз маховик лэсьтон производствоез. Киеве но, Питере но вазиськиллям ни, деталь лэсьтон борды нокин уг басьтӥськы.  Нош ми татын — ныр улазы. Туж шумпотӥзы, ньыль-вить пӧртэм уж сётӥзы. Кылсярысь, мотоциклъёслы маховикъёс лэсьтон.

Та вакытэ ик мон, предприятимес азинтон сюресъёс утчаса, вуылӥ «КамАЗ» заводэ. Югдурез валэктӥ. Шуизы: ярам, пе, электропроводкаез бичан уж сётомы. Но уждун кабелен, детальёсын сётӥм ке, яралоз-а? Яралоз, шуисько. Кык нунал ортчиз но, Пургала быдэс автобусэн специалистъёссы вуизы: кин, мар луиськом, учкыны.

Тыл но ву пыртӥ

Пичи Пурга ёросысь РТП-ын Владимиров оглом 25 ар ужаз. Техникалы ёзъёс утчаса, Россилэн кыӵе гинэ улосъёсаз ӧз вуылы, кусып возьылӥз кунгож сьӧрысь предприятиосын но.

1990-тӥ аръёсы приватизация кутскем бере Пургалась РТП-ын ужасьёс асьсэ предприятизэс ваучеръёсынызы басьтӥзы. Но… Автопарк сылэ, производство сылэ, адямиос сыло… РТП пумен куашкан калэ вуиз, калык кин кытчы кошкыны ӧдъяз. Кошконо кариськиз директорзы но. Кинлы осконо предприятиез? Василий Михайлович соку директорлэн снабжениея воштӥсез вал. Со азе нош ик ультиматум пуктӥзы: яке кошкод, яке директор луод.

Шаерысьтымы «Устоез предприниматель» нимыз пусйыкузы.

— Мон понна со туж бадӟым сюлмаськон вал, — тодаз вае воргорон. — Но кошкыны нокытчы. Озьы директор луи. Предприятилэн пунэм тыронъёсыз — 1,5 миллиард манет. Тырыны номырин. Уж ӧвӧл. Колхозъёс лябӟемын, «Ижмаш» кӧтурдэсаз кылле, ай эшшо йыртэмасьёс ёрто… Кык арня пала аслам кабинетам пуки, директорлэн кабинетаз ӧй пыра. Весь малпаськи: мар кароно? Предприятимылэн учредительёсыз — 300-лэсь трос адями. Нош ужасез 65 гинэ кылемын. Малы ми соос понна но тыршыны кулэ? Озьы, оглюкетсэ пайёсмес та предприятие ик кельтыса, ми отысь потӥмы но кык нимаз огазеяськон кылдытӥм. Ваньмыз законъя. Но сюлэм интыяз ӧй вал: оглом экономикаын туж секыт югдур бере, выль огазеяськонъёс но пыд вылазы султозы меда? Паймоно кадь, ӵапак та нуналысен йӧлэз басьтон дун будӥз, колхозъёс ужаны кутскизы, «Ижмаш» бурдъяськиз…

Но аръёс ортчемъя выль кылдэм огазеяськонъёслэн ёзчиоссы асьсэ пайёссэс вузаны кутскизы. Шедизы уго мылкыдзэс бугыръяны быгатӥсьёс, бадӟым коньдон сӥзисьёс. Али учкыса паймоно: Пичи Пурга ёросысь сельхозтехникая огазеяськонлэн 200 пала ёзчиосыз пӧлысь Владимиров огназ гинэ аслэсьтыз пайзэ недвижимостен басьтоно кариськиз, нокинлы но сое ӧз вуза. Со вакытэ сыӵе вамыш лэсьтон понна туж дӥсьтӥсь луыны кулэ вал. Мукетъёсыз ваньзы пайзы интые коньдон басьтӥзы. Кӧня ӧтиз Михалыч (воргоронъёс солы озьы гинэ вазиськылӥзы), бордаз итӥськыны нокин ӧз дӥсьты.

2004-тӥ арын, аслэсьтыз пайзэ кутыса, Владимиров усьтӥз автосервисэн вырись предприятизэ.

 Михалыч доры…

2004-тӥ арын, аслэсьтыз пайзэ кутыса, Владимиров усьтӥз автосервисэн вырись предприятизэ. Мылкыдыз туж секыт вал, пыдъёсаз туж бадӟым гираос ошемын кадь. Юрттӥсьёсыз ӧвӧл, оскиськоно аслыз гинэ. Кӧня ке ар ӵоже со ужаз, шутэтскон нуналъёсты тодытэк, нылпиоссэ но кузпалзэ тыро-пыдо адӟылытэк. Ужез пичиен-пичиен, ар бӧрсьы ар азинскиз: пуктӥз офис, сиськон инты, лэсьтӥз котельной, автомойка, выль складъёс, басьяз шиномонтажлы чаклам пӧртэм станокъёс, усьтӥз автозапчастьёс вузась магазин…  Владимиров доры Пурга ёросысь гинэ ӧвӧл, бускель Агрызысь, мукет ёросъёсысь но калык кыстӥськиз. Понназы шуылӥзы: Михалыч доры ветлоно, со юрттоз… Нялтас вераса, Владимировлэн предприятиез Пурга ёросын кылдэм нырысетӥ автосервис вал. Огшоры гараж бордысен кутскыса, 12 ар ӵоже со будӥз туала рос-прос предприятиозь. Ачиз Василий Михайлович гинэ тодэ, вылды, кӧня кужым но чидан понэмын со понна.

Зэм, туала вакытэ вань лулкужымзэс ужзылы сётӥсь адямиосын нокинэ уд паймыты. Озьы ке но одӥг ужпум — адями бюджетысь коньдон басьтыса улэ ке, мукет — аслаз кужымезлы, быгатэмезлы гинэ оскиське ке.

— Адями ачиз ужаса ӝутӥське ке, со киыныз но, пиньыныз но возиськыны, кутскем ужзэ утьыны, азинтыны тыршоз. Кытысь ке вылӥысь пуктэм кивалтӥсен ӵошатыса, сыӵе адями юнгес луэ. Мынам одӥг эше вал, дорам водитель луыса ужаз. Али солэн аслаз фирмаез вань, туж быгатыса кивалтэ. Нош кӧня адямиос, вылӥ тодон-валан басьтыса но, водительын ужало, — пайме Василий Михайлович. — Предприятие пырон азьмес векчигес гинэ асфальтэн шобыртӥ вал. Огпол бер ӝыт кылӥсько, азбарын маке пырк-пырк каре. Сылӥсько паймыса: кытысь, мар куара со? Учкисько но: асфальт улысь турын потэ, пырк гинэ карыса, изэз донге, ишкалтэ. Ненег турын ворме изэз! Ми пӧлын но сыӵе адямиос луыны кулэ. Соос вань. Милемыз зӥбо-зӥбо, нош ми нош ик султӥськом, ужмес лэсьтӥськом…

 Одӥг кырымын

Шутэтсконэз тодытэк ужамез Михалычлэн тазалыкез вылын шӧдӥськытэк ӧз кыльы. 2011-тӥ арын пиосмурт, сюлмыз кутыса, больницае шедьылӥз. Ньыль борддоръёс вискын кема гинэ кыллиз. Та вакытэ атайзэ воштӥз Ижысь заводын ужась пиез — Костя. Со но инженер, йылпумъямын ИжГТУ-эз. Туннэ нуналлы Константин Васильевич Василий Михайловичлэн воштӥсез луыса ужа.

Нялтас вераса, Костя школа бере кытчы дышетскыны мынон пумысен пичи но ӧз шугъяськы. 9-тӥ-10-тӥ классысен ик тодӥз ни: техникаен выроз. Али серемпыр вера: мон, дыр, руль сьӧрын вордӥськи. Школаысен ик техника котыре кыстӥськизы Владимировлэн Александра но Анна нылъёсыз но. Ваньзы машина нулло. Атайзы соос понна али но туж бадӟым тубат вылын — сое гажало, солэсь визь-кенешсэ юало.

Данъяло ёросын но.

— Озьы луиз: школаын бадӟым классъёсын дышетскыкум, мон атайме туж шер адӟылӥ, — тодаз вае Костя пиез. — ӵош ужаны кутскеммы бере гинэ валай, кыӵе мынам атае, кыӵе солэн дунне шоры учконэз.

Зэмзэ вераса, Костя атаезлы, 2-тӥ курсын дышетскыкуз ик, рос-прос юрттӥськиз ни. Владимировъёс — атай но пиез — туж пӧртэмесь кадь. Валамон, дунне шоры учконзы но висъяське. Школаын дышетскыкуз ай, Костя вералоз, пе, вал: вот мон атайлэн предприятияз ваньзэ сыӵе лэсьто, сыӵе лэсьто! Но аръёс ортчемъя адями воштӥське. Али Костя гань-ганьгес луэмын, Удмурт Республикаысь Покчи ужбергатӥсьёслэн ассоциацизылэн ёзчиез, ёросысь активист.

— Уж дурын атай — кивалтӥсь. Дорын со небытгес луэ, — шуэ Костя. — Предприятиын ми азьын пӧртэмесь ужпумъёс сыло. Кыдёке азьланезлы планъёс пуктон, стратегия, маркетинг, выль технологиос — та мынам уже. Нош атай нуналмысь ужен выре, ваньзэс чакланы-адӟыны вуттэ. Со доры ӵемысь пыро улон сярысь вераськыны, чай юыны. Со быгатоз кылзыны но визь-кенеш сётыны.

Владимировъёс туж пӧр-тэмесь, но соос — одӥг бадӟым кужым. Тае адӟиськод, берло аръёсы лэсьтэм ужъёссэс чакласа гинэ но. Туннэ нуналлы «ИП Владимиров» — пыд вылаз йыг-йыг сылӥсь туала предприятие. Доразы автозапчастьёс, авторезина но детальёс вутто Ижысь, Пермьысь, Тольяттиысь, Набережные Челныысь предприятиос. «ИП Владимиров» — со шиномонтаж, автомойка, автозапчастьёсын но спорт удысысь тӥрлыкъёсын (велосипедъёс, тюбингъёс, пыжъёс но мукет) магазин, бадӟым складъёс, автопарковка. Котькыӵе марка машинаед мед луоз, татын сое одно ик тупатозы, инжекторной двигательёсты эскерозы но миськозы, лобовой пиялаоссэ воштозы но мукет. Предприятиын нуналаз 30-40 машина тупатъяло, 200-лэсь трос пӧртэм ужъёсты быдэсъяло, магазиназы 10 сюрслэсь трос пӧртэм вуз дэмлало. Татын котьку вань дежурной слесарьзы. Солы луыса шуге-леке шедем машинаез тупатыны луэ, черодэз возьматэк но. Нош со вискын адями быгатэ шутэтскыны, кофе юыны, сиськыны, телевизор учкыны. Со сяна, доразы ялан вазиськылӥсь клиентъёс понна 10 процентъем скидка сётӥсь картаоссы вань. Татысь ик матысь адямидылы кузьымлы сертификат басьтыны луоз — 500 манетысен 5 сюрсозь. Владимировъёслэн ваньмыз лэсьтэмын, калык сярысь малпаса. Ужасьёссэс но татын гажало, соос понна пӧртэм тунсыко ужрадъёс ортчытъяло, тодон-валанзэс будэтыны луонлык сёто.

— Чаклано ке, ужасьёсмы пӧлын пӧртэмез вань, — шуэ Михалыч. — Кин кызьы ужа, сомында ик басьтэ. Одӥг дыр ӵоже ик одӥгезлэн таӵе, мукетызлэн сыӵе уждунэз луыны быгатэ. Куд-огзэ куаретӥсько: мыным возьыт тыныд сыӵе пичи уждун тырыны, учкы ай, таиз тросгес ужам ук. Ай, яралоз мыным, шуэ… Ма, кызьы тыныд яралоз, паймисько. Мыным аслым возьыт, тон ӧд ужа шуыса…

Нялтас вераса, Владимировъёслэн предприятиязы одӥг адями но тамак уг кыскы. Котькытын чылкыт, чебер. Гужем парковказы вӧзын ик сяськаос пушъё, толалтэ  предприятизы гирляндаосын чеберске. Мыло-кыдо выро спонсор ужен. Пурга гимназиысь нылпиослэн шаертодонъя ужъёсынызы ньыль книга поттыны юрттӥзы ни. Юрттэт сётъязы черклы, ёросысь ветеранъёслы, приютысь нылпиослы, арлы быдэ юртто ёросазы удмурт кылъя «Дебаты» шудонэз радъяны.

Семьяез — бадӟым!

 Та мынам уже!

Туэ Василий Владимиров пусъемын «Удмурт Республикаысь калыклы юрттэт сётон удысысь дано ужась» нимын. Но ачиз Владимиров тужгес вылӥ дунъя семьяен улонэз. Анай-атайтэк, сузэр-вынъёстэк будӥз бере, семья со понна тужгес бадӟым шуд. Кузпалыз — Римма Александровна — Пичи Пурга гимназиын историлы дышетэ.  Александра Васильевна нылыз — гимназиысь англи но удмурт кылъёслы дышетӥсь. Аня огвакытэ атаезлэн автозапчастьёс вузась магазиназ ик вуз карись луыса ужаз, али дораз нылпиен пуке. Нош Костязы, валамон ини, атаез вӧзын. Василий Михайловичез шумпотто ни  сизьым внукъёсыз. Туж ӵем бадӟым семьяенызы одӥг ӝӧк котыре люкасько, ярато инкуазе потаны, спортэн выро, Россиез но дуннеез котыръяло.

Европаысь 6 кунэ ветлӥзы ни. Кемалась ӧвӧл кузпалыныз ӵош вуылӥзы Нидерландые, собере — Италие. Отысь 12 городъёсты учкыса потӥзы. Кык ар талэсь азьло Алтае вуылӥзы, 1 сюрс 900 иськемез машинаен, 40 иськемез пыдын ортчизы, эшшо 78 иськемез Телецкое тыэз котыръязы. Туэ Удмуртиысь вань 25 ёросъёсысь тужгес тунсыко интыосы вуылӥзы.

Владимировъёс быгато, вань сюлэмзэс сётыса, ужаны но, шутэтскыны но. Василий Михайлович пусъе:

—  Улонын удалтэ соослы, кин ужа нуналаз 24 час но арняяз 7 нунал.

Аслаз предприятиез шоры возьматыса, ватса на:

— Пӧртэм секыт вакытъёс вал. Али но вань. Но та — мынам уже. Со мыным сыӵе кельше…

Елена МИННИГАРАЕВА

Удмурт Дунне
By Удмурт Дунне 17 декабря, 2016 14:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<