Еремей Айпинлэн прозаез пумысен малпанъёс

Удмурт Дунне
By Удмурт Дунне Декабрь 29, 2016 12:42
aypin_4

Еремей Айпин.

Инмар — со яратон

Еремей Айпин гожъяз лирической веросъёссэ, зэмос улонэз возьматыса, озьы ке но кӧня ке сое воштыса, сюлэмез пыр поттыса.

Еремей Айпин вордскиз 1948-тӥ арын. 9 аресозяз вераськиз ханты кылын гинэ, райцентрын тямыс классъем школаез йылпумъякуз гинэ, солы кулэ луиз ӟуч кыл. Школа-интернат сярысь тодаз вайылыны уг яраты: сюлмыз куриськылӥз анай-атаез дӥне, инкуазе. Ханты-Мансийскысь дышетӥсьёсты дасянъя училищеез йылпумъяса, пыриз Москваысь Литературной институтэ. Та дырозь гожтӥз 20-лэсь уно чеберлыко произведениос, нырысетӥ книгазэ поттӥз 1979-тӥ арын «В ожидании первого снега»  нимын. Али луэ Ханты-Мансийск автономной округлэн Думаысьтыз депутат, Уйпалась выжы калыкъёслэн ассамблеяенызы кивалтэ.

Али но паймисько, кызьы Еремей Данилович одӥг шокчемен лирической произведениоссэ гожъяны но лыдӟисез вень вылын кадь возьыны быгатэ. Со детективъёс уг гожъя ук — яратон сярысь сюлме пырись учыръёс. Дунне, кытын кивалто яратон, огкуспын ортчись шуд но яратонзэ ыштэм геройлэн сюлэм висёнъёсыз, монэ, лыдӟисез, пушказ выйытэ. Яратон гур но со бӧрсьы вуэм оген кылён пӧлэстӥськыса вунонтэм суред кылдыто. Ваньмыз, мар героез котыртэ, соин ялан кусып возе. Хантыослэн малпамзыя, адямиос дуннеез кылдытыны уг быгато, но соос кыл куто со дунне понна.

Айпинлэн героез — романтик но мистик. Сое воксё мукет адӟон возьма вал, но улонэз мукет сюрестӥ кошкиз — татысь ик дунне шоры трагической синъёсын учкон.

Басьтом, кылсярысь, «Осень в твоём городе» вероссэ. Вылтусызъя — героиняен ӧвӧл, асэныз ваче вераськон. Геройлэн улонэз кыклы люкиське: мар луыны быгатэ вал но мар луиз милесьтым вылӥынгес сылӥсь кужымъёсын йырин…

Шудэз уг луы шараяны но сётыны, со котьку вакчи но кошкись… Озьы ке но шуд понна кулэ на сюлмысь тыршыны! Верослэн кыкетӥ люкетэз — ыштэм шудэз утчан. Татын туж трос сюлме пырись  пырыос — авторлэн выль шедьтонъёсыз. «Залын мон пуки Тынэсьтыд бур палан но кылзӥськи сюлэмдэ. Солэн йыгаськемез кылӥськиз мынам Уйпалэлэн йӧосаз но лымыяз, мон кутыны турттылӥ та дуно куараосты». Тазьы гожъяськон амал — чеберъяськон ӧвӧл, со яратыны но бордысьтыз лэзьыны быгатӥсь сюлэмлэн тусыз!

Ханты писательлэн новеллаосаз яратоно кышномурт — со Инмар. Мар тодэ со сярысь лыдӟись, нимаз адями солэн тусыз сярысь? «Тон быдэс Дуннеез шунтылӥд. Быдэс. Тон шунтылӥд кыдёкысь Уйпалась атаелэсь юртсэ, милесьтым ягелё пужым нюлэсмес, милесьтым тыосмес, милесьтым шурмес но милесьтым Инмармес… Оло, Тон ачид Инмар?»

Татын вератэк кельтыны уг луы Е. Айпинлэсь аслэсьтыз кылъёссэ, соосты быдэс лирической прозаезлы эпиграфен лыдъяны луэ: «Яратон сярысь гожъяны секыт — нош яратыны эшшо но секытгес».

* * *

«Река-в-январе» бичетын яратон сярысь веросъёсыз пӧлын пумиськыло мукет шӧмоосыз но, кылсярысь, «Продавец Кондаков». Татын вераськон мынэ Сургут ёросысь пересьлэн, кырӟасьлэн но мадиськисьлэн Иван Степанович Сопочинлэн нимыныз, со югыт дунне вылын сю ар пала улӥз. «Ожгар вуиз. Мынэсьтым вынъёсме нуизы. Соос отын кыкназы но быризы. Кондаков вуз карись но, шуо, ожысь ӧз берты. Озьыен, со но быриз». Кондаков куке но Иван Сопочинэз ӝоже уськытӥз вал, но ож мынон вакытэ йыркуръяськонлы инты ӧвӧл ни.  Уго ож ваньзэс одӥг радэ поттэ. Ож тема Е. Айпин вӧзтӥ нокызьы палэнтӥ ортчыны уг быгаты вал: со, округысьтымы тросэз быдэ вуэм писательёс кадь ик, ож бере вордскем нылпи.

Аслаз нырысетӥ бадӟым произведениосаз  Е. Айпин, калыклэн тодэ ваёнъёсыз вылэ пыкиськыса, жаляса гожтэ хантыослэн ортчем вакытсы, вунэтэм кылзы, бырись сям-йылолъёс, тайгалэн вуныны кутскем куронъёсыз сярысь.

«Божья Матерь в кровавых снегах» книгаысь веросъёс гожтэмын писательлэн матысь адямиосызлы луыса, кудъёсыз кышкаса, пеляз гинэ вераллязы, кызьы Казым шур дурын улӥсь хантыос 1930-тӥ арын совето властьлы пумит султӥзы. Е. Айпинлэн тросаз веросъёсаз вераськонэз нуо асьсэос геройёс, кудъёсызлэн зэмос прототипъёссы вань. Соос усьтэм лулоесь но сюлмоесь. Мукет геройёсыз — индивидуалистъёс. Писатель малпа, соос наука но техника азинскемъя кылдо. Но кыӵе дуныз со азинсконлэн, со сантэма ке писательлэсь Инкуазьзэ но вордскем Дорзэ?

Еремей Айпинлэсь книгаоссэ шедьтыны быгатоды татысь

М. Рябийлэн «Объяснение в любви» книгаысьтыз,

берыктӥз Мария Векшина

 

Удмурт Дунне
By Удмурт Дунне Декабрь 29, 2016 12:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<