Эшсы — куас но пыӵал

Удмурт Дунне
By Удмурт Дунне Декабрь 23, 2016 13:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

previewИжысь Демидов нимо биатлонъя комплексын 21-тӥ декабре Россилэн кубокезлэн 3-тӥ этапез но биатлонъя Россиысь ӵошатскон усьтӥськизы. «Ижысь винтовкае» кужымзэс мертаны вуизы Россилэн пӧртэм сэрегъёсысьтыз 200 котыр воргоронъёс но пияшъёс. Кышномуртъёслэн но нылашъёслэн ӵошатсконзы та нуналъёсы ик ортче Чайковский городын.

Ангелина Снигирёва

Журналист Ангелина Снигирёва Дмитрий Малышко биатлонистэн.

Воргоронъёс куасъёс вылэ султыны 11 часкын кулэ ни вал, но кезьыт кариськемен валче ӵошатскон 3 часлы бергес кутскиз. 13 час 45 минутэ стадионын ӵаш вазе вал ини. Ужан нунал ке но, эстафетаез учкыны вуэмъёс вань, соос чепылляськись куазьлэсь но кышкаллямтэ. Иже вуизы Ханты-Мансийскысь, Санкт-Петербургысь, Красноярск, Тюмень, Камчатка улосъёсысь, Башкортостанысь воргоронъёслэн 17 командаоссы. Соос пӧлын Россиын тодмо спортсменъёс но: Алексей Слепов, Дмитрий Малышко, Александр Печёнкин но мукетъёсыз. Удмуртилэсь данзэ утьыны кулэ вал 2 команда. Но огез бызьылонзэ куспетӥ кароно луиз. 7-тӥ номерен потӥзы Евгений Шамеев, Дмитрий Шамаев, Виктор Плицев но Александр Поварницын. Егитъёсмылэн командазылэн номерез 25. Андрей Демидов, Никита Лобастов, Владимир Кулеев но Кирилл Перевозчиков вожвылъясько Россиысь юниоръёслэн 10 командаоссы пӧлын.

gelya-biatlon

Стартэ потӥзы Россиысь 20-лэсь ятыр командаос.

Воргоронъёслэн но егитъёслэн командаоссы вожвылъяськонэ валче потӥзы, но быгатонлыксы нимаз дунъяськиз.

«Старт!» — шуккиськиз судьялэн зол куараез. Спортсменъёслэн, оп! шуытозь, берзы ышиз ни. Нырысетӥ этапе асьме воргоронъёс пӧлысь потӥз Евгений Шамеев, егитъёс пӧлын — Андрей Демидов. Соос 7,5 иськем бызёзы, 2 пол ыбылӥськозы. Тросэз учкисьёс, кезьытлэсь ватӥськыса, ӵошатсконэз спорткомплекслэн юртысеныз учко. Кема ик дыр ӧз ортчы, спортсменъёс ыбылӥськон интые вуизы. Мишеньёсты янгыштэк ворсаса, азьпала потӥз воргоронъёслэн Красноярскысь командазы, со бӧрсьы Санкт-Петербург, асьмелэнъёс 10 кужмоосыз пӧлын. Егитъёс пӧлын азьпалан Санкт-Петербург, Тюмень, Башкортостан, кыдёкын ӧвӧл Удмуртия но.

Кыкетӥ этапе Д. Шамаев потӥз, азьпалан мынӥсьёслэсь 1 минут  18 секундлы кыльыса. Нош юниоръёс пӧлын Н. Лобастов — 24 секундлы бере кыльыса. Со вакыт ыбылӥськон интыын ӟырдыт ни. 2-тӥ этапез мынӥсьёс мишеньёсты ворсало. Д. Шамаевмы янгыштэк ыбылӥськыны ӧз пӧрмыты — ватсаса 2 патрон кутӥз, нош Н. Лобастов чылкыт ыбылӥськиз. Кыкетӥ ыбылӥськонын нырысетӥ спортсменмы ӧз янгыша ни, нош Никита 2 пол ӧз йӧтты.

biatlon-gelya

Ыбылӥське К. Перевозчиков.

Куинетӥ этапе воргоронъёсмы, трослы беромыса, потӥзы ни — 3 минут 20 секунд котыр, соос 9-тӥын мыно. Егитъёсмы 2 минут котыр келяло, соос 3-тӥ интыын возисько. «Эх!» — кылӥське учкисьёслэн куаразы. Асьме спортсменмы Виктор Плицев мишеньёсты, 2 патрон кутыса гинэ, ворсаз. Нош Владимир Кулеев чылкыт ыбылӥськиз, но ляб бызиз. Этапсэ Кирилл Перевозчиковлы, 1 минут 54 секундлы бере кыльыса, вуттӥз. Соос та вакытлы 4-тӥ интыын.

Виктор Плицев бере куас вылэ султӥз Александр Поварницын, сое азьпалто Ханты-Мансийскысь, Башкортостанысь, Тюменьысь спортсменъёс, асьмеос 8-тӥ интыын мынӥськом. Ыбылӥськон… Сашалэн мишенез 2 ватсаса кутэм патронъёсын гинэ ворсаськиз, Кирилл 1 пол янгышаз. Эшшо одӥг пол ыбылӥськоно на. Таяз радэ А. Поварницын ӧз янгыша ни. «Саша! Ӝоггес! Кужмогес!» — спортсменлэсь мылкыдзэ ӝуто висисьёс. Нош К. Перевозчиковлэн берпуметӥ ыбылӥськонын киыз дыректӥз, вылды, одӥг штрафной круг ортчоно луиз. Но спортсмен 3-тӥ интызэ пумозяз возьыны быгатӥз.

biatlon-gelya1

Удмуртия понна 2-тӥ этапез бызе Дмитрий Шамаев.

Финиш! Воргоронъёс пӧлын 1-тӥ луизы Ханты-Мансийскысь спортсменъёс, 2-тӥын — тюменьёс, 3-тӥын — красноярскъёс. Александр Поварницын, 3 минутлы кыльыса, командазэ 7-тӥ интые поттӥз. Егитъёс пӧлын вормизы тюменьёс, 2-тӥын — Ханты-Мансийскысь спортсменъёс, 3-тӥын  — асьмелэнъёс.

Ӵошатсконъёс луозы на 23-тӥ но 25-тӥ декабре. Учкисьёсты  автобусэн нулло дунтэк «Малахит» вуз карон центр дорысен.

Вормонзылы ваньмыз оско

Удмуртиысь спортсмен Александр Поварницын:

— Кезьыт куазь но трос лымы ӵошатсконлы люкетозы шуыса сюлмаськисько вал. Но ваньмыз умой ортчиз. Тау вожвылъяськонэз радъясьёслы — куас сюрес ӟеч дасямын вал. Туннэ ас азямы вань пуктэм ужпумъёсты быдэстыны ӧм пӧрмытэ ке но, вуоно нуналъёсы быгатонлыкъёсмес возьматыны быгатом шуыса, оскисько, уката ик нимаз вожвылъяськонын. Нимысьтыз саклык висъяло ыбылӥськонлы.

Тау кареме потэ Удмуртиысь учкисьёслы. Ас музъемад ӵошатскыны котьку капчигес, асьме адямиос, кичабонъёс мылкыдэз ӝуто, кужымедлы оскон эшшо но юнма.

Удмуртиысь спортсмен Кирилл Перевозчиков:

— Командаысьтымы ваньмыз пияшъёс вань кужымзэс сётӥзы. Ужпум пуктэмын вал нырысетӥ этапъёсысен ик азьпал радын возиськыны. Ас этапам 3-тӥ интыын кошки. Кыкетӥ ыбылӥськонэ вуыкум, адӟи: азям мынӥсь спортсмен янгышаз. Малпасько вал, ӝог ыбылӥсько но сое азьпалто шуыса. Но ӧз пӧрмы — пыдъёсы дыректӥзы но, штрафной круг бызёно луи. Озьы ке но вормисьёс пӧлы шедим ик.

Санкт-Петербургысь спортсмен Алексей Слепов:

— Кылем уйин лымы усиз, нош туннэ кынтӥз. Та куас сюрес вылын шӧдӥськытэк ӧз кыльы. Европаысь куас сюресъёсын ӵошатыса, туннэ сюрес пластилин кадь вал. Оло, ачим ляб мынӥсько, оло куасъёсы уг нискылто, оло сюрес сыӵе вал. 3-тӥез шонергес ик, дыр. Соин бызьылыны шуг вал, но, малпасько, та юрттоз мыным ӵошатсконлэн ӧраз пырыны но вуоно вожвылъяськонын ӟеч результатъёс возьматыны.

Ангелина Cнигирёва

Удмурт Дунне
By Удмурт Дунне Декабрь 23, 2016 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<