Алексей Петров — мунё кузё

Удмурт Дунне
By Удмурт Дунне 28 декабря, 2016 14:49
predlagaemyjj-variant

Алексей Петров — шаерысьтымы Мунё театрлэн кивалтӥсез.

Алексей Петров — шаерысьтымы Мунё театрлэн кивалтӥсез. Удыссэ 8 ар пала валтэ ини. Ужез ӟеч пӧрме: та дыр куспын театр выльдӥськиз но узырмиз — ужасьёсыз 100 котыр люкаськизы, мунёос 1 сюрс 700-лэсь ортчизы. Учкись доры валче кужымен котькуд ар 500 пала спектакль вуэ. Но тае Алексей Николаевич вормонэн уг лыдъя. Со понна валтӥсез — Мунё театрын юр-яр нылпи куара медаз чалмылы. Озьыен, ивор вотэсысь шудонъёс, чагыр экранысь мультфильмъёс  театрлэсь кужымзэ сапкыны уг быгато.

Мунё — шудон гинэ ӧвӧл

— Алексей Николаевич, пичи дыръяды малпалляды вал меда, Мунё театрен куке-соку кивалтоды шуыса?

— Мунё сярысь гинэ ӧвӧл, мон театр сярысь но ӧй малпаськылы. Пичи дыръя мылкыдъёс вошъясько ук. Шуом, телевизорысь адӟид лётчик сярысь кино. Всё, шуиськод, луо лётчик! Яке тылпу кысӥсьёсты возьмато. Та удыс но тунсыко потыны кутске.

Но мылкыды творчество котыре кыстӥське ик вал. Пичи дыръям туж ӵем театръёсы ветлылӥ. Соин ик, школаез йылпумъяса, Ижысь культурая колледже вамыштӥ. Собере тодон-валанме будэтӥ Удмурт кун университетысь Социальной коммуникациосъя институтын. Культурологлэсь дипломзэ басьтӥ. Ужаны интыяськи Удмурт театре. Татысен театр удысэз яратонэ кужмояз гинэ. Мукет ӧре кошкыны ӧй быгаты ини. Отын 9 ар тыршыса, выжи Мунё театре. Соку солэн юртэз  вуж вал на. Лэсьтӥськисьёсын ӵош кутскимы выльдыны. Ужмы усто пӧрмиз — асьмелэн кадь Мунё театрмы кунысьтымы куд-ог бадӟым городъёсын но ӧвӧл.

Пичи дыръям мунёлэсь пайдазэ чик ӧй адӟылы. Бадӟым будыса гинэ, валаны кутски: солэн кужымез туж бадӟым вылэм! Пичи пиналлэн малпаськыны быгатонэз пумтэм-йылтэм. Вӧзысьтыз огшоры арбериез улэп карыны быгатэ. Котькуд адями пичи дыръяз ассэ пӧртэм геройёс пыр адӟе. Соосын ӵош будэ. Вашкала дауръёсы нырысь кылдӥзы ӝӧк вылын эктӥсь мунёос. Ӝӧкез выретӥськод — мунё но эктыны кутске. Собере кылдӥзы чиньыосы дӥсяськись мунёос. Таосты воштӥзы ини бодыос вылэ юнматэм шудонъёс.

Историез бугыръяку, трос тунсыкозэ тодоно. Мунё — шудон гинэ ӧвӧл. Вашкала аръёсы со семьяез, юртэз утись интыын но кутӥськылӥз. Веднаськисьёс, мунёез венен  бышкаса, адямилы сьӧд кужымзэс ысъяллязы. Тросаз религиосын вань кыӵе ке но скульптураоссы, статуяоссы.

— Тӥляд театрдылэн узырлыкез — мунёос. Трос-а дыр кошке соосты лэсьтыны, кызьы утиськоды?

— Туннэ театрамы 700 ужась мунё лыдъяське. 1 мунёез лэсьтыны куддыр арня но тырме, куддыр толэзь ӵоже но лэсьтыса уг вутто — клейлэсь тып-тып лякиськемзэ витёно луэ. Кибашлыосмы зол тыршо. Мунё капчи мед луоз, нош пушкыз — буш, отчы  соин шудыны юрттӥсь механизм понӥськомы. 1 мунё огаз спектакльын гинэ кутӥське.

Бадӟымъёслы "Принцесса Турандот" спектакль.

Бадӟымъёслы «Принцесса Турандот» спектакль.

Вань на вашкала мунёосмы. Таосыз 1 сюрслэсь ятыр люкаськемын ини — куштыны кимы уг пыры. Угось со милям историмы. Зэм, аръёс соос вылын шӧдӥсько. Озьы ке но ум быгатӥське тэк возьыны — музеямы понӥськомы, пӧртэм адӟытонъёсы, творчестволы сӥзем пумиськонъёсамы поттаськомы.

Кызьы библиотекаосын книгаосты лач-лач утё, озьы ик ми но мунёосмес чакласькомы. Мунёос уг ярато температуралэсь вошъяськемзэ, мускытэз, ульчае соосты чик ум поттаське. Котькудзэ лач-лач ошиськомы: дӥськутэз медаз погмаськы, йырсиез медаз тугаськы, шудон бодыосыз медаз чигиське.

Творчестволы сӥзем пумиськонъёсмы нуналлы быдэ сямен ортчыло. Шаерысьтымы пӧртэм школаосысь нылпиос спектакльлэсь азьвыл ог час ӵоже мунёосын тодматско: кызьы соос ымзэс усьяло, кизэс-пыдзэс вырето, сцена кузя бызьыло. Куддыр нылпиос асьсэос шудонъёс лэсьтыны йӧндыро. Озьы пумиськонъёсмы пичиезлы но, бадӟымезлы но тунсыко пото. Актёръёс соослы мадё, кызьы кылдӥзы мунёос, театр, кызьы спектакльлы дасяськон мынэ. Катанчи сьӧрысь ужмес возьматыса, пинал спектаклез 10 поллы бадӟымгес тунсыкен учке. Куддыр выжыкылэ сыӵе зол вые —  герой солы уг кельшы ке, рюкзаказ яке кисыяз бугыръяськыны кутске. Мар ки улаз шеде, сцена вылысь мунё шоры лэзья!

— Мар кариськоды сыӵе учкисьёсын?

— Огласянь, та выллем учыръёс ӵем луыло бере, ми солы дышемын — ум керӟегъяськиське. Спектакль йылпумъяськем бере пиналъёс асьсэос жуг-жагзэс утялто ук. Мукет ласянь, со возьматэ: актёръёсмы сцена вылын ӟеч тыршо — пиналэз ас палазы карыны быгатӥзы, выжыкылэ вуттӥзы.

Пичи мурт пушказ пӧзись мылкыдъёссэ ватыса уг улы. Солэн ваньмыз син азьын. Та выллем витьымтэ учыръёсмы герӟаськемын, оло, соин: тросэз учкисьёсмы ми доры нырысьсэ вуо. Соос уг тодо, мар со сыӵе театр. Спектакль мыныку, залысь тылэз котьку кысӥськомы, крезьгур лэзиськомы. Куд-огез пеймытлэсь, куараослэсь (пьесаез учкыны котькугес ог 200 пинал люкаське), мунёослэсь сокем кышкатске — залысь ишкалтэм кадь потыса кошке. Пиналлы со зэмос стресс луэ. Соин ик анай-атайёслы небыт кариськоно, нылпилы ваньзэ валэктоно. Ог 5-10 минут ортчыса, со ачиз берен залэ куриське. Мумы-бубыослы  ӵем вераллясько: дорамы нырысьсэ лыктыкуды, заллэн шораз эн пуксе. Ӧйтӧд, кызьы спектакльын нылпи ассэ возёз.

Вал сыӵе но учырмы: «Голубой щенок» спектакльмы азьын катанчи сьӧрысь мунёмы чиптэм-чаптэм ышиз. Учкисьёсмы пӧлысь кудзы та шудонлы сокем синмаськем — туннэ но ум тодӥське. Но соку милемлы ӵуш-паш ужано луиз: мукет пьесаысь горд гоно коӵышмес гримёркаын сьӧд-сьӧд буямы.

Театр вите пичизэ но, бадӟымзэ но

Мунё театрлэн выжыкылын кадь чебер юртэз.

Мунё театрлэн выжыкылын кадь чебер юртэз.

 

— Туннэ репертуарады ог 40 спектакль. Кызьы пьесаосты бырйиськоды? Лыдэ басьтӥськоды-а нылпиослэсь мылкыдъёссэс?

— Пьесаосты бырйиськомы кема. Лыдэ басьтоно луиськомы пӧртэм аресъем пиналъёсты: нылпи садэ ветлӥсьёсты но, школаын дышетскисьёсты но. Та сяна, покчиос театре ӵем дыръя лыкто анай-атаенызы ӵош. Соин ик тэшкылилы гинэ ӧвӧл, мумы-бубылы но тунсыко мед потоз дорамы.

Учкисьёсмы пӧлын одно ик юалляськон ортчытъяськомы. Кылсярысь, соос куризы милемыз К. Чуковскийлэсь «Доктор Айболит» выжыкылзэ возьматыны — ми соку спектакль пӧрмытӥм. Но луэ озьы но: куронъёссэс быдэстыны ум быгатӥське. Угось куддыр произведение мунёосын возьматонлы уг тупа. Та пумысен пыр-поч эскеронъёс лэсьтэ худсоветмы.

Худсоветмы ӵемысь ачиз ӵектэ кыӵе ке литературной произведениез возьматыны. Пӧртэм луо соос: яке выжыкыл, яке кунысьтымы кыӵе ке праздниклы яке дано адямилы сӥзем пьеса. Тани Быдӟым Вормонлы 70 ар тырмонлы пуктӥмы «ПроЖить» спектакль. Инъетэз кутэмын Андрей Платонов писательлэн произведениысьтыз. Ӧм малпалэ, учкисьёсмылэсь со сюлэмзэс сыӵе вырӟытоз шуыса. Та спектакльмес Сыктывкарын ортчем калыккуспо фестивальын тужгес устоен лыдъязы. Бӧрысь Москваын но со кунысьтымы устоосыз мунё спектакльёс пӧлы сюриз. Отысь «Зарни маскаен» бертӥмы. Вуоно арын та спектаклен ик милемыз ӧтизы Санкт-Петербурге. Отын кунысьтымы мунё театръёслэн валтӥсез ужрадзы ортчылэ — «КукАрт». Оскиськомы, уйпал шоркарысь но кузьымтэк ум бертэ.

Тросэз малпало: мунё театр ужа нылпиос понна гинэ. Со озьы ӧвӧл. Ми тыршиськомы бадӟымъёсты но котырамы биньыны. Кылсярысь, Н. Гогольлэсь трос произведениоссэ возьматӥмы ини: «Ночь перед Рождеством», «Записки сумасшедшего» но мукет. Бадӟымъёслы но спектаклез бырйиськомы кема, туала улонлэн куронъёсызлы мед тупалоз шуыса.

— Россиысь тросэныз мунё театръёсын тӥ юн кусып возиськоды. Асьме театрмы соос пӧлын маиныз висъяське?

— Йошкар-Олаын но, Казаньын но театръёссы вӧл-вӧлэсь. Бордазы юромо лэсьтэмын машинаослы, автобусъёслы сылон инты. Жаляса верано, милям озьы ӧвӧл. Та муген ик, малпасько, троссэ учкисьёсмес ми ыштӥськомы. Ёросъёсысь пинал куноос дорамы автобусэн вуо, нош кытчы «корт валэз» кельтоно? Театрмы угось сылэ писпуос пӧлын. Соосты нокызьы но уд погыръя. Котырысьтымы урамъёсы уд чуртнаськы. Удмурт кун университетлы матын сылӥськомы бере, котькытын машина туйылӥськемын.

Ярам, нылпи таза ке. Ми доры ӵем вуыло ляб тазалыкен адямиос. Театрамы ляб кылӥсь, адӟись, ветлыны быгатӥсьтэм пиналъёс понна ваньмыз лэсьтэмын. Ужасьёсмы пумиталозы но, залэ но интыялозы. Но нырысь-валысь театрозь кызьы ке вуоно ук ай.

Усто соиз: театрмылэн юртэз синмаськымон. Шуныт, шулдыр, вӧл-вӧл. Сцена вылын куара ӟеч чузъяське.

— Асьме театрмы висъяське на, луоз, соин но —  бурд улады усьтӥськиз пичи театр — «Надежда».

— Зэм, таӵеез Удмурт шаерын гинэ вань. Сое ми асьмеос ӧм кылдытэ. Инвалид нылпиослэн анай-атайёссы ӵектонэн потӥзы. Милемлы малпанзы туж кельшиз. Угось туж умой валаськомы нылпиослэсь пуш дуннезэс: шудон пушкын, выжыкыл дуннеын висён чалякгес ортче. Нош сцена вылын быгатэмзэс возьмато ке, валало: анай-атайёссылы сяна, соос кулэ на учкисьёслы но. Озьы висись покчиос асьсэды одно ик йӧно возьыны тыршо, ляб тазалыксы сярысь нёръяса, жалямез витьыса, уг уло. Таӵе нылпиос понна театрлэн пайдаез 10 поллы бадӟымгес луэ. Али «Надеждае» ог 10 семья пыриське. Азьланяз та ужмес паськытатом.

dscn6357

Нылпиосын шудон.

Юрттӥське… коркакузё

— Ужады маиз тужгес но секытэн тӥледлы сётӥське?

— Мон уг валаськы, маиз секыт, нош маиз капчи. Ужам вань туж тунсыкоез но туж мӧзмытэз.

Тунсыкоез со бордын: шаерамы вань сыӵе семьяос — нылпиосынызы ӵош 1 спектаклез учкыны 10-15 пол ветло. Сцена вылын актёръёс кылъёссэс вунэтозы кожаса, юрттӥськоно карисько — бадӟым куараен кылъёсты верало. Соку валаськод: кызьы нылпи яратоно шудонэзтэк улыны уг быгаты, озьы ик театрлэсь но мозмытскыны уг пӧрмыты. Озьы нылпи театрлэн зэмос эшезлы пӧрме. Талэсь бадӟым шумпотон ми понна ӧвӧл.

Мӧзмыт пото бумагаосын герӟаськем ужъёс.

— Мунёос, нылпиос пӧ-лын ужаса, тӥ жадёнэз, керӟегъяськонэз уд ик тодӥське, луоз?

— Куддыр керӟег луылӥсь-ко ик. Но лек мылкыды 5-10 минут куспын тӧлӟе. Кызьы? Пиналъёсын ӵош залэ пуксисько но спектакль учкисько. Нунал куспын люкаськем мӧзмыт малпанъёс ас понназы сылмо.

— Кылэме вань: ачиз выжыкыл, пе, театрын уйёсы кузёяське!

— Выжыкылмы герӟась-кемын коркакузёенымы. Тросэз ужасьёсмы ас вылазы шӧдӥзы ини солэсь вӧзамы улэмзэ. Кылсярысь, костюмъёс понна кыл кутӥсьмы ӵемысь вералля огвыллем учыръёсты. Ӝыт, пе, пыдкукез одӥг интые лач поныса кельтӥсько, нош ӵукна со чылкак мукет азьын сылэ ини.

Та вераськонъёслы, оло, ӧй но оскысал. Но асэным учыр тупаз. Ог 2 ар талэсь азьло выль сезонмес усьтон нуналэ кабинетысьтым потӥ но ӧсме ӵогай. Ӧжыт улыса, отчы выльысь пыри но бакоми: секыт сейфе урдэслань пограм. Укноосы тып-тып ворсамын, коӵышмы ӧвӧл. Соку ини валай: коркакузёмы дорам вуылэм. Озьыен, выль сезонмы вӧй вылтӥ кадь ортчоз. Коркакузёмы ассэ шӧдытэ ке, ваньмыз усто радъяське.

dhuro2vsa84

Нылпиослы «Звёздный мальчик» спектакль.

Таӵе йӧспӧртэм учыръёслы мон чик уг паймиськы ини. Ужмы сыӵе ук — мунёосты улӟытӥськомы. Данъяськымон: кыкез шудонъёсмы туннэ шедемын Москвае, дуннеысь мунёослы сӥзем С. Образцовлэн музеяз — Гена крокодил но Чебер нылаш.

— Вуоно арлы кыӵе ужпумъёс азяды пуктӥськоды?

— Ужпумъёсмы вылесь уз луэ. Котькуд ар сямен ик, дасяломы 4 выль постановка, вуыломы пӧртэм фестивальёсы, городъёсы. Но ваньзэ тае лэсьтыны тыршомы азьвыллэсь кык полэс ӟечгес, мургес но паймымонгес.

Ольга Корепанова

Удмурт Дунне
By Удмурт Дунне 28 декабря, 2016 14:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<