Агрыз ёросын режиссёрен Лев Вахитовен пумиськон ортчиз

Удмурт Дунне
By Удмурт Дунне Декабрь 29, 2016 11:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
KONICA MINOLTA DIGITAL CAMERA

Лев Вахитов.

2016-тӥ ар Россиын кинолэн ареныз ялэмын вал. Сое лыдэ басьтыса, Татарстанысь Агрыз ёросысь Варклед-Бӧдья гуртысь клубын тодмо удмурт режиссёрен Лев Вахитовен пумиськон ортчиз.

Вордскем гуртысьтыз калыкез кинооссэ возьматыны Лев Александрович нырысьсэ люказ. Варклед-бӧдьяос но выль клубазы нырысьсэ лыктӥзы кино учкыны. Та пумиськонэз радъян понна трос сюлмаськиз клубен кивалтӥсь Наталья Матвеева.

Л. Вахитов — паймымон тыршись адями. Телевидение удысын 20 арлэсь ятыргес тырше ини. Со куспын 20-лэсь трос авторской ужъёс дасяз. Пӧртэм конкурсъёсын вылӥ пусъемын Касим Галиханов архитектор сярысь «Небесные линии», Лидия Нянькина кылбурчи сярысь  «Небо, кошка и стихи», «Странник. Художник Сергей Орлов», «Солнечный зайчик. Художник Менсадык Гарипов», Варклед-Бӧдья гуртын Быдӟымнуналэз пусъён сярысь фильмъёсыз. Берло аръёсы Лев Вахитов хантыослэсь, мансиослэсь улэм-вылэмзэс снимать каре.

Кытчы но вуылэмын ӧвӧл ини Лев Александрович: котыръямын быдэс Удмуртия, Казахстан, Урал — музъеммылэн пӧртэм сэрегъёсыз. Нош пичи дыръяз, нырысьсэ городэ мыныкуз, туж паймем вылэм, бускель гуртысь вӧй заводэз адӟыса гинэ но: со туж бадӟым потэм.

Лев Александрович яратэ инкуазез, адямиосты. Камера — солэн ужез но, шутэтсконэз но.

— Мон понна уж вань ке — со шумпотон ини. Дуннеез адӟисько, аслым мар ке выльзэ усьтӥсько. Мон малпамъя, дуннеез огшоры учкыса гинэ ветлоно ӧвӧл, соин ик мае аслым усьтӥсько, сое ик фильмъёсы пыр тыршисько калыклы возьматыны, — вера Лев Александрович.

Клубын пумиськон дыръя тодмо луиз, гурт калык аслаз кизилиез сярысь туж ӧжыт тодэ вылэм шуыса. Туала арын Интернет котькуд корка сямен  вуэмын ке но ини, мӧйыос пӧлысь ӧжытэз компьютерен вырыны быгатэ. Соин ик ваньмыз шумпотӥзы, «Быдӟым нунал», «Века и вехи» фильмъёсты учкыса, малы ке шуоно таосаз Варклед-Бӧдья гуртлэн улонэз, калыклэн инкуазьлы оскыса улэмез возьматэмын.

— Та фильмез адӟыса гинэ, валаны кутски, песятайёсмы туж визьмо уло вылэм шуыса. Татчыозь йылолъёслэсь радзэс туж ик уг валаськы, кудӥз малы лэсьтӥське, уг тодӥськы вал. Нош али валай: макем бадӟым калыкмылэн тодон-валанэз, — шуэ библиотекаын ужась Любовь Михайлова.

Л. Вахитов мансиослэсь, хантыослэсь, поръёслэсь но вӧсяськонъёссэс возьматэ.

— Туж кельшизы та калыкъёс сярысь фильмъёс. Соосын асьмеос одӥг выжыысь потэмын, удмурт сямъёсын ӵошатыса учкыны тунсыко вал, — шуизы бќдьяос.

Кучук шор ёзо школаысь дышетӥсь Марина Матвеева малпамъя, та пумиськон нырысь ик туж кулэ вал пиналъёслы, малы ке шуоно соос уг тодо вылэм  гуртысьтызы дано режиссёрлэсь творчествозэ.

— Туж кельшизы гуртмы сярысь фильмысь Лев Вахитовлэн кылъёсыз: «Будӥ чебересь, улонэз валась адямиос пӧлын. Отысь кужым басьтӥ…» Пиналъёс ас синмынызы адӟизы, пельынызы кылӥзы, макем дунъяны луэ вордӥськем палъёсты, — шумпотэ Марина Викторовна.

Любовь МИХАЙЛОВА

Удмурт Дунне
By Удмурт Дунне Декабрь 29, 2016 11:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<