25 ар — быдэс даур

Удмурт Дунне
By Удмурт Дунне 6 декабря, 2016 16:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

061086,Ишматова Татьяна,заместитель министра национальной политики«Удмурт Кенеш» огазеяськонлы тырмиз 25 ар. Мар лэсьтэмын та вакыт џоже но мар бордын азьланяз ужаны малпа огазеяськон? Та но мукетыз сярысь кенешиськом огазеяськонлэн тӧроеныз Татьяна Ишматоваен.

— Егит мурт 25 аресказ улонэзлы инъет лэсьтыны кутске гинэ ай, нош калык огазеяськон понна 25 ар — со бадӟым лыдпус, — вера Татьяна Витальевна. — «Удмурт Кенеш» понна быдэс даур ортчемын кадь. Со пӧртэм поколениысь адямиосты огазеяны быгатӥз. Зэм, со али ке но кылдон вакытысьтыз ужпумъёсты быдэстыны тырше. Шуг-секытъёс сыӵеесь ик кылизы ке но, та воксё но уг вера, соосты бералтыны ум пӧрмытӥське шуыса. Асьмеос одӥг юанъёс котыртӥ ик ялан бергаськомы, но соос шоры пӧртэм ласянь учкиськомы.
«Удмурт Кенеш» нырысь ик культураен герӟаськем юанъёс борды ӝабыртӥськиз вал. Озьы шаерамы ортчылыны кутскизы Гербер шулдыръяськонъёс. Табере котькуд гуртлэн, дыр, аслаз фольклор коллективез вань ни.
Кыл сярысь верано ке, нырысь ик кутскимы анай-атайёслэсь асваланзэс будэтон бордысен. Со уж пӧрмиз. Кун кылъёсъя закон но кутӥськиз. Адямиос али уг возьдасько удмурт кыллэсь. Но туннэ мукет ужпум кылдӥз: нылпи садъёсын, школаосын кылдытоно анай кылэз дышетыны луонлыкъёс. Туж трос егит семьяослэн нылпиоссэс удмурт кыллы дышетэмзы потэ. Но куд-огезлэн со уг пӧрмы: ас вакытаз мумы-бубыоссы соосты асьсэды удмурт кыллы ӧз дышетэ.
— Та юанъёслэсь куке мозмытскыны но быгатомы меда?
— Али сыӵе вакыт вуиз: одӥг гинэ юанэз ӝутыса, вань ужпумъёсты сэрттыны-пертчыны нокызьы уд быгаты. Вань юанъёслы пум понон понна кылдытыны кулэ культураез, кылэз, гурт удысэз, экономикаез огазеясь быдэс система. Ваньмы тодӥськомы: тросэз удмурт калык улэ гуртын. Соин ик нырысетӥез ужпум — утёно гуртъёсты. Кыкетӥез, егитъёс городъёсы но райцентръёсы кошко бере, отын но удмуртлыкез утьыны но азинтыны амалъёс кылдытоно. Но ваньзэ тае лэсьтон понна ужаны кулэ нимысьтыз программаос. Со кун программа луыны кулэ. Удмурт Элькунлэн Конституцияз ик гожтэмын: калыкез утён — кунлэн ужпумез. Берло лыдъян-чотанэз учконо ке, 300 сюрс адямилы кулэсмимы ни. Удмурт калыклэн лыдыз бордысь но потэ, луоз-а азьланяз Удмурт Элькун. Соин ик али шаерысьтымы мукет выжы калыкъёс пӧлын но валэктон уж нуиськомы: удмурт калыклэсь лыдзэ утён — со асьмелэн ваньмылэн огъя ужпуммы.
Зэм, асьмеос дышемын ни: кун выре бадӟым ужпумъёсын — гурт удысэз ӝутон, йӧл трос кыскон, уногес ю тысь бичан, нылпи сад но школа пуктон. Но удмуртлыкез ӝутонъя система кылдысал ке, со быдэсак вань удысъёсты огазеясал. Туннэ нуналлы удмуртлыкез утёнъя трос лэсьтэ Нациосын ужан политикая министерство. Трос ужпумъёсмы пќлэстӥськемын. Но котькуд министерстволэн ужаз луыны кулэ удмуртлык понна нимысьтыз ӧр. Та системаез кылдытон сярысь ужпумез ӝутыны малпаськомы.
Со юрттысал вань ведомствоослэсь ужзэс удмуртлык пала берыктыны. Асьмеос но, кивалтӥсьёс но валасалмы, кылсярысь, мар лэсьтоно 20 ар ӵоже.
— Со радлыклэн оглюкетэз ик — ёросъёсын валче ужан сярысь тупанкылъёс кутон?
— Асьмеос властен ӵош ужаны быгатыны кулэ. Мон кивалтӥсьёсын ӵош ке, утчасько соосын тупась мылкыдъёсме. Но со дыре ик шуисько: мон тӥледын соглаш, но тӥ но милемлы дурбасьтэ. Куд-ог кивалтӥсьёс куддыр «Удмурт Кенешлэсь» кышкало, сое конкурент чот адӟо. Кылмес вераськомы ке, шуо но: тӥляд ужды ӧвӧл со. Но ми экономикалэсь, политикалэсь палэнын ӧвӧл, со уставамы но гожтэмын. Асьмеос вань удмурт калык понна ужаськомы, кырӟанъёсын гинэ ум выриське. Соглашение гожтон возьматэ: кивалтӥсьёсын одӥг кыл шедьтыны быгатӥськом. Нырысетӥез огкыл гожтэмын ӝыны ар талэсь азьло Можга ёросэн. Та дыр куспын гинэ районын мае ке воштыны шуак уз пӧрмы. Но мылкыд умой: Можга городлэн йырыз Алексей Шишов «Удмурт Кенешлы» 25 ар тырмонэн валче ортчись ужрад дыръя сцена вылысен шуиз: городын удмурт гимназия лэсьтонъя проект бордын ужаськомы. Со сяна, 100 ар тырме удмурт кадръёсты будэтӥсь Можга педколледжлы. Сое утён но азинтон сярысь сюлмасько, та ласянь «Удмурт Кенешлэсь» дурбасьтэмзэ возьмало.
Валче ужанъя огкыл гожтэмын Иж городэн. Солэн йырыз Юрий Тюрин ужпумъёсмы шоры валаса учке. Ваньмыз кивалтӥсьёс озьы валче ужаны капчиен соглаш луысалзы ке, югдур чарак мукет луысал. Но куд-огезлэн пумиськемзы но уг поты, кыл кутонлэсь кышкало. Эшшо секытгес азьланьтыны мытэм ужез. Дан поттон гинэ медаз луы со. Пумиськон бере трос дыр ортчиз ке, кутэм тупанкыл вуноз. Сое весь тодын возёно, со бордын ужано. Мукет ёросъёсын но городъёсын џош ужанъя тупанкылъёс юнматон бордын уж мынэ на.
— џошатылћськоды, дыр, огазеяськонлэсь азьвыл но али ужамзэ?
— Нырысь кутскисьёс ӝутскем мылкыдын трос ужпумъёсты вырӟытъязы. Тау карисько соослы! Соостэк, оло, огазеяськон но ӧй луысал. Но гырем бере гыроно интыос ичигес кылё. Отӥяз ужаны секытгес луэ, уката ик тонэ азьвыл кивалтӥсьёсын ялан ӵошато ке. Одӥг тӧролы но ас вакытаз ужаны капчи ӧй вал. Куд-огезлы рос-прос ужаны ӧз сётэ асьсэос ик удмуртъёс. Дано тодосчимы Михаил Шишкин кыӵе пӧсь мылкыдын кутскиз вал, но удысысьтыз палэнтӥзы. Мукетыз тодосчи, Роза Яшина, 1 ар гинэ кивалтӥз. 1 ар куспын трос лэсьтод-а?
Асьмеос куд-ог дыръя шумпотӥськомы, адями ваньзэ курла, котькытысь урод палзэ утча ке. Палэнысен адӟиське уго: о-о, таид дӥсьтӥсь, тани маке лэсьтоз. Но лэсьтоз меда? Ас эрказ ужась огазеяськон кылдытон понна огазеяськонлэн ёзчиосызлэсь уксё бичано, ужбергатӥсьёсын кусып тупатоно. Но озьы но быдэсак эрико луыны быгатомы меда? Кин ке уксё сётэ ке, асьмеос со понна ужаны кулэ. Собере, котькудӥзлы кытын ке ужано, котькинлы семьязэ сюдоно. Туала улонын ваньмыз пыкъяське уксё борды. Соин ик ужаны секытгес, кыл кутон но ӧжытгес ӧз луы.
Огзэ тодӥсько: ас мылкыддэ вераськод ке, сое «Удмурт Кенешлэн» малпанэныз лыдъяло. Чаклало котькуд вамыштэ, тонъя дунъет сёто быдэс калыклы: быгатэ-а вераськыны, вань-а дунне шоры аслаз учконэз.
Туж шумпотӥсько: мон огнам ӧвӧл. Азьвыл тӧроос котырам: Валентин Тубылов, Николай Мусалимов, Игорь Семёнов. Вазиськид ке, соос котьку бурдъялозы но, соиз я таиз югдур шоры учконзэс вералозы. Собере, командатэк ужаны уд быгаты. Туж бадӟым осконэ: командае рос-прос ужалоз, котькудӥз ас интызэ шедьтоз. Кин ке, оло, палэнтӥськоз, но кылёзы тужгес чидасьёсыз но удмуртлыкен висисьёсыз. Куд-огез юа: маин юрттоно, мар лэсьтоно? Котькудӥз удмурт луэменыз данъяськысал ке, со туж бадӟым вормон луысал. Куд-огез шуэ: мар со «Кенешты»? «Удмурт Кенеш» ас понназ номыр ӧвӧл — сое асьмеос лэсьтӥськом.

Елена Сараматова

 

 

Удмурт Дунне
By Удмурт Дунне 6 декабря, 2016 16:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<