Ӝутымтэ корка — корка ӧвӧл на

Удмурт Дунне
By Удмурт Дунне Декабрь 23, 2016 12:25

Удмуртиысь трос этажъем 8 коркан пуктӥськон аналтэмын. Таин сэрен 864 семья секыт югдуре шедемын.

 

OLYMPUS DIGITAL CAMERA

Квартира пуктыны коньдондэ сётыкуд, оскиськод, липетэд дырыз дыръя луоз шуыса

Номыртэк кылён

Шуге-леке сюремъёс пӧлысь уноез — гуртысь потэмъёс. Пуктӥськись коркан квартира басьтыны дунтэмгес усе шуыса, застройщикъёс доры вазиськизы. Туала вакытэ тросэз озьы квартира басьтэ уго. Бератаз гинэ валазы: кризис вакытэ вань фирмаослы оскыны уг луы.

Пӧяськеме кылемъёс пӧлын удмурт воргорон Эдуард Карпов но. Дэри ёросысь Хохряки каргуртын «Родниковый край» комплексын пуктӥськись коркаослы гочаз. «Стройком» огазеяськонлэн яркытэсь ялонъёсаз суредамын вал: татын луоз 5 трос этажъем юрт, котыраз нылпи площадкаос. Омырез чылкыт, Ижлы матын, транспорт ветлэ.

— Таӵе рекламалы уноез оскизы, — шуэ Эдуард Карпов. —  Квартира дун но вормымон потӥз. 1 комнатаен квартира 1 миллион 300 сюрс манет тыр усе, шуизы. Застройщикен огкыл гожтон азьын комплексэн тодматскыны быдэс семьяен ветлӥм. Огаз пуктэм коркан уло ни вал бере, вуоно квартираосмы но пӧртэмесь уз луэ шуыса, возьматыны но пыртазы. Туж кельшиз. Вӧзаз мукетыз корка ӝутӥське. Тодэ ик ӧз лыктылы, татын лэсьтӥськон гуньдыны быгатоз шуыса. Озьы кылем ар пумын пуктӥськись коркан квартира басьтӥм. Оскытӥзы: 2016-тӥ арын январь толэзе отын улоды ни. Но уж ӝеганы кутскиз. Соку но нокыӵе ӧм кариське. Пуктӥськонын котьма луыны быгатэ уго.  Тулыс сюлэм шуг луыны кутскиз. Куазь чебер, нош лэсьтӥськон уг мыны. Мукет квартира кузёосын дэмен кариськыса, застройщикез утчаны кутским. Но со милемын вераськыны ик ӧз поты. Отӥяз тапалан улӥсьёслэсь воксё но кылӥськиз: материалъёсты бадӟымесь машинаосын поттало ни. Кызьы? Со милям уксёенымы басьтэмын ук! Озьы ог 40 кузя люкаськимы, коркамес тус-тас каронлэсь утён вылысь охранникъёс кариськимы. Ог-огмес вошъяса, али ке но материалъёсты чакланы вуылӥськомы, отын кӧласькомы. Пуктӥськон уг мыны. Но юрт лымы улын медаз уродмы шуыса, консервация ортчытыны быгатӥмы ик. Коркаез йылаз-пумаз вуттон понна ог 100 миллион манет кулэ на. Ваньмы дэмен кариськимы ке но, сомында уксё люканы ум быгатэ. Сотэк но ваньмы сямен та квартираосты кредитэн басьтӥмы. Мон толэзяз со понна 12 сюрс манет тырисько. Эшшо мурт патерын улэммы понна толэзьлы быдэ ог 6 сюрс манет кошке. Котьма ке но умоезлы оскон вань. Пие но весь юа: ку потом ни выль корка?

«Стройкомлэн» директорез Андрей Кунаев вылэ мурт уксёез кайпалтэмез понна уголовной уж ӝутэмын. Но страховой компания банкрот кылемен, адямиослы номырин юрттыны уг луы. Корка улысь музъем но собственникъёслэн ӧвӧл — нимаз адямилэн лыдъяське, со застройщиклы арендае сётэмын.

Пуктӥськонзэс аналтэм мукет застройщикъёс «Стройкомлэсь» пӧртэмесь ик ӧвӧл. Зэм, куд-ог коркаосын югдур чарак капчигес. Кылсярысь, Ижысь Петров ульчаысь 47а корка ог 95 процентлы вуттэмын. 2 подъездзэ «Инвест-проект» фирма быдэсак лэсьтыса вуттӥз, отын адямиос уло ни, нош огзэ подъездэз пумозяз ӧз вутты. 110 квартираысь кузёос, уксёзэс ыштонтэм, коркаосазы ӝоггес пырон вылысь дэмен люкаськизы но жилищно-строительной кооператив кылдытӥзы. Огез квартира кузё Анна Северюхина верамъя, ваньзы кисыысьтызы эшшо 80-150 сюрс манет поттоно луизы на. Озьы квартираосы шуныт пыртыны быгатӥзы. Табере  коммуникациосты  кысконо, укноосы янакъёс юнматоно, ӧсъёс пуктылоно, шпалер лякылоно. Талы эшшо быдэн ог 250 сюрс манет висъяно луозы на. Котьма ке но Выль арез выль квартираосын пумитаны чаклало. Таин сэрен али резь-куаж бызьыло-ужало. Корка быдэсак улыны тупамон ӧз луы ке но, семьяосты та уг кышкаты. Лифтэз соку ик лэзьыны ӧм быгатэ ке но, сотэк но ум кулэ, шуо.

Но озьы ваньмыз уз быгатэ жилищно-строительной кооператив кылдытыны. Уноезлэн уго коркаоссы липетозь но вуттэмын ӧвӧл. Петров урамысь ик 49-тӥ юрт 40 процентлы гинэ ӝутэмын.

 

Юрттэт вуоз

Шаерамы кылдэм югдурен тодматскыны вуылӥз «Огъя Россия» партилэн дольщикъёслэсь правооссэс утёнъя группаеныз кивалтӥсь, Кун Думаысь улон инты политикая но ЖКХ ужпумъёсъя комитетлэн тӧроезлэн воштӥсез Александр Сидякин. Группа 10 ар ӵоже Россиысь семьяослы юрттэ ни. Озьы 1 сюрс 938 аналтэм объектэз йылаз-пумаз вуттыны луиз, пӧяськеме кылем 195 сюрс 567  адямиос квартираосазы пыризы. Али 71 улосын 921 гуньдэм объект кылемын на. Александр Сидякинлэн группаез соосты син шораз возе. Удмуртиысь шуге-леке кылем семьяос сярысь но кылытэк ӧз кыльы.

Александр Сидякин шаерамы вуэмез бере ик Петров ульчаысь аналтэм коркаостӥ котырскиз, квартира кузёосын пумиськылӥз. Куректонэ усем дольщикъёсын ваче син кенешон азинтӥськиз Удмуртилэн Тӧроезлэн резиденцияз, татын котькудӥзлэсь вӧсьсэ кылзӥзы. Югдур борды дэмен басьтӥськыса гинэ, шуг-секытысь потыны амал шедьтом, шуиз Удмуртилэн Тӧроез Александр Соловьев.

Шаерамы 2014-тӥ арын дольщикъёсты утёнъя закон кутэмын вал. Соин валче застройщикъёс оскымонгес ужазы ни вал. Но кризис вуэмен, куд-огез воззэ ӧз вормы, куд-огез узырмыны малпаз. Озьы берло ар ӵоже 700-лэсь трос дольщикъёс пӧяськеме кылизы. Таослэсь югдурзэс одӥг кенешонэн гинэ уд тупаты. Соин ик котькуд объект бордын тазьы ик дэмен ужалозы азьланяз но.

— Секыт югдуре шедем семьяос нуналлы быдэ син азьын, — вера Удмуртиысь Правительстволэн Тӧроез Виктор Савельев. — Туннэ сюро ни инвесторъёс, соос дась басьтӥськыны аналтэм объектъёсты ӝутон борды.

Кун Думаын но шуге-леке вуэм адямиослы юрттон сярысь малпасько. Александр Сидякин верамъя, 2017-тӥ арын 1-тӥ январьысен  страховой компаниосын уз ужа ни огез но застройщик. Кылёз на компенсациосъя кун фонд. Котькуд застройщик табере барышезлэсь 1 процентсэ со фондэ келялоз.

— Ваньзэ лэсьтӥськомы, пӧяськеме кылисьёслэн лыдзы медаз ни буды шуыса, — вера Александр Сидякин. — Пуктӥськись коркан квартираосты вузасьёс, сое басьтӥсьёс вань дыръя алдаськеме кылисьёс но сюрозы. Тазьы ужан амалэз алоно ке, соку нокин пӧяськеме уз кыльы. Но соку квартира дунъёс шќдскымон йылозы. Соку уноез аслыз сэрег басьтыны уз вормы. Зэм, вань одӥг амал: квартира дунэз тыроно огкылэз Росреестрын юнматэм бере гинэ. Одно чаклано: застройщиклэн одно мед луозы музъемлы правоез, пуктӥськонлы разрешениез. Али застройщикъёслы куронъёсты эшшо но чурытэсь каро. Табере застройщик пуктӥськон сярысь вань ивортонъёсты сайтаз возьматыны, объектэ камераос юнматъяны кулэ — котькудӥз адӟыны мед быгатоз пуктӥськонлэсь мынэмзэ.

Адями ассэ быдэсак нокызьы но утьыны уг быгаты шуг югдуре шедёнлэсь. Но луэ чакланы, макем оскымон ужа фирма. Вань застройщикъёс сярысь ивор люкамын Лэсьтӥськонъя, архитектурая но улон инты политикая министерствоын, шуэ Виктор Савельев.

«Огъя Россия» партия пӧяськеме шедем дольщикъёслы юрттон, юанъёссылы валэктон сётон, югдурез чаклан вылысь Интернетын онлайн-приёмной усьтћз, адресэз: дольщики-ер.рф. Табере татчы котькудӥз аслаз сюлмаськонэныз куриськыны быгатэ. Нимысьтыз группа вазиськонзэ эскероз, тужгес секыт объектэ специалистъёс потозы, интыысь кивалтӥсьёсын ӵош югдурысь потон амал утчалозы.

Елена Сараматова

Туспуктэмез А. Горбуновлэн

 

Удмурт Дунне
By Удмурт Дунне Декабрь 23, 2016 12:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<