Вормыны юрттӥз… лымы

Удмурт Дунне
By Удмурт Дунне 8 ноября, 2016 10:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кылем арнянуналэ Ижысь «Купол» стадионын Россиысь нылкышно командаос пӧлын футболэн шудонъя кубок понна нюръяськонлэн финалэз ортчиз. Пумиськылӥзы Краснодарысь «Кубаночка» но Пермьысь «Звезда-2005».

sportsmenjos

Пермьысь «Звезда-2005» командаын шудо Удмуртиысь Н. Распопова но О. Касаткина.

Стадионысь вож турынэз лымы шобыртӥз. Но куазьлэн шуак воштӥськемез нокинэ ӧз кышкаты. Ӵошатскон 14 часын кутскыны кулэ вал ке, учкисьёс ӝыны часлы азьпал ик люкаськизы. Нылъёссы понна висьыны Пермьысь но Краснодарысь лыктэмъёс но вал. Россилэн кубокез понна нюръяськон шулдыр концертэн кутскиз. Спортсменъёслы но учкисьёслы капчи мылкыд кузьмазы «Брангуртысь песянайёс».

Учкисьёслы мӧзмыса кема пуконо ӧз луы. Шудонлэн 10-тӥ минутаз Пермьысь Дарья Апанащенко гол пыртӥз. Отӥяз «Звезда» эшшо бурдъяськиз. 23-тӥ, 28-тӥ но 42-тӥ минутъёсы «Кубаночкалы» вылысьтыз вылаз гол пыртӥз. Шудонлэн кыкетӥ люкетаз Краснодарысь футболистъёс но сайказы кадь, но 4 гол пыртыны ӧз кылды ни. Пумиськон 5:2 лыдын йылпумъяськиз. Тужгес сэзь футболистэн лыдъязы Пермьысь Дарья Апанащенкоез, пумиськон дыръя со 3 гол пыртӥз.

Россилэн кубокез понна нюръяськонэ 20 команда пыриськиз, со пӧлысь 6-ез вылӥ дивизионын шудэ. Асьме шаерын нылкышно футбол лябгес азинске. 4 команда пӧлысь азьпалан Ижысь «Торпедо» команда. Россиысь ӵошатсконлэн нырысетӥ дивизионаз йыгаськыны выре, жаляса верано, вормисьёс дорозь сузьтӥськон вылысь солы трос тыршоно на.

Со понна Ижын кыдам нылъёс Ольга Касаткина но Наталья Распопова Пермьысь «Звезда-2005» командалы вормон басьтыны юртто. Таяз учыре но матысь ӵыжы-выжыоссы азьын возьытэ ӧз усе. Натальялэн мылкыдыз уродгес вал: Ижын шудыны ӧз кылды, угось берло тренировкаын вӧсь луыны шедьтӥз. Нош Ольга гол пыртыны быгатӥз.

Шудон йылпумъяськем бере  командаослэн тренеръёссы журналистъёслэн юанъёссылы валэктонъёс сётӥзы.

— Кубок понна нюръяськонлэн финалаз 3-тӥзэ шудӥськомы, туэ но вормыны ӧз кылды, — шуэ «Кубаночка» командалэн валтӥсь тренерез Татьяна Зайцева. — Краснодарысь нылкышно командалы 28 ар тырмиз ни, Вылӥ лигаын 4-тӥ-6-тӥ интыын возиськиськомы. Финалын шудэмъёс пӧлысь тросэз (8 мурт) егитъёс луо, таӵе финалъёсын нырысьсэ шудӥзы. Дырызлэсь вазь вормон басьтыны дасяськем мылкыдзы но шудыны люкетӥз на. Судьяослэн но куд-ог решениосынызы соглаш ӧвӧл.

Краснодарысь нылкышно футболэз азинтон вылысь 2-тӥ арзэ ни кун ласянь нокыӵе юрттэт уг вуы. Но нылъёс уг чигисько. Кызьы вераз тренерзы, азьланяз но югдур ӧз тупатскы ке, Россилэн чемпионатаз но кубок понна нюръяськоназ 2-3 командаос сяна уз кыле.

Краснодарысь нылъёслы люкетӥз на куазь, лымшор палан та дыре но 10 градус шуныт возиське. Со понна кезьытлы дышемын Пермьысь нылъёс, серекъяса веразы, лымы, пе, вормон басьтыны юрттӥз.

— Россилэн кубокез понна нюръяськонын тӥ кужмоез луиськоды, вылӥегес ӝутскыны дыр вуэмын ӧвӧл на-а?

— Удалтонлыкмы уг тырмы на, — шуэ «Звезда-2005» командалэн валтӥсь тренерез Елена Суслова. — Туэ но тани чемпионъёслэн лигаязы йыгаськылӥмы, милемлы шедиз Англиысь «Манчестер Сити» команда. Европаын мукет сямен шудо, нырысь пумиськонын ик келямы. Та вакытэ янгышъёсмы бордын ужаськомы.

Та кык командаос, ваче шудэм сяна, суббота нуналэ шаерысьтымы футболъя нылпи школаосын мастер-классъёс ортчытӥзы. Малпасько, бадӟым ӵошатскон Ижын ортчем бере футболэн тунсыкъяськисьёслэн лыдзы йылоз.

Валентина Емельянова

Удмурт Дунне
By Удмурт Дунне 8 ноября, 2016 10:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<