Усто чуръёс дунъямын

Удмурт Дунне
By Удмурт Дунне 9 ноября, 2016 09:45

Та нуналъёсы тодмо луизы туэ ар понна Удмурт Республикалэн Правительствоезлэн литература удысын премиеныз пусъем писательёс.

Элькунамы та премиез висъяны кутскизы 4 ар талэсь азьло шаерысьтымы литератураез азинтон вылысь. Нимысьтыз комиссия эскере тужгес ӟеч произведениосты 4 номинацияя: «Тужгес ӟеч литературно-художественной произведение», «Тужгес ӟеч поэтической произведение», «Драмая тужгес ӟеч произведение» но «Нылпиослы чаклам тужгес ӟеч произведение». Комиссие пыро культура, литература удысысь гажамон адямиос.

Туэ конкурсэ дэмламын вал 13 произведение ӟуч но удмурт кылъёсын. Паймоно кадь: драматургияя номинацие ӧз вуы одӥг уж но. Та возьматэ, пьеса гожъян борды писательёс уг басьтӥсько. Драматурглэн ныпъетэз укыр секыт потэ, лэся. Соин ик туэ 2 премия сётэмын вал кылбурет понна. Озьы туэ Правительстволэн литература удысын премиезлэн лауреатъёсыз луизы:

— Сергеев Вячеслав Витальевич (веросъёсын «Нить» но «Кам вылын» книгаосыз понна);

— Мирошниченко Владимир Алексеевич (кылбуръёсын «Нить непростая живая судьбы» бичетэз понна);

— Михайлов Владимир Пантелеевич (кылбурен гожтэм «Ватка палась Ваняос» серемес бичетэз понна);

— Бадретдинов Ульфат Шайхутдинович (нылпиослы «Вероника плюс» повестез понна).

Секыт-а вал устооссэ бырйыны? Кыӵе шугъяськонъёсын пумиськоно луиз комиссия? Та юанъёсын ми вазиськимы комиссилэн ёзчиезлы, литературоведлы Татьяна Зайцевалы.

zajjceva

Литературовед Татьяна Зайцева

— Нырысь ик, мон шумпотӥсько, Удмурт Правительство литературалы саклык висъя но асьме гожъясьёслы сыӵе бадӟым премия басьтыны луонлык сётэ шуыса. Но монэ шугъяськытэ: малы ке асьсэос гожъясьёс произведениоссэс конкурсэ келяны уг дырто. Яке кыӵе ке аре сёто, конкурс пыр уг пото но, мылкыдзы куашка. Озьы луыны кулэ ӧвӧл. Нош но нош пыриськоно, выль произведениос гожтоно. Чаклано ке, асьмелэн республикаямы гожъяськисьёс трос. Соин ик конкурс но бадӟым луыны кулэ. Мед вормозы устоосыз пӧлысь устоосыз. Туэ лауреатъёсты учконо ке, мон шумпотӥсько Вячеслав Ар-Серги понна. Со мастер. Со кадь рос-прос гожъяськисьмы асьмелэн али ӧвӧл, шуыны луоз. Нылпи литератураез чаклано ке, гожъясьёсмы воксё ӧжыт. Нош Ульфат Бадретдиновлэн нимтулыз но ужъёсыз кемалась тодмо.

Зэм, мон удмурт литература азе бадӟымесь куронъёс пуктӥсько, мынам эшшо но кужмогес удмурт произведениосты лыдӟеме потэ. Но ӵапак та премия ик мед юрттысал тунсыко произведениосты кылдытыны. Малпасько, азьланяз та уж вырӟоз, угось Нациосын ужан политикая министерство кылем арын ялӥз вал нылпиослы выль произведениос кылдытонъя конкурс. Отчы сомында тунсыко ужъёс вуизы! Совето вакытъёсы но гожъяськисьёслэсь мылкыдзэс ӝутыны юртто вал литература удысысь премиос: комсомоллэн премиез, Ф. Васильевлэн премиез. Малпасько, со вакытысь опытэз али но лыдэ басьтоно, — шуэ Татьяна Ивановна.

Правительстволэн литературая премиез одӥг адямилы 5 арлы одӥг пол гинэ сётӥськыны быгатэ. Премилэн быдӟалаез: быдэн 50 сюрс манет.

Елена Миннигараева

 

 

 

Удмурт Дунне
By Удмурт Дунне 9 ноября, 2016 09:45