Спорт сузьет: Адвокатъёслэн пичи футболъя чемпионатсы, куасэн бызьылонын тол сезонлы дасяськон…

Удмурт Дунне
By Удмурт Дунне 3 ноября, 2016 12:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куасэн бызьылон

Нырысетӥ этапе 2 кузя    

Россиысь куасэн бызьылӥсьёс тол сезонлы Австриын дасясько, ӝоген соос Италие выжозы.

Россиысь куасэн бызьылонъя воргоронъёслэн командаенызы кивалтэ Шарканысь Олег Перевозчиков. Та нуналъёсы шараямын дуннеысь куасэн бызьылӥсьёслэн кубок понна нюръяськозы нырысетӥ люкетаз мынӥсьёслэн нимъёссы. 6 спортсмен пӧлы шедемын: Шарканысь Максим Вылегжанин но Можгаысь Дмитрий Япаров. Пусйыны кулэ, кубок понна нюръяськон кутскоз 26-тӥ-27-тӥ ноябре Финляндиын. Спортсменъёс спринт но классика амалъёсъя бызьылозы.

Капчи атлетика

Арлыд бызьылыны уг люкеты

22-тӥ октябре Глазов городын ортчиз пыдын бызьылонъя 35-тӥ ӵошатскон, озьы буре вайизы кышкасьтэм бортпроводницаез Надежда Курченокез.

Арлы быдэ ортчылӥсь ӵошатсконэ 350 пала спортсменъёс люкаськизы. Удмуртиысь сяна, куное вуылӥзы Киров но Пермь улосъёсысь спортэз яратӥсьёс. Городысь Киров ульча спортсменъёсын тырмемын вал. Мылкыд карисьёс 2, 4, 10 иськемез ортчизы. Ас ёзо эшъёссы пӧлын вормисе потӥзы Анастасия Урсегова но Ксения Колпакова (Глазов ёрос), Екатерина Катарина (Эгра ёрос), Андрей Трофимов (Эгра ёрос), Олег Баженов (Кез), Виталий Вершинин но Кирилл Иванов (Кез ёрос).

Пусъёно на, та нуналэ стартэ потэмъёс пӧлысь тужгес бадӟымезлы 81 арес вал. Киров улосысь вуэм Николай Суворов 72 аресаз гинэ спортэн эшъяськыны кутскем.

Пичи футбол

Кужмо адвокатъёс

Йошкар-Ола городын ортчиз Россиысь адвокатъёслэн пичи футболэн шудонъя чемпионатсы.

Ӵошатсконэ 24 улосъёсысь командаос люкаськизы. Удмуртиысь адвокатъёслэн командазы кыкетӥ арзэ зарни медаль басьтӥз. Финалын Башкортостанысь командаен пумиськылӥз но 6:0 лыдын вормиз. Устоеныз шудӥсен лыдъямын Ижысь Ильдар Шакирзянов. Ижысь кык ар бӧрсьысь бӧрсе вормизы бере, Россиысь адвокатъёслэсь пичи футболэн шудонъя чемпионатсэс 2017-тӥ арын ортчыны чакламын, командамы ӧтемын Европаысь юристъёслэн футболэн шудонъя чемпионатазы.

Бокс

Возьытэ ӧз уськытэ

Ижысь спортъя «Металлист» комплексын боксъя «Забияка» ӵошатскон ортчиз.

Вожвылъяськонэ пыриськизы 16-17 аресъем 70 пала пиос. Удмуртиысь сяна, вал на Нефтекамск, Киров, Челябинск, Пермь, Златоуст, Йошкал-Ола но Чайковской городъёсысь егит спортсменъёс. Вормисьёс пӧлын тросгес куноос вал ке но, шаерысьтымы пиос но возьытэ ӧз уськытэ. 11 финал пӧлысь 5-яз Удмуртиысь пиос вожвылъяськизы. Зарни медальёс басьтӥзы Эдуард Иванов, Ильдар Касимов, Максим Пастухов, азвесь шедиз Ижысь Оганес Снхчанлы, Кирилл Пономарёвлы но Уваысь Кирилл Карелинлы.

Дасяз Валентина Емельянова

 

Удмурт Дунне
By Удмурт Дунне 3 ноября, 2016 12:01