Пӧзиськом-а ми мультикультурализм пуртыын?

Удмурт Дунне
By Удмурт Дунне Ноябрь 29, 2016 16:33
multiculturalism

Удмурт культура дунне культураен валче азинске

Туала удмурт культуралэн азинскемез шоры учкисько но валасько: со, пичи вамышъёсын ке но, азинске дунне культураен валче. Ми пӧзиськом мультикультурализм пуртыын?

 

Зарезьёс люко

Нырысь ик, мар меда со мультикультурализм? Кызьы пусъё тодосчиос, со одӥг интыын (шаерын) пӧртэм культураослэн валче улэм-вылэмзы, азинскемзы но, валамон, сураськемзы. Озьы кылдэ трос культураосын пространство. Нырысьсэ та малпан чузъяськиз 1961-тӥ арын Канадаын, нош 10 ар ортчыса, татысь политикъёс шараязы ни: ми гажаны кулэ вань калыкъёсты, озьыен, асьме дорын улӥсь вань калыкъёслэсь культураоссэс огкадь азинтыны кулэ. Берлогес Канадалэсь адӟем каризы США-ын но. Татын, пе, быдэс дуннеысь тужгес трос лыктэм калыкъёс  уло, ӵапак соос ик кылдыто трос культураем интыез. Та процесс туж зол шӧдӥське литератураын. Мукет кунэ вуэм адями (автор) улыны кутске солы тодмотэм культураын. Ӵемысь со ыштэ аслаз вордскем палъёсыныз, матысь адямиосыныз герӟетсэ. Мурт интыын ассэ утчаса, йыроме. Дуннеез валаны турттыса, автор дневник нуыны кутске. Соин та ӧрын гожъям книгаос ӵемысь автобиографиос луо.

Россиын югдур мукетгес. Ми дорын выжыяськемын 190-лэсь ятыр калыкъёс, соос татын кемалась уло ни бере, асьсэ музъем вылазы асьсэзыз кузёен лыдъяло. Культуразэс асьсэос азинто, нош сурало ӵемысь ӟученыз гинэ.  Тросэз тодосчиос пусъё: мультикультурализм Россие ӧс усьтыны уз быгаты. Уго милям татын валтћсь интыын — ӟуч культура, нош выжы калыкъёс со вӧзын ас понназы уло. Но лыдъян-чотанысь адӟиськом, выжы калыкъёс арысь аре кулэсмо, нош мукет кунъёсысь вуэм калыкъёслэн лыдзы будэ. Кылсярысь, удмуртъёс, 2002-тӥ арысен кутскыса, 2010-тӥ арозь 13 процентлы кулэсмиллям, нош англичанинъёс  79 процентлы йылӥллям.

 

Интернет огазея

Озьы ке но, кулэ меда та явлениез учкыны политика ласянь гинэ? Котькуд адямилы, соин валче быдэс калыклы азинскыны тросгес луонлык сёто туала амалъёс, вотэс. Интернет сура вань культураосты. Солы луыса ик удмурт культура тунсыко луэ мукет калыкъёслы но. Тӥни кытын улэ зэмос мультикультурализм!

Кылсярысь, Ижысь Александра Гладыш суреда удмурт дэремен нылъёсты аниме амалэн но ужъёссэ блогаз поттэ. Эстониысь Муш Нади Фейсбукын эстон кылын гожъя удмурт культура, удмурт ужрадъёс сярысь. Дарали Лели пыриське бигер-чуваш фестивальёсы, кылем арын со эшъёсыныз ӵош Чебоксарыын удмурт-чуваш культураослы сӥзем ужрад ортчытћз. Silent Woo Goore группа удмурт кылын кырӟа выжы калыкъёслэн Евровидениязы. Культураосты герӟась проектъёсыз вань тодмо культреггерлэн Павел Поздеевлэн но: удмурт дискотекаос, кытын чузъясько пӧртэм кылъёсын кырӟанъёс. Вань та проектъёсты тодэ вайыкум, йырам юан чилектӥз: этнофутуризм ӧвӧл меда мультикультурализмлэн оглюкетэз? Этнофутуризм но вашкала калык культураез воштэ, туала каре.

Озьыен, Интернет асьмелэсь культурамес поттэ паськыт бусые, кытын огвакытэ уло пӧртэм культураос. Али соос ог-огенызы тодматско, кусып тупатыны выро. Азьланяз возьма мукет вамыш — сураськон. Али сурасько культура но сое азинтонъя амалъёс: удмурт культура уже кутэ туала амалъёсты, азьветлӥсьёс дунне дизайнэн, литератураен, оглом, искусствоен тодматско.  азьланяз сураськозы культурной кодъёс, одӥг луоз пӧртэм калыкъёслэн малпаськон ӧрзы.

Мон гуртэ песянае доры бертӥсько ке, шӧдӥсько, макем со чебер, тунсыко, афоризмъёсты кутыса, вераське удмурт кылын. Мон озьы уг быгатӥськы ни, мон будэмын ӟуч книгаос вылын, пыӵатэмын ӟуч культураез. Со вакытэ ик мон дышетэмын немец кылэз, но со культура пӧлын уг улӥськы, соин уг вераськиськы бере, уг вала немецлэсь малпаськон ӧрзэ. Мон пушкын удмурт но немец культураос йӧтско, но уг сурасько. Немец культура мед пыџалоз шуыса, кӧня ке аръёс ӵоже улоно Германиын. Бускель культуралэсь мурт луэмзэ ӟеч шӧдӥськом Татарстанысь Огырчи базарын, кытын вашкала дырысен огазе люкасько удмуртъёс, ӟучъёс, поръёс но бигеръёс. Соос ог-огзэсты валало ке но, гозызэс котьку ас палазы кыско.

Но гадь тросаз шоканы кутскоз-а меда куке но мультикультурализм? Культураослы сураськыны уго трос дауръёс кулэ. Тодосчиос шуо ни: дунне вылын одӥг гинэ культура ноку уз луы. Уго, котьма кар, улон но, Интернет но азинско, одӥг кыл вылэ пыкиськыса, дуннеын — англи, Россиын — ӟуч. Но пыкиське-а Интернет англи но ӟуч культураос вылэ? Уг! Интернет кутэ кылэз гинэ. Кулэ-а милемлы огъя сюрес кузя мыныны, огъя культуралэн омыреныз шоканы? Городысь удмурт дискотекае удмурт дэремен гинэ мыныса, тон отын эксэй кышно кадь луиськод ке.

Малпаськись Орина

Туспуктэм басьтэмын Интернетысь

 

 

 

Удмурт Дунне
By Удмурт Дунне Ноябрь 29, 2016 16:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<