Куасэз но, конькиез но серметалоз

Удмурт Дунне
By Удмурт Дунне 2 ноября, 2016 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
pavlova

Л. Павлова кивалтэ Воткаысь культурая «Дэмен» огазеяськонэн.

Мыным туж удалтӥз эшен. Лидия Павловаен ми вордӥськемын Можга ёросысь Бадӟым Кибья черкогуртын (Сьӧрсакын).

Эшелэн семьяяз 5 пинал вал, Лида — шумэс пыдэсэз. Атаез сапег гындылӥз.  Доразы мунчоын кадь пӧсь вал,  бус пыртӥ кадь адӟисько Колягайлэсь пӧсям вузэ ӵушылыса ӝӧк котырын ужамзэ. Мар вал, пе, дышетсконтэм со ужлы, али жаляса шуэ Лида. Анайзы но, Матрон апай, туж шӧртчи вал. Котькыӵе ужлы киыз пыриз, нылъёссэ но дышетӥз. Лида но вуриське, керттӥське, пужыятӥське, чильпаське. Гуртаз но, уж дураз но киужъёсыз чеберто пуконъёсыз, миндэръёсыз, шобретъёсыз. Бадӟым мунёез но удмурт дэремен, айшетэн, кышетэн, уксё тӥрлыкен, керттэм пыдвылъёсын чебермамын. Со мунёез бадӟым стажен артистка выллем: кыӵе гинэ праздникъёсы, ужрадъёсы ӧз вуылы ни.

Песянай-ӵужанай пичи нунокъёсызлы но удмурт шӧм пыӵатыны выре шудонъёс пыр. Коля кузпалэныз 3 пинал вордӥзы-будэтӥзы. Али 5  нунокъёссы шумпотто ни. Коля картэз Пичи Пурга палъёсысь. Отын соослэн пересьёссылэсь кылем юртсы сылэ. Но таӵе бадӟым семьялы корка но, пе, бадӟымгес кулэ. Соин ик, Воткаысь, Ижкарысь ваньзы ӵош люкаськыса, веме порма маньдарто корка ӝутыны.

Ужез сярысь ке верано, Лидия Николаевна, пенсие потыса но, шутэтскыны уг дырты.  Казаньысь связья техникумез быдтыса, 37 арзэ ужа ини Воткаысь почтаын. Почтаын ужасьёслэн куасэн бызьылонъя ӵошатсконъёсазы котькуд ар пыриське. 2015-тӥ арын Воткаын почта удысын ужасьёслэн элькун спартакиадазы ортчиз, Л. Павлова «Тюрагай» ансамбльысь эшъёсыныз удмурт кырӟанэн пумитазы куноосты.

Котькуд ар Воткаын ортче «Бадӟым йӧ» ужрад. Лидия Николаевна нош ик татын. Нунокеныз ӵош конькиен бызьылонъёсы пыриське, ас пӧрам такмакъёсыныз калыкез шулдыртэ. 2013-тӥ арын городысьтымы музыкально-педагогической колледжысь дышетӥсен Сергей Трофимовен ӵош, быдӟым крезьлы сӥзьыса, пиналъёслы кырӟан гожтӥзы.

Лидия Николаевна 4 ар кивалтэ ини Воткаысь культурая «Дэмен» огазеяськонэн.  «Удмурт Кенеш» огазеяськонлэн ёзэныз кыӵе гинэ ужрадъёсы уг ӝуткало милемыз. Ижысь «Тюрагай» ансамблен но 2 пол пумиськимы ини. 2014-тӥ арын «Удмурт дунне» газетысь «Сюан гуръёс» конкурсэ но Тамара Трефиловаен пыриськизы, вашкала сям-йылолъёсты тодамы вайытӥзы. Ма, вань ужъёссэ вераса но уд быдты. Трос солэн грамотаосыз но таукаронъёсыз.

Котькыӵе секыт дыръёсаз эше сюлэмзэ кырӟанъёсын небӟытэ. Дас арлэсь ятыр ини ветлэ «Тюрагай» фольклор ансамбле.

Зоя Николаева,

Воткаысь «Удмурт Кенеш» огазеяськонлэн азьвыл кивалтӥсез

 

Удмурт Дунне
By Удмурт Дунне 2 ноября, 2016 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<