Котькуд корка пыро

Удмурт Дунне
By Удмурт Дунне 4 ноября, 2016 15:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Олег Шибанов: Сюлмаськи, компания уногес уксё поттыны мед быгатоз шуыса.

1956-тӥ арын 4-тӥ ноябре Удмуртиын нырысьсэ эфире потӥз шаерамы лэсьтэм передача. Телевиденилэн зарни вакытаз, 1986-тӥ-1996-тӥ аръёсы, «Удмуртия» ГТРК-лэн директорез вал Олег Шибанов.

— Телевиденилэсь 60 аръем юбилейзэ аслэсьтым бадӟым праздникме кадь пумитасько, — шуэ Олег Корнилович. — 1986-тӥ арын Министръёслэн Советсы но партилэн обкомез ӵектэмъя радиоез но телевидениез азинтыны шумпотыса басьтӥськи. Дышетскемея инженер, философия наукаосъя кандидат. Малпай: технической ужасьёсын но, творческой адямиосын но огкыл шедьто. Отӥяз тодон-валанме эшшо но будэтэме потӥз, маркетинг специальностья диплом басьтӥ. Сюлмаськи, компания уногес уксё поттыны мед быгатоз шуыса. Москваысь кивалтӥсьёсмы дорысь но ӧй поталля. Меӵак юаллязы: нош ик маке курыны лыктӥд-а? Нош кызьы уд куры? Калыклы кельшымон ӟеч передачаос лэсьтэм потэ ук, нош со понна, кадръёс сяна, йӧнала аппаратура кулэ.

Куддыр кескич но кариськоно луылӥз. 1990-тӥ аръёсы шаерамы но солэн палэназ интыяськем удмурт гуртъёсын телерадиовещаниез азинтон вылысь, Москваысь уксё курем сяна, асьме Правительствое но вазиським. Правительстволэн Тӧроез Павел Вершинин югдурез валаз. Кутэмын вал нимысьтыз постановление, бадӟым коньдон вуиз. Аппаратура басьтыса но, оглюкетэз кылиз. Соку коллегия люкай. Шуисько: кылем уксёен ужасьёслы квартираос басьтом шат? Со но азинтӥськон, улон условиосты умоятон ук. Соку дорамы 410 адями ужаз. Таос пӧлысь ог 50-эз квартиралы черодын сылӥзы. Таӵе ӵектонлы ваньзы дурбасьтӥзы. Нош калык кыӵе шумпотӥз! Со аре ми 12 квартира басьтыны быгатӥмы, 21-езлэсь улон-вылонзэ умоятыны пӧрмытӥм. Солэсь азьло араз 1-2 квартира сяна басьтыны ӧм быгатылэ вал.

— Мар тужгес секытэн сётӥськиз?

— 1991-тӥ арозь телецентрысь технической служба ас кожаз ужалляз, творческой адямиос — асьсэ коже. Журналистъёслэн огазеяськемзы потэ. Нош техническойёс кыӵак пумит: асьмемын кивалтыны ум сётэ, шуылӥзы. Марлэсь кышкаськоды, нокинэ ӝож ум каре, шуылӥ. Быдэс ар ӵоже кусыпъёссэс волятыны выри. Чиданлы пум понӥз одӥг учыр. Огпол журналист записе ӧтиз Дальний Востокысь ветеранэз. Гожтыны кутске, нош куно куалекъяменыз керӟегъяське. Выльысь гожтыны ӧдъя — нош уг пӧрмы. Куинетӥзэ гожтыкуз, ветеранлэн кылыз сэраз гинэ, ваньмыз синмаськымон вольыт мынэ кадь ини, но шуак тыл кысэ. Мар та? Инженер шуэм: мынам сиськон дыры вуиз. Со запись шорын тылэз кысэм но кошкем. Журналист мон доры синвуаськыса вуэ. Мар карод на: инженерлэсь сиськемзэ возьмамы. Но соку телецентрлэн директореныз кенешим: тазьы ужаны уг яра, ойдо огазеяськом. Соглаш луиз. Нокинэ ужысь ӧм кулэстэ, уждунзэ нокин ӧз ышты. Отӥяз уно улосъёсысь телевизионщикъёс ӵош ужаммес учкыны вуылӥзы. Милесьтым адӟем карыса огазеяськисьёс уно вал.

— Кивалтӥсь ӟеч гинэ луыны уг быгаты…

— Со ласянь мыным удалтӥз. Мон тырши калыкез вӧсь карытэк ужаны. Оло, ачим жыныё удмурт луэменым, анай кылын передачаосты паськытатон сярысь сюлмаськыны кутски. Кылсярысь, радиоын удмурт передачаос ог 60 процентсэ эфирез басьтӥзы, телевидениын — 25 процентсэ. Озьы «34-тӥ канал» кылдытӥм, радиоын — «Ингур».

Кивалтӥсьлэн валтӥсь ужез — творческой мылкыдэз ӝутон. Соин ик ужась калыклэсь тодон-валанзэ будэтыны кутскимы. Пайдаез луиз ик. Вещанилэн ӟечлыкез йылӥз. Пӧртэм фестивальёсын асьме передачаос, журналистъёс но операторъёс вылӥ дунъет басьяны ӧдъязы. Удмурт шаер но калык сярысь Россиын улӥсьёс тодыны-кылыны кутскизы.

2000-тӥ аръёсы милесьтым передачаосмес кулэстыны кутскизы, мукет улосъёсысь передачаосты сямен ик. Со вакытэ ужамысь дугдӥз Радиолэн юртэз. Ваньмыз та телерадиожурналистика понна бадӟым шуккет луиз. Озьы ужысь кошкизы тужгес кужмоосыз, кылсярысь, Марина Томшич, Георгий Грязев но мукетъёсыз. Кин тодэ, мар луысал азьланяз. Но тау шуыны кулэ Удмуртиысь Правительстволы: кылдытӥзы «Удмуртия» ТРК («Мынам Удмуртие» шуо на). Озьы шаерамы али ужа кык телерадиокомпания: «Удмуртия» ГТРК но «Удмуртия» ТРК. Асьсэ куспын вожвылъясько ик. Но учкись одӥг. Али вань кужымез пононо «Удмуртия» ГТРК-лэсь кылем архивзэ уже кутон пумысен, соин кык компаниос огкадь ужаны мед быгатозы. ГТРК али федеральной каналлэн оглюкетэныз лыдъяське. Но со Удмуртиысь калык понна лэсьтэмын. Туннэ телевидениысь журналистъёсты котькуд гуртын тодмало, кыӵе но сюлмаськонъёсын доразы уг вазисько. Та туж вылӥ дунъет.

— Мар сярысь жаляськоды?

— Ӧжыт ужай шуыса. Шаерысьтымы вылӥ кивалтӥсьёсын улон шоры учконъёсмы тупамтэен, ужысь кошконо луи. Котьма ке но тодэ ваёнъёсты калыклы вуттэм потӥз. Кылем ар пумын «Удмуртия» издательствоын «Радиовещание и телевидение Удмуртии» туспуктэмъёсын книга поттыны быгатӥм.

Елена Сараматова

 

Удмурт Дунне
By Удмурт Дунне 4 ноября, 2016 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<