Кидэ уд миськы — ӵужектод

Удмурт Дунне
By Удмурт Дунне 18 ноября, 2016 08:56

080790,вода,кранЭлькунысьтымы 200-лэсь ятыр адями ӵужектонэн черлаз ни. Со пӧлысь ӝыныез — сентябрь-октябрь толэзьёсы. Кытысь потэ та висён, кызьы солэсь утиськоно? Та юанъёсын вазиським Паласькись висёнъёсъя элькун больницаысь профилактикая ёзэн кивалтӥсьлы Ираида Бастриковалы.

— Ӵужектонэн (гепатит А) висисьёс элькунамы берло аръёсы одӥг-кык гинэ пумиськылӥзы вал. Нош али соос вань Дэри, Шаркан, Якшур-Бӧдья ёросъёсын, Глазов, Можга, Вотка городъёсын. Уката трос — Ижын, — шуиз Ираида Ивановна. — Кызьы шуак сомында мурт койкае шедиз? Малпан кылдэ, инфекция мукет улосъёсысь вуиз шуыса. Угось ву эскеремын — вирус шедьтымтэ.

Югдур капчи ӧвӧл. Угось адямиос йӧнатэмын ке но, висёнзэс мукетъёсызлы паланы быгатӥзы. Вирус мугорын 50 нуналозь ватӥськыса улыны быгатэ. Соин ик эпидемилэсь утиськон вылысь Тазалыкез утёнъя министерство ӵектӥз: сыӵе районъёсын, кытын шараямын черламъёс, покчи классъёсын дышетскись пиналъёслы прививка пуктылоно.

Ӵужектонэн висё мӧйыос но, нылпиос но. Ӵемгес — пиналъёс. Мукетъёсыз сюл висёнъёс сямен ик, таиз но чер уката ӵем вӧлме миськымтэ киос, бакча емышъёс, кырсь ву пыр. Соин ик инфекциез кырмыны луэ котьку но котькытын. Но тросгес висисьёс луо тулысысен сӥзьылозь — калык сад-бакчаяз ужа, инкуазе шутэтскыны пота, нош чылкытлык сярысь ӵемысь вунэтэ. Черланы озьы ик туж капчи висись мурт бордысь. Уката но — висьыны кутскемез бере нырысетӥ нуналъёсаз. Нош таӵе дыръя шуак валаны но уг луы на, со борды ӵужектон кырмиськем шуыса.

— Кызьы тодӥсько, ӵужектонэз секыт ӧвӧл пыэдэн сураны?

— Зэмзэ но, куд-огез нырысь ик малпа, кынманы шедиз, дыр, шуыса. Угось ӵужектон дыръя но адямилэн мугорыз ӟырда, нырыз тыре, кызонэз пӧсьтэ, сӥльбыгытъёсыз вӧсь луо.

Эшшо: ӵужектонэн черламъёс пӧлысь ог 70 процентэзлэн кузы тӧдьы кыле. Соин ик кулэсь, синъёслэсь ӵужектэмзэс возьмаса улоно ӧвӧл, эмъясьёс дӥне ӝегатскытэк вазиськоно.

Дыраз йӧнатӥськыны кутскемын ке, висёнэз вормыны луэ. Бен, муслы та вакытэ капчи ик уг йӧты — вирус сое шукке.

— Мар кароно, висён медаз кырмиськы шуыса?

— Чаклано чылкытлыкез: урамысь пырем бере  но, ӝќк сьӧры пуксён азьын но киосты одно миськоно майталэн;

— колодчаысь, кран улысь быректымтэ вуэз юыны уг яра, угось вирус быре, ог 5 минут быректыса гинэ;

— умой-умой миськоно бакча емышъёсты, соосты юнме азьын вуз карисьёслэсь басьтыны уг яра;

— пӧраськонэ кутоно ӧвӧл кема кыллем сиёнъёсты, уката но ӝог сӧриськисьёссэ. Дась сиёнэз но ыль чорыгез, сӥлез нимаз возёно, юдылоно-вандылоно нимаз пуртэн, нимаз вӧш вылын.

— Висёнлэсь утиськыны тужгес ӟеч амал — прививка пуктон?

— Котькыӵе висёнэз алыса умойгес. Вакцина пуктыны уката дэмласал туристъёслы, пӧртэм шаеръёсы вуылыны яратӥсьёслы, уката но лымшор пал  кунъёсты яратӥсьёслы — отын висён паськыт вӧлмемын.

Прививка пуктэмез бере адями ог 10-15 арзэ ганяк улыны быгатоз — тамындалы иммунитет кылдэ. Дыр ортчемъя эскериськыны кулэ ни, кылемын на мугорын вируслы пумит антителоос.

Вакцинаос кӧня ке пӧртэм, вань асьме дорын но, кунгож сьӧрын но дасямъёсыз. Шоро-куспо дунзы ог 1 сюрс манет котыр. Пуктоно 2 пол, 6-12 толэзь вис карыса.

— Одӥг пол ӵужектонэн висем мурт выльысь черла на-а?

— Уг ни, солэн быдэс улонэзлы иммунитетэз кылдэ.

Элина Кумачёва

А. Горбунов

 

 

Удмурт Дунне
By Удмурт Дунне 18 ноября, 2016 08:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<