Ёросъёсысь иворъёс: Глазовын — Чупчи чеберай, Дэриын — квартира усьтонъёс, Можгалан — чиптэм-чаптэм ышонъёс

Удмурт Дунне
By Удмурт Дунне Ноябрь 7, 2016 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Яр

Лумбыт  кино учкизы

Элькунмылэн нуналэзлы сӥзьыса, Яр посёлокысь «Юбилейный» дворецын бадӟым концерт ортчиз.

Отчы пыриськизы каргуртысь но гуртъёсысь ваньмыз сямен кырӟась но эктӥсь коллективъёс. Ӝытбыт чузъяськизы ёросын улӥсь пӧртэм выжы калыкъёслэн кырӟанъёссы, кылбуръёссы.

Концерт бере кутскиз Кинолэн арезлы сӥзем ужрад. Туж тунсыко ортчиз: отын ик «Поле чудес» шудон но, мастер-классъёс но радъямын вал. Арлыдоослы но нылпиослы лумбыт возьматӥзы кино. Нимысьтыз дасямын вал удмурт коркалы сӥзем сэрег. Со сяна, калык мыло-кыдо дышетскиз эктыны.

Глазов

Чупчи чеберай бырйизы

21-тӥ коньывуонэ Кожиль культура юртын «Чеберай-2016» вожвылъяськон ортчиз.

Кызьы вера Глазовысь культурая но туризмъя отделысь методист Сергей Орлов, валлё аръёсы туж ӧжыт нылашъёс та вожвылъяськонэ пыриськизы вал, нош туэ соослэн лыдзы шӧдскымон йылӥз. Таиз вожвылъяськон пӧсь но ӟырдыт ортчиз. Асьсэлэсь кужымзэс эскеризы городын но гуртъёсын улӥсь нылашъёс. Ужрадэ мыло-кыдо пыриськизы В. Короленко нимо пединститутысь но медтехникумысь студентъёс. Жюриын пукисьёс чеберъёсыз пӧлысь чеберъёссэ бырйизы. «Чупчи ныл Чеберай-2016» нимез басьтӥз Понино черкогуртысь библиотекарь Екатерина Урсегова. Нош «Мусокай» луиз медтехникумын дышетскись, Яр ёросысь Ворца гуртын вордскем Юлия Вахрушева. Со туж чылкыт, вольыт вераське анай кылыныз.

Шаркан

 Эмъясьёс дышетскизы

Кылем толэзь пумын Шарканэ потазы Лек пыктосэн нюръяськонъя элькун больницаын ужасьёс.

Специалистъёс, кыклы люкиськыса, ужазы: Шаркан черкогуртын — гинекологъёс, нош Зар. Вишур гуртын — маммологъёс. Тазалыксэс эскерыны мылкыд карисьёс лачак люкаськизы. Со сяна, Зар. Вишур гуртэ люкаськылӥзы ёросысь вань ФАП-ёсын ужась фельдшеръёс. Ижысь специалистъёс гурт эмъясьёс понна нимысьтыз дышетскон но мастер-классъёс радъязы.

Дэри

 Усьтонъёс кузьмамын

Ёросысь 6 муртлы выль квартираослэсь усьтонзэс сётӥзы.

Кызьы тодмо, анай-атайтэк кылем, нылпи юртъёсын будэм пиналъёслы быдэ вуэмзы бере улон инты сётӥськыны кулэ. Тросэз ёрос кивалтӥсьёс та куронэз пелязы уг поно. 2015-тӥ арын суд косэмъя улон интыос висъяно вал Дэри ёросысь 6 сирота нылпиослы. Ар ортчыса, судлэн куронэз быдэстэмын. Хохрякиысь одӥг комнатаен квартираослэсь усьтонъёссэс басьтӥзы 6 егитъёс.

 Пичи Пурга

Сюрессы капчи мед луоз

Туэ сӥзьыл Пичи Пурга ёросысь 40 пиос армие кошкозы. Соослы сӥзьыса, ёрос администрациын ӝыт ортчиз.

Вуоно солдатъёс доры вуылӥз ёрослэн йырыз Светлана Колодкина. Со пусйиз:  пиосты армие басьтонъя Пичи Пурга ёрос  2 ар ӵоже нырысетӥ интыын. Пиослы ӟеч сюрес сӥзизы Депутатъёслэн ёрос Кенешенызы кивалтӥсь Василий Москвин, Пичи Пурга но Кияса ёросъёсъя военком Дмитрий Поздеев. Пиоссылы шунытэсь кылъёссэс веразы анай-атайёс но. Кырӟан-веранъёсын шулдыртӥзы культура юртын ужасьёс. «Пурга мылкыд» ансамбльын кырӟасьёс «Солдат келян» сям-йылолэз возьматӥзы. Та нуналэ ик пиос  ёросысь шаертодонъя музеен тодматскизы, Ялан ӝуась тыл доры сяська керттэт понӥзы.

Алнаш

Ширъязы, поръязы

Байтэрек культура юртын но библиотекаын ужасьёс, Элькунмылэн нуналэзлы сӥзьыса, доразы ӧтчазы  бускель Грак ёросысь «Эгра кенакъёс» ансамблез.

«Ширъялом, поръялом» ӝытэз усьтӥзы шаермы сярысь кырӟанъёсын но кылбуръёсын. Бӧрысь радъямын вал шаертодонъя визь сынанъёс но пӧртэм шудонъёс. Байтэрек гуртысь калык сяна, ужрадэ мыло-кыдо пыриськизы артысь Актэмыр но Ӟуння гуртъёсын улӥсьёс.

Элькунмылэн нуналэзлы сӥзьыса, Байтэрекысь культура юртын ужасьёс но библиотекарьёс быдэс арня ӵоже уж дуразы удмурт дэремъёсын ветлӥзы. Милесьтым, пе, тазьы выреммес мукет удысъёсын ужасьёс но мед адӟем карозы.

Можга

Чиптэм-чаптэм ышиз

Адями ышылон учыръёс, жаляса верано, ӵемысь луо.

Алигес гинэ таӵе учыр луиз вал Можга карын. Толэзь ортчыса, 37 аресъем ышем нылкышнолэсь шӧйзэ шедьтӥзы.

Нош али полициын ужасьёс 78 аресъем воргоронэз утчало. 3 нунал талэсь азьло Сибыын улӥсь воргорон 78 аресъем висись атайзэ но бускель пиосмуртэ Можга карысь больницае нуэм. Бускелез но ачиз больницае пыриллям, нош атаез, машинаысь потыса, чиптэм-чаптэм ышем.

Дасязы
Любовь Тихонова, Валентина Емельянова

 

 

 

 

 

 

Удмурт Дунне
By Удмурт Дунне Ноябрь 7, 2016 13:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<