Ижысь Андрей Смирнов Португалие вуылӥз

Удмурт Дунне
By Удмурт Дунне Ноябрь 29, 2016 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

14424700_1793816860907256_1618809402342621710_o Йӧскалык элькун библиотекалэн кунокуаяз ортчиз «Ижевский киноклублэн» кивалтӥсеныз Андрей Смирновен пумиськон. Со вераз, кызьы кутскиз дуннеез котыръяны но маин сое ас бордаз кыскиз Португалия.

— Мон ялан пачкасько вал Ижкарын, соин 11-тӥ классысен ик олокытчы но ветлӥсько ни. Ӵукна пуксисько Ижевск-Москва поездэ, ӝыт берен бертӥсько, — вера Андрей. — Поездъёс мыным изён инты луизы. Озьы мон Москваысен, уйин поездын изьыса, Питере но шонтыны быгатӥсько вал. Соку ваньмыз та туж дунтэм вал. Паспорт но кулэ ӧй вал. Билетлы гинэ черодъёсын часэн-часэн сылоно луылӥз.

25 аресказ Андрей телевизорысь адӟем ток-шоу, кытын Германиысь 3 песянайёс дуннеез котыръямзы сярысь веразы. Нош мон маин пӧртэм, малпам ас понназ Андрей но, уй куспын план лэсьтыса, шонтэм Италие (отын солэн тодмоез улэ вылэм). Со дырысен воргорон арлы быдэ пота Европае, туэ, кылсярысь, отын воксё ӝыны ар улӥз. Кытысь коньдон, юалоды тӥ? Европаын улыны дунтэмгес ай, пе, Ижын сярысь. Кылсярысь, кунокуаосы интые, со дугдылэ эшъёсыз доры. Таосты со шедьтэ каучсёрфинг интернет-сӧзнэт пыр. Европаын улӥсьёс тонэ кӧлыны но выдтозы, сюдозы но, тон соослы Россия я аслад улонэд сярысь маке тунсыкозэ верад ке. 2 ар талэсь азьло Андрей тросгес ветлыны кутскем пыдын, туэ Португалиетӥ 900 иськем пыдын ортчем.14566473_1796781053944170_2449035870692949134_o

Португалия интыяськемын Пиренейской полуостровын, огпалыз котыртэмын Атлантической зарезен, мукет палыз — Испаниен. Соин ик со Европалэсь нимаз улэ кадь. Андрейлэн сюресэз ортчиз океан дуртӥ Сантьяго-де-Компостела каре, кытын утиське дун-чылкыт Иаковлэн лысьӧмыз.

— Португалиын ваньмыз адями понна лэсьтэмын. Отын туж умой сюресъёссы — одӥг пол шедьтӥ 40 иськем кыстӥськись пулэсь лэсьтэм сюресэз (пу дуно ук!). Отысь калык тодэ чеберлыкез, вала, кыӵе буёлъёсты ог-огенызы герӟаны. Кылсярысь, коркаоссы лызэн но ӵужен буяллямын. Милям озьы уг каро, нош секыт-а, мар-а, 2 банка краска басьтыса, коркаез буяны? Чорыгасьёслэсь туж куанер 2-3 гуртъёссэс гинэ адӟи. Португалиын калык туж узыр уг улы ке но, соос уг йыркуръясько, сюлэмъёссы усьтэмын.

Ми дышемын, котькыӵе куак улын маке кышкытэз возьма шуыса. Но Андрей шуэ, Европаын оскымон калык улэ.

— Огпол гинэ валантэм учыре шеди. Пыри кафее но сиён кури. Кафелэн кузёез адӟиз ни, мон турист шуыса, кинлы ке жингыртӥз. Кӧня ке улыса, мон доры вуэ чебер дӥсяськем воргорон но шуэ, ойдо монэн ӵош, ми тонэ ческытгес но дунтэмгес сюдом. Ижын, валамон, мон ӧй мынысал. Но татын аслым шуи: малы бен уд? Озьы монэ вайизы кыӵе ке пансионатэ, сюдӥзы, душе пырыны лэзизы — жадем вылэ умой шутэтски. Пансионатлэн кузёосыз юромо утчало вылэм туристъёсты — интызэс, улэм-вылэмзэс адӟытыны, — вера Андрей.

Улонын оломар но луэ. Тужгес уродэз, дыр, сюрес вылын висьыны усьыны. Андрейлэн сумкаяз, телефон, воштӥськон носки но пыдкук, мисьтћськон арбериос, зонтик сяна, номыр ӧвӧл. Огпол, пе, лябӟи. Кыклы люкиськи кадь: лулы но мугоры. Лулы мугорылы шуиз: «Тон, Андрейлэн мугорыз, быгатӥськод, конечно, гань-гань кариськыны, висьыны усьыны, но сюресэз азьланьтыны аслыд ик кулэ луоз ук». Андрейлэн мугорыз висьыны дӥсьтымтэ.

— Дуннеын али туж урод югдур. Беженецъёсты ӧд пумиталлялэ-а? — залысь юан чузъяське.

— Зэм но-а дуннеын югдур урод? — пайме Андрей. — Мон телевизор уг учкиськы но уг тодӥськы…

Мария Векшина

 

Удмурт Дунне
By Удмурт Дунне Ноябрь 29, 2016 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<