Ижын выль ар вуоз 1-тӥ декабре

Удмурт Дунне
By Удмурт Дунне Ноябрь 11, 2016 12:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

065017,открытие елки,заяц,новый годИж город администрация Выль арлы дасяськыны кутскиз. Туэ та праздниклэсь матэктэмзэ калык шӧдоз вазьгес. Шоркар 1-тӥ декабрьлы шулдыртэмын луоз ини.

Вожвылъяськонъёс

Кылем арын сямен ик, туэ но Выль арлы сӥзем шулдыръяськонъёс ортчозы «Ӵошен шунытгес!» ӧтён улсын. Кивалтӥсьёслы но, Ижын улӥсьёслы но та малпан сыӵе кельшиз — берло 5 арзэ кутӥське ини. Озьы туэ но шоркарысь вань синпелетъёсты, калыко интыосты шулдыртозы керттэм арбериос, — вераз администрациысь культурая но туризмъя управленилэн кивалтӥсез Екатерина Коновалова.

Дышем сямъя ик ортчозы пӧртэм конкурсъёс но. Кылсярысь, «Ижлэн выль ар тылгизьыосыз». Отчы пыриськыны быгато городысь вань пичи но бадӟым огазеяськонъёс. Со понна 20-тӥ декабрёзь orpp@izh.ru электрон почтае куриськон ыстоно яке сое Пушкин ульчаысь 276-тӥ юртысь 418-тӥ кабинетэ пыртоно. Куриськон бордын одно ик луыны кулэ валэктон, кызьы огазеяськондэс чеберъяны малпаськоды.

Вормисьёсты быръёзы 3 номинацияя: «Выжыкыл азбар», «Выль ар сандык» но «Выль ар инсталляция». 1 огазеяськон 1 номинацие гинэ пыриськыны быгатэ. Валтӥсь курон — чеберъяку «Ӵошен шунытгес!» фестивальлэсь пуссэ возьматоно. Тужгес устооссэ быръёзы Ижын улӥсьёс. Куара сётыны луоз администрацилэн www.izh.ru сайтаз. Вормисьёслы кузьым — огазеяськон сярысь видеороликъёсты  город ульчаосын возьматон.

Мукетыз вожвылъяськон — «Тол выжыкыл». Керттоно Выль арлы, кинолы сӥзем шудонъёсты но, композициосты городысь ёрос администрациосы ваёно 9-тӥ декабрёзь. Конкурсэ пыриськыны быгатэ котькуд мылкыд карись. Но 1 адями 3-лэсь тросгес арбери вайыны кулэ ӧвӧл.

Та шудонъёсты волонтёръёс вузалозы Ижысь бадӟым магазинъёсын. Поттэм уксёзэс сётозы Ижысь 271 номеро нылпи садлы. Отчы ветло ляб лулсэро пиналъёс. Соослы дышетскыны аспӧртэм тӥрлык басьтозы.

Кылем арын «Тол выжыкылэ» 2 сюрс адями пыриськиз. 300 сюрс манетлэсь ятыр коньдон поттэмын. Со кошкиз 69 номеро нылпи садлы. Ветлыны-бызьылыны шугъяськись пичиос понна басьтэмын мугорез кыдатӥсь тренажёр.

Шулдыръяськонъёс

1-тӥ декабрьысен Ижысь бадӟым ульчаосты чильк-вальк пиштӥсь лампочкаос шулдыртозы. Шор площадьын вож кыз 9-тӥ декабре кылдоз. Но со котырын сӥё-дано шулдыръяськонъёс кутскозы 24-тӥ декабрьысен гинэ.

— Йӧ городок сяна, усьтӥськоз йӧ скульптураосын ульча. Йӧ шудонъёс чебер адскозы уйин но — бордазы светодиод лампочкаос дэмӟытомы. Та сяна, Шор площадьын кылдоз… кузьым. Кортлэсь лэсьтэм пӧртэм тылъёсын ворекъясь кузьым улын туспуксьыны туж усто луоз, — вераз Иж город йырлэн улон-вылонын юрттэт сётонъя воштӥсез Михаил Тарасов.

Выль ар шулдыръяськонъёслы элькун бюджетысь кошкоз 2 но ӝыны миллион манет.

Ольга Корепанова

 

 

Удмурт Дунне
By Удмурт Дунне Ноябрь 11, 2016 12:16 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<