Гриша Григорьев телефонъёсты но удмуртлыкез герӟа

Удмурт Дунне
By Удмурт Дунне Ноябрь 29, 2016 16:18
giri1

Г. Григорьев удмурт кылэз дышетонъя «Кылдысин», нылпиослы «Чибори», егитъёслы «Ӟенелик» но мукет приложениослэн авторзы

Григорий Григорьев — Android-разработчик, телефонэ, компьютере удмурт шрифтъёсты лэсьтӥсь. Али солэн шыкысаз трос ужъёсыз ни: телефонэ, компьютере удмурт клавиатураос, дырпус виджет, удмурт кылэз дышетонъя «Кылдысин», нылпиослы «Чибори», егитъёслы «Ӟенелик» но мукет приложениос.

 

— Удмуртъёс пӧлысь мон тонэ сяна Android-разработчикез уг тодӥсь-кы. Кызьы кутскиз сюресэд?

—  Школаысен ик мон туж яратӥсько вал математикаез, геометриез но физикаез. Соин ик малпай  дышетсконме азьланьтыны Удмурт кун университетысь математикая факультетын прикладной математика но информатика специальностья. Отын милемыз программированилы но дышетӥзы.

Дышетскыкум мон 1С программист луыса ужай ни. Кӧня ке дыр ортчыса, Android-программаос лэсьтыны мылкыды ӝутскиз. Нырысь Интернетысь статьяос пыр, пӧртэм примеръёс пыр тодон-валанъёс люкай. Трос книгаос лыдӟи. Собере монэ одӥг компание Android-разработчик луыса ужаны басьтӥзы, отын ини пыр-почгес та удысэн тодматски.

 

— Нырысетӥ проектэд, кудӥз тонэ удмуртлыкын тодмо кариз, со удмурт шрифтъёсты лэсьтон.

— Мон шумпотӥсько, адӟисько ке, кызьы удмурт кыл, культура азинско, воштӥсько. 2011-тӥ арлэн кутсконаз «ВКонтакте» вотэсбам удмурт кылэ берыктэмын вал. Та ивор монэ туж паймытӥз но мылкыдме ӝутӥз удмурт кыллы, калыклы кызьы ке но юрттыны. Мыным туж уг кельшы вал, куке «ВКонтакте» сайтын, эшъёсыным удмурт кылын гожъяськыкум, кылъёсы, янгыш шуыса, ултӥзы гордэн пусйиськылӥзы. Мон малпай та югдурез тупатыны. Утчаны кутски, кызьы программаосын шонер гожъяськон сӧзнэтъёс ужало, мар кулэ, программа удмурт кылэз но мед валалоз шуыса. Тодӥ, вань тодмо браузеръёсын но куд-ог офисной пакетъёсын кутӥське янгышъёсты эскерись одӥг эрико программа — Hunspell. Со удмурт кылэз но валаны мед кутскоз шуыса, солы кулэ лэсьтыны нимысьтыз кыллюкам (кудаз луыны кулэ 2 файл: одӥгез — кылъёсын, мукетыз — правилоосын). Мон кутски та борды. 2-3 толэзь ортчыса, дась ни вал кыллюкамлэн нырысетӥ версиез. Hunspell вала ни вал ог 1 миллион пала удмурт кылъёсты.
Та ужме удмурт азьветлӥсь Алексей Шкляев адӟиз, программа кылдытыны ӵектӥз, кудӥз компьютере удмурт шрифтъёсты, раскладкаез, удмурт кылын шонер гожъяськонэз но пӧртэм мукет удмурт программаосты пуктыны юрттоз. Озьы кылдӥз UdmurtPackage программа (установщик), кудзэ али udmspell.ru вотэсбамысь дунтэк шедьтыны луэ.
Кӧня ке дыр ортчыса, телефонъёсы но удмурт раскладка лэсьтыны малпан кылдӥз. Угось телефонъёсын но удмурт сямен гожъяськем потэ. Тужгес каньыл соосты Аndroid вылын ужась телефонъёслы но планшетъёслы лэсьтыны. Аслам сыӵе телефонэ ӧй вал ке но, мон удмурт раскладка пуктӥсь программа кылдытӥ ик. Нырысьсэ эшъёсылэн телефонъёссы вылын эскери — зэмзэ но, ужа! Мыным со туж бадӟым шумпотон вал. Озьы Android-приложениос борды кыстӥськи, мукет удмурт ватсэтъёс кылдытӥ. Адямиослы (аслым но) кулэ луись программаосты лэсьтыса, мон ачим дышетскисько. Та мыным ужам туж юрттэ. Android-разработчик луыса ик удмуртлыклы но пайда вайисько.

 

— Ваньмыз пӧлысь кыӵе проектъёстэ висъясалыд?

Нырысь ик, шонер гожъяськонъя удмурт кыллюкам (янгышен гожтэм кылэз пусъе но тодыны юрттэ, кыӵе кыл гожтыны турттӥськоды вал) — таиз нырысетӥез но одӥгез тужгес тунсыкоез проектэ, малы ке шуоно трос ужано луиз кылъёсын (вань удмурт кылъёслэсь основаоссэс шедьтоно луиз), орфографияя книгаосын, кылъёсты кылдытонъя правилоосын. Программа понна гожтэмын вал ог 3 сюрс правилоос. Соослы луыса шонер гожъяськонэз чаклась система ог 6 миллион удмурт кылъёсты валаны быгатэ. Озьы удмурт кылъёсын ужаны быгато пӧртэм программаос: Google Chrome, Opera, Firefox браузеръёс, LibreOffice но OpenOffice офис пакетъёс.

Кыкетћез, Windows но Android операционной системаослы удмурт клавиатураос. Таосыз тужгес но кулэ луись программаос/тӥрлыкъёс Кемалась ӧвӧл Android-лы клавиатуралэн кыкетӥ версиез потӥз. Та версиын, экран вылысь букваос вылтӥ чиньыен нуллыса, каньылэн удмурт кылъёсты бичаны луэ (Т9, swype-амал). Озьы ик та клавиатура ӟуч кылъёсты удмуртэ берыктыны быгатэ. Шуом, «хлеб» гожтӥды ке, со сое «нянь» кыллы тупатыны дэмлалоз. Но та приложение али «бета» версиын гинэ ай, тупатонъёсыз трос на. Жаляса верано, али ӧвӧл IOS системаослы удмурт приложениос лэсьтӥсь разработчикъёс.

Куинетћез, удмурт-ӟуч кыллюкам.

Но ньылетћез, «Кылдысин» приложение. Таиз приложение сӥземын удмурт кылэз дышетӥсь адямиослы. Со одӥгез секытъёсыз пӧлысь, дыр. Лэсьтэмын тодмо «Дуолинго», «Лингвалео» программаос порма. Та ватсэт луонлык сётэ удмурт кылъёсты, кылтэчетъёсты тренажёр пыр дышетыны, озьы ик отын вань грамматической материалэз, озвучкаез, пӧртэм ужъёсыз, дышетскисьёс куспазы вераськыны но ӵошатскыны быгато. Секыт вал кылэз дышетонъя методикаез валаны. Со понна мон юромо дышетӥсьёс доры но вазиськылӥ. Ватсэтэз лэсьтон 2 толэзь кыстӥськиз.

 

— Озьыен, одӥг приложение лэсьтон бордын быдэс команда ужа?

— Тросэз мынам проектъёсы лэсьтэмын ӝуась синъёсын: вань малпан, вань туж бадӟым мылкыд. Но ӵемысь шугъяськисько, удмурт кылэн герӟаськем ужпумен пумиськисько ке. Соку мон вазиськисько филолог эшъёсылы. «Кылдысинын» кылъёсты но грамматикая курсъёсты дасяз удмурт кылъя дышетӥсь Ангелина Решетникова, дизайнзэ суредаз «Монами» студия, озвучказэ дасязы «Мынам Удмуртие» ТРК-ысь журналистъёс Александр Бикузин, Светлана Пикулева, эшшо 2-3 адями вань удмурт кылъёсты берыктӥзы англи кылэ. Озьы ик егит дизайнерен Вера Штыковаен ужалляй, филологен Лукерья Шиховаен. Зэмзэ ке, проектлы эшшо кулэ на менеджер. Но менеджер ачим ик луисько. Матысь дыре выль проектъёс борды уг басьтӥськылы ни, таоссэ азинтыны, выльдыны, тупатъяны кулэ. IT-дунне интыяз уг сылы, ялан вошъяське.

 

— Мар али уг тырмы удмурт культураын?

— Мынам малпамея, кылэз дышетонъя ресурсъёс. Нылпиослы но туж ӧжыт удмурт кылэз дышетонъя электрон материалъёс. Озьы ик ичи умой кыллюкамъёс. Калык куре, нош соос ӧвӧл. Android — туннэ нуналлы тужгес но вӧлмем мобильной операционной система (ваньмыз пӧлысь 80 процентсэ со басьтэ). Адямиос, компьютерен интые, ӵемгес смартфонэн ужало, соин мобильной приложениос кулэ. Асьмелы но соосты кулэ уже кутыны. Угось, одӥг пичи приложение лэсьтыса, пичи калык азьын бадӟым луонлыкъёс усьтӥсько. Дуннелэн котькуд сэрегысьтыз адямиос со приложениосын ужаны быгато.

 

— Али кошкид Санкт-Петербурге. Мае утчаны?

— Санкт-Петербурге кошкемелэн трос мугез: дуннеез адӟем потэ, уж ласянь татын бадӟымгес куронъёс, асме та ласянь кыдато. Озьы ик та городын мынам туганэ улэ. Татын кӧня ке улыса, малпасько мукет азе выжо яке мӧзмыса гуртам, Пичи Пурга ёросысь Выль Мӧньяла, берто.

 

* * *

Вераськон куспын:

— Ваньмон дыръям тросгес шутэтскыны, спортэн вырыны тыршисько, но жаляса верано, ваньмон дыры туж ӧжыт. Озьы ик яратӥсько гитараен, бас-гитараен шудыны. Шудћсько Peace Pu рок-группаын. Пичи гинэ ваньмон дыры сюре ке, тыршисько сое аслам проектъёсылы висъяны.

— 1 миллион манетэ луысал ке, квартира басьтысал, али ужась проектъёсам понысал.

— Малпасько, вань адямиос ӟечесь шуыса. Кельшо визьмо, ужаны яратӥсь, малпанзэс шонерак синме верась адямиос.

— Мар воштысал улонын? Котькуд адямилы сётысал солы кельшись уж (но со мукет адямиослы урод карисьтэм уж мед луоз).

— Шумпотӥсько, монэ «молодец» шуиськоды шуыса.

Мария Векшина

 

 

 

 

 

Удмурт Дунне
By Удмурт Дунне Ноябрь 29, 2016 16:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<