Газет кылдӥз… календарьысь?

Удмурт Дунне
By Удмурт Дунне Ноябрь 2, 2016 11:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

kalendarXX даурлэсь азьло «инородецъёслы» ас кылынызы дышетскыны ӧз лэзьылэ.

Лыдъяськылӥз: школа ӟуч луыны кулэ, нош Россия — ӟучъёслы. Национальной школаос ӧй вал бере, калык туж кема улӥз пеймытын. Удмурт интеллигенция юнманы кутскиз XIX даурлэн кыкетӥ ӝыныяз гинэ. Герӟаськемын со покчи классъёслы дышетӥсьёсты но священникъёсты дасяны кутскемен. Нырысетӥ удмурт интеллигентъёс пӧлын вал Казаньысь учительской семинариез йылпумъямъёс Г. Верещагин, И. Михеев, И. Яковлев но мукетъёсыз. Соос шуылӥзы: калыклэн ӵуказе нуналыз быдэсак герӟаськемын тодон-валанэн. Соин ик сюлмаськизы, удмурт кылэз тодон ултӥянлы медаз пӧрмы, удмуртъёсты анай кылынызы дышетоно шуыса. Озьы, номыр шоры учкытэк, соос поттылӥзы букварьёс, азбукаос, грамматикаос но анай кылын мукет книгаос.

Нырысетӥ ӟуч революция (1905-1907) бере покчи калыкъёслэн — удмуртъёслэн, поръёслэн, чувашъёслэн, мордваослэн — выжыоссэс утён мылкыдзы юнманы кутскиз.  XX даурлэн кутсконаз поттыны ӧдъязы «Памятная книжкаос» но календарьёс. Казаньын 1904-тӥ-1909-тӥ аръёсы «Удморт кылын календарь», 1907-тӥ-1912-тӥ аръёсы «Марла календарь» («Мари календарь») печатласькизы, отын поттылӥзы удмурт но пор кылъёсын нырысетӥ чеберлыко произведениосты. Соосъя калык лыдӟиськыны, котыр дуннеез валаны дышетскиз.

Тодосчиос лыдъямъя, со календарьёс кутскон сёто газет-журналъёслы. Губерниосысь статистикая комитетъёс отысь асьсэлы кулэ лыдпусъёсты шедьтылӥзы. Нош асьмелы калыклэн историеныз, культураеныз герӟаськем туж кулэ материал кылемын.

«Удморт кылын календарьёсты» ас коньдонэныз поттӥз тодмо удмурт азьветлӥсь Иван Михеев. Дунзы шоры учкытэк, 10 коньы сылӥзы соос, нош ӟуч кылын потӥсьёсыз 5 коньыен вал, календарьёс калык пӧлы туж ӝог вӧлмылӥзы. Угось соос гожтэмын вал огшоры калыклэн вераськон кылыныз, соин ик туж валамонэсь вал. Отын печатласькизы нырысетӥ удмурт произведениос, кылсярысь, И. Яковлевлэн «Ачме улонъёсмы» статьяез, М. Прокопьевлэн «Вуэм пилэн эсэбез» кылбурез, М. Можгинлэн «Беглой» балладаез но мукетъёсыз. Календарьысь шедьтыны луиз куазь сярысь ивортонэз, валаса сиськон, дӥсяськон, мугорез утялтон сярысь гожъямъёсты. Культураен, историен герӟаськем материалъёс но, кылсярысь, «Славянъёслэн первой князьёссы», «Бигер калыклэн ӟуч музъемез жугиськыса басьтэмез», тодон-валанэз будэтыны юрттӥзы, печатласькизы валаса гырыны-кизьыны дышетонъёс («Герыдэс куштыса плуген гырелэ», «Ю кизисьёслы кенеш»), тазалыкез утёнэн герӟаськем материалъёс («Висёнъёсыз эмнян макеёс», «Арак юон сярись. Тамак кыскон сярись»). Нош властез курлась публикациос ӧй вал, цензура печатланы соосты ӧз лэзьылы. Но календарьлэн 3-тӥ номераз потӥзы ик «Эксэймылэн узырлыгес» но «Ачме улонъёсмы» статьяос. Берлоеныз сэрен, вылды, календарь но пытсамын вал. Казаньысь губернатор И. Михеевез янгыше уськытӥз та статьяез поттэмез понна, сое йыртэманэн ӵошатӥз.

Кема аръёс ӵоже лыдъ-яськылӥз, удмурт журналистика удмурт кылын печатласькем «Войнаысь ивор» газет бордысен кутске шуыса. Со потӥз 1915-тӥ арын 4-тӥ февральысен. XXI даурлэн кутсконаз гинэ тодосчиослэн эскеронъёссы но 4-зэ ик «Календарьёсты» шараям бере (отчыозь литератураын кылпум поттылӥзы 3-ез сярысь гинэ) малпан воштӥськиз. «Календарьёс» поттэмын вал 1904-тӥ, 1906-тӥ, 1907-тӥ но 1909-тӥ аръёсы.

Зэм, «Календарьёсын» герӟаськемын на трос юанъёс. Кылсярысь, туннэ тодмо ӧвӧл, кӧня тиражен соос потӥзы, материалъёсты ачиз автор гожъяз яке кинэ ке курылӥз, ӟуч кылысь берыктылэмын ӧй вал-а соос но мукет. Озьы ке но туннэ вераны быгатӥськом ни: Иван Михеев — удмурт журналистикалэн атаез, нош солэн календарьёсыз  удмурт кылын изданиослэн инъетсы луо.

Елена Петрова,  

  Удмурт кун университетысь  дышетӥсь

Удмурт Дунне
By Удмурт Дунне Ноябрь 2, 2016 11:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<