Эмъяз лулмес но, мугормес но

Удмурт Дунне
By Удмурт Дунне 8 ноября, 2016 10:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Удмурт азьветлӥсьлы синпелет

Удмурт азьветлӥсьлы синпелет

Трофим Борисовез асьмеос тодӥськом филологез, югдытӥсез, этнографез сямен. Но со ӧжыт ӧз лэсьты эмъян удысын но. Удмуртъёс пӧлын вал нырысетӥез вылӥ тодон-валан басьтэм эмчи.

 Съезд бере съезд

Борисов вордӥськиз 1891-тӥ арын 19-тӥ шуркынмонэ Алнаш ёросысь Кизекгуртын. Дышетскиз гуртысьтыз земской школаын, Алнаш черкогуртысь 2 классъем школаын, Алабгоысь но Кузонысь училищеосын. 1912-тӥ арын пыриз Санкт-Петербургысь университетысь историяя но филологияя факультетэ но, ар ортчыса, выжиз Казаньысь университетлэн медициная факультетаз. Казаньысь университетлэн ректорезлы со таӵе куриськон гожтӥз: медицина мыным кельше. Куронме учкыкуды, тодады ваелэ мынэсьтым вотякъёс пӧлысь потэмме. Мон луо Вятской губерниысь нырысетӥез лыктэм мурт. Басьтӥды ке монэ дышетскыны, туж бадӟым юрттэт лэсьтоды быдэс удмурт калыклэн культураезлы, медицинаезлы, малы ке шуоно та вакытэ эмъясьёс уг тырмо быдэс Вятской губерниын.

1920-тӥ арын Вотской автомномной область кылдыку, отчы пырись Глазов, Иж, Дэбес, Можга но Сьӧлта уездъёсын ужало вал 38 врачъёс (пинь эмъясьёсты лыдъяса), 300-лэсь тросгес фельдшеръёс, акушеркаос но эмсузэръёс. Россиын сярысь, асьме палан данаклы тросгес вал сьӧд оспаен, тифен, кӧткылен (дизентериен) висисьёс, озьы ик чумаен, сибир язваен черламъёс. Со ваньмыз герӟаськемын вал удмурт калыклэн сютэм улэменыз, начар сиськеменыз.

1917-тӥ арын Т. Борисов врачлэсь дипломзэ басьтӥз. Со вакытэ медициная факультетэз йылпумъямъёсты ыстылӥзы армие. Тӥни озьы со шедиз госпитальлэн эвакопунктаз, нош 1918-тӥ арын Трофим Кузьмич службазэ нуиз революционной полкын, старшой врач вал, пыриз большевикъёслэн радазы.

Но армие кошкемезлэсь азьло солы кылдӥз Поволжьеысь пичи калыкъёслэн нырысетӥ съездазы пыриськыны, отын одӥгаз секциын секретарь вал. Ужрадын ӝутэмын вал туж сюлмаськытӥсь ужпум — кумышка пӧзьтон. Кумышка адямилэсь тазалыксэ, быдэс улонзэ сӧре, шудбурзэ быдтэ, шуиз Трофим Кузьмич. Но вераськыса гинэ кумышка пӧзьтонэз уд быдты. Калыклы тросгес книгаос печатлано, театръёс усьтоно, культуразэ ӝутоно, соку адямиос асьсэос юэмысь дугдозы.

1918-тӥ арын, армиысь бертэмез бере, со поттыны кутскиз «Гудыри» газетэз. Отын ӵемысь печатлаз чылкыт улонлэн кулэлыкез сярысь материалъёс.

Т. Борисовлэн ӵектэмезъя 1920-тӥ арын Сарапулын удмурт нылкышноослэн съездзы люкамын вал. Кенешонын удмурт калыклэсь тазалыксэ умоятон сярысь резолюция кутӥзы. Отын гожтэмын вал областьын 70 процентэз калык трахомаен курадӟе, данакез нылпиос оспаен висё, туж тросэз быро шуыса, калык пӧлын зол вӧлмемын паласькись висёнъёс: сифилис, тиф но мукетъёсыз. Та съездын ӵектэмын вал котькуд гуртын чылкытлык понна нюръяськись комитет кылдытыны. Со кулэ оспалэсь вакцина пуктонэз чакланы, висисьёсты пусйылыны, тазалыкез юнматон сярысь сюлмаськыны. Озьы ик усьтыны чакламын вал эмсузэръёсты, фельдшер-акушеръёсты дасянъя курсъёс. Трофим Кузьмич конференциын вераськиз городысь но гуртысь нылпиослэсь, ужасьёслэсь тазалыксэс юнматон пумысен. Дэмлаз физкультуралы бадӟым саклык висъяны.

1923-тӥ арын Т. Борисовез партилэн политикаеныз соглаш луымтэез понна партиысь потто, со Калмыкие кошконо луэ. Отын но со адямиослэсь тазалыксэс умоятон сярысь сюлмаське. Солэн кичӧлтэмез улсын выль больницаос но здравпунктъёс усьтӥсько. 1925-тӥ  арын со Удмуртие берыктӥське. Луэ Удмурт автономилэн исполкомезлэн кивалтӥсез.

1925-тӥ арын, Вотской автономилы 5 ар тырмыку,

Т. Борисов ивортӥз, кыӵе ужрадъёс быдэсъясько удмурт калыклэсь тазалыксэ юнматон понна. Гуртъёсын ужаны кутскизы син эмъясь, венерической висёнъёсты алӥсь но малярияез йӧнатӥсь отрядъёс. Котькуд адямилы эмъяськыны 1924-тӥ-1925-тӥ аръёсы областьын 1 манет но 2 копейка висъяло вал, нош 1925-тӥ-1927 аръёсы — 2 манет но 58 копейка. Гуртъёсын но городъёсын усьтӥськылӥзы выль больницаос, диспансеръёс, медпунктъёс.

 Город бере город

1925-тӥ арын Т. Борисов кузпалъяське Ижысь рабочийлэн нылыныз Александра Морозоваен, соослэн Роза, Клара нылъёссы вордӥсько.

1928-тӥ арын Т. Борисовез юромо янгыше уськыто, кышномуртэз кужмысь бордаз воземез понна судить каро но 5 арлы пытсэт сьӧры Усть-Сысольске (Сыктывкар) келяло. 8 толэзь ортчыса, солэсь судимостьсэ кушто. Архивъёсысь тодмо луиз, Трофим Кузьмич Сыктывкарысь венерической диспансерын врач луыса ужаз шуыса. Комиысь тазалыкез утёнъя ёзэт 1930-тӥ арын удмурт воргоронэз келя Москвае медицинаын эскеронъёс лэсьтыны. Но Москваын со ӧз ӝегатскы — кошкиз Новокузнецкысь пуктӥськонэ врач луыса ужаны. Одӥг ар ортчыса, Кузнецкстройысь партячейка куремен, Т. Борисовез выльысь партие кутӥзы. 1932-тӥ арын со берытске Москвае но пыре Броннер нимо кожно-венерологический кун институтлэн аспирантураяз. Но дышетсконзэ быдтыны шудэз вылымтэ. Удмуртиысь со вылэ чагиськон вуэ но, сое кунлэн тушмонэз шуо.

1933-тӥ арын сое 5 арлы пытсэт сьӧры пукто, 1935-тӥ арын Казахстанысь Кустанай городэ келяло. Отын со врачлэсь удыссэ азинтэ. Татын со кыктэтӥзэ кышнояське но, 1938-тӥ арын Нина нимо нылыз вордӥське. Кустанайысь выже Чимкент (Черняев) городэ. 1940-тӥ арын Трофим Кузьмичез нош ик янгыше уськыто больницаын 1 муртлэн паласькись висёнлэсь бырыны шедемез понна. Лиза кузпалыз сыӵе секыт улонэз уг чида — кулэ. 1941-тӥ арын, пытсэтлэсь мозмемез бере, Трофим Кузьмич Чимкентысь паласькись висёнъёсъя больницаын валтӥсь врач луэ.

Ужез секытэн мынэ, коньдон туж ичи, эмъян тӥрлык, дӥсь ӧз тырмылэ. Больницаын ветлоно дисьёссэс врачъёс, доразы нуллыса, миськылӥзы. Городын тифен висисьёс трос луизы, черлазы врачъёс но. Со понна янгыше уськытӥзы Трофим Кузьмичез. Со нош ик 8 арлы тюрмае сюриз. 1942-тӥ арын Т. Борисовез Чимкентской тюрмаысь Актюбинской лагере келязы. Бышкись ез сьӧрын туж начар сюдӥзы, удмурт врач зол ӟызыёмиз. 1943-тӥ арын 10-тӥ куартолэзе со Анна сузэрезлы гожтэт ыстӥз, маке сиён курыса. Но сиёнэн посылка басьтыса ӧз вутты. 1943-тӥ арын 4-тӥ инвожое, сютэм улонлэсь сюлмыз лябӟыса, Трофим Кузьмич кулӥз.

1989-тӥ арын СССР-ысь Вылӥ Суд Т. Борисовлэсь ӟеч нимзэ берыктӥз. Удмурт калык солэсь удмуртлык понна сюлмаськемзэ, удмуртъёслэсь тазалыксэс юнматон понна ужамзэ ноку уз вунэты.

Владимир Савельев,  Лев Шубин,

      Ижысь медициная академиысь тодосчиос

Туспуктӥз А. Горбунов

Удмурт Дунне
By Удмурт Дунне 8 ноября, 2016 10:47 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<