Дышето ини 1 сюрс 33 ар

Удмурт Дунне
By Удмурт Дунне 8 ноября, 2016 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмуртиысь Зуевъёслэн семьязы Нырысетӥ каналысь «Мужское/женское» передачае  вуылӥз. Программа сӥземын вал Дышетӥсьлэн нуналэзлы.

Сьӧлта ёросысь Иткулат гуртысь потэм Зуевъёслэн семьязы.

Сьӧлта ёросысь Иткулат гуртысь потэм Зуевъёслэн семьязы.

Зуевъёслэн выжыязы 40-лэсь ятыр дышетӥсьёс, нош дышетон удысын тыршемзы — огъя 1 сюрс 33 ар.

Ӵапак та понна Зуевъёслы асьсэ сярысь быдэс Россия тыр вераны луонлык сётӥзы. «Мужское/женское» передачае вуылӥзы сузэр-вынъёс Фаина, Александр, Михаил, Анна, Леонид, Виктор но соослэн Светлана но Анастасия нуныкайёссы.

Зуев дышетӥсьёслэн выжызы Сьӧлта ёросысь Иткулат гуртысь Степан Иванович но Спиридон Иванович агай-вынъёс бордысен кутскиз. Степан Иванович Нырысетӥ дунневыл но Граждан ожъёсы пыриськиз, дораз сӧсырмыса бертӥз. Дышетӥсь луыса ужаз Сьӧлта ёросысь Кӧньвыр школаын. Спиридон Иванович Сьӧлта, Эгра, Ува ёросъёсысь нылпиосты визьнодаз. Нырысетӥ каналысь передачае пыриськемъёслэн атайзы — Зуев Сергей Илларионович — вылӥ верам муртъёслэн матысь ӵыжы-выжызы луэ. Сергей Илларионович но Сьӧлта ёросысь Иткулат гуртын вордӥськиз. Со бускель Юмга гуртысь школаен кивалтӥз но отысь нылпиосты дышетӥз. Зуевъёслэн семьязы будэтӥз тодосчиез, профессорез, литературной критикез Анна Измайлова-Зуеваез. Семьяязы вань Россиысь но Удмуртиысь сӥё-дано дышетӥсьёс, Удмуртилэсь Кун премизэ басьтэмъёс.

Зуевъёслы асьсэ сярысь быдэс Россилы вераны луонлык кылдӥз Удмуртиысь Ужъя но миграция политикая министерствоен ялэм «Семейные трудовые династии» вожвылъяськонын вормемзы бере.

— Выжымы сярысь материалъёс 10 ар ӵоже люказ историен но шаертодонэн тунсыкъяськись агаймы Александр Зуев, —  вераз тодосчи Анна Измайлова-Зуева. — Семьямылэн историез гожтэмын «Юмга-Омга школа» книгаяз, угось атаймы та гуртын 7 классъем школа усьтӥз. Анаймы Зоя Ивановна Зуева но дышетӥсь вал, со покчи нылпиосты 39 ар ӵоже визьнодаз.

Ми сярысь тодӥллям «Мужское/женское» передачаысь редакторъёс. Ӧтизы Москвае. Нырысь шуак луим, угось тодӥсько: передачаез нуисьёс А. Гордон но Ю. Барановская адямиослэн кусыпъёсазы, улон шыкысазы бугыръясько. Но милемыз буйгатӥзы, арняяз одӥг пол данъяськымон адямиос сярысь передача лэсьтӥськом шуыса.

Москваысь журналистъёс выжыенымы тодматскыны нырысь вуылӥзы Удмуртие. Соосын Сьӧлта ёросысь Иткулат гуртлэн бервылаз ветлӥмы. Собере видео гожтӥм Сьӧлта ёросысь Выль Мӧньяын но Югдонын, Эгралан но Воткинскын. Отын уло но ужало дышетӥсьын азьвыл тыршем но али визьнодась ӵыжы-выжыосмы. Озьы Зуевъёслэн туала выжызы сярысь видео пӧрмиз.

А. Гордон но Ю. Барановская Зуевъёс сярысь шуизы: тӥ кадь семья быдэс Россиын ӧвӧл, дышетон удысын сюрслэсь ятыр ар тыршеменыз нокыӵе мукет семья ушъяськыны  уг быгаты. Кылсярысь, Михаил Зуев но Леонид Данилов дышетон удысын тыршизы быдэн 45 ар.  Шоуэ пыриськем Зуевъёслэн вӧжоезлы (бадӟымезлы) апайзылы, Фаина Сергеевналы, 73 арес, покчи братсылы, Виктор Сергеевичлы, ӵапак передачаез лэсьтыку, 60 арес тырмиз. А. Гордон Нырысетӥ каналлэн нимыныз сое ӟечкылаз.

Удмурт дышетӥсьёслэн выжызы сярысь тросгес тодыны луоз Интернетысь 30-тӥ сентябре потэм «Мужское/женское» передачаысь.

Ангелина Снигирёва

 

 

Удмурт Дунне
By Удмурт Дунне 8 ноября, 2016 13:59 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<