Дырез берыктон

Удмурт Дунне
By Удмурт Дунне Ноябрь 24, 2016 13:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шудонмы огдырлы дырез берыктӥз кадь. Удмурт движенилэн нырысетӥ нуналъёсысеныз кутскыса, ми вуим туала вакытозь.

«Удмурт Кенешлы» 22-тӥ шуркынмонэ тырмиз 25 ар. «Удмурт дунне» газет огазеяськонлы кузьым дасяз — «25 юан» шудон. Отчы пыриськиз 7 команда.

25 ар — 25 юан. Шудонмы огдырлы дырез берыктӥз кадь. Удмурт движенилэн нырысетӥ нуналъёсысеныз кутскыса, ми вуим туала вакытозь. Удмурт огазеяськонлэсь историзэ, калыклэсь культуразэ тодэмзэс эскеризы Ижысь «Удмурт Кенеш» огазеяськонлэн 4 ёрос ёзъёсысьтыз командаос, озьы ик Дэри ёросысь Пероггурысь, Ижысь егит визь погъёслэн но Удмурт кун университетысь тодосчиослэн командаоссы. жаляса верано, шудонэ ӧз пыриське Октябрь ёросысь «кенешчиос». Шудонэз дунъяз нимо-дано жюри — «Удмурт дунне» газетлэн валтӥсь редакторезлэн воштӥсез Е. Миннигараева, «Удмурт Кенеш» огазеяськонлэн азьвыл вице-президентэз, «Ингур» капеллалэн кивалтӥсез В. Митрофанов, «Удмурт Кенеш» огазеяськонлэн азьвыл вице-президентэз, тодосчи Г. Шушакова но «Удмурт Кенеш» огазеяськонлэн 20 аръем юбилеезлы сӥзем книгаез люкась-дасясь, литературовед А. Шкляев. Шудон кутскон азьын командаослы умой мылкыд сӥзизы «Удмурт дунне» газетлэн валтӥсь редакторез З. Рябинина но «Удмурт Кенеш» огазеяськонлэн тӧроез Т. Ишматова.
Шудон туж ӟырдыт мынӥз, раундысь раундэ тросэз командаос одӥг мында баллъёс люказы.

Адӟиськиз, историез командаос пыр-поч тодо, кин ке, шудонлы дасяськыса, «Удмурт Кенешлы» — 20 ар» книгаен но уйёссэ кӧлам, кин ке «Феномен Удмуртии» бичетысь вань 12 книгазэ лыдӟыса потэм, нош кин ке со гожтэм историез ас вакытаз ачиз лэсьтӥз. Кылсярысь, О. Шилова, А. Разин, Н. Малых, В. Осипов, Б. Боталов, И. Викторов, А. Измайлова-Зуева но мукетъёсыз.
Тросэз юанъёс эскеризы историез тодэмез, мукетъёсыз — шонер малпаськемез.
Кылсярысь, кин гожтӥз та чуръёсты:

Кам шур ас вуоссэ нуоз,
Жильыртозы
ошмесъёсмы.
Шуиськомы: «Кенеш» улоз!
«Удмурт Кенеш», тон — осконмы!

«Удмурт Кенешлы» — 20 ар» книгаез лыдӟыса ӧд поты ке, уд но тоды, сое Е. Андреев артист гожтӥз шуыса. Мукетыз юан бордын пыр-поч малпаськизы ке, шонер валэктон шедьтыны егитъёс но быгатозы. «1-тӥез луиз 4-тӥ, но 1-тӥез, 2-тӥез но 3-тӥез та сярысь ӧз тодэ ни. Ма сярысь вераськон?» 1991-тӥ арын ортчиз удмуртъёслэн Всесоюзной ӧтчамзы. Но удмурт движенилэсь историзэ чаклад ке, та ӧтчам луэ ини 4-тӥ. Нырысетӥ куиньёсыз ортчизы 1918-тӥ но 1919-тӥ аръёсы. Индустриальной ёросысь Н. Дмитриева шуэ: умой, шудонын пӧртэм юанъёс чузъяськизы, мае тодӥськом но, мае ум тодӥське но. Кылсярысь, табере, пе, со лыдӟоз Д. Островский этнографлэсь 1873-тӥ арын потэм «Вотяки Казанской губернии» монографизэ.

Озьы быдэн 18 балл люказы Ленин ёросысь «Удмурт бигер базар» но Первомай ёросысь «Юсьёс» командаос. Соосты азьпалтӥзы Дэри ёросысь «Кильтырнаос» но Устинов ёросысь «Ярушкаос» — соос 19 юанлы шонер валэктон сётӥзы. Но кин вормоз? Ватсаса юан. Россиысь фин-угор калыкъёс пӧлын лыдзыя кыӵе интыын сыло удмуртъёс?

— 2-тӥын, милемыз азьпалто мордваос, берамы кылё поръёс, — кыкез ик команда шонер валэктон сётӥз.

Нош тодозы-а меда шу-дӥсьёс, мар со турморда, пижны, сикыӵ, кутэс, калтон, казь, мурдо но нальык? Татын тодмо луиз, кин тодэ на вашкала улонэз. Гуртын улӥсьёс, дэриос, 6 кылэз валэктыны быгатӥзы, Устинов ёросысь «кенешчиос» (городын улӥсьёс) — 4-зэ гинэ. Вань та кылъёс пӧйшуръёсты, тылобурдоосты, чорыгъёсты кутон арбериосты возьмато, «кутэс» сяна — со, пе, кутсаськон цеп.

Вормисьёслы, пероггуртъёслы, «Удмурт дунне» газет кузьмаз 25 сюрс манетъем сертификат, та дун тыр соос газет баме рекламазэс, ӟечкыланъёссэс печатланы быгатозы. Нош «Удмурт Кенеш» огазеяськон котькудӥзлы сётӥз удмурт кырӟанъёсын караоке-диск. Вань шудӥсьёслы кузьмамын вал «Удмурт дунне» газетлэн 100 аръем юбилеезлы сӥзем энциклопедия.

Шудон йылпумъяськиз, но ӧз быре шудонлы дасям юанъёсмы. Кызьы вераз жюри, таӵе шудонъёсты одно ик азьланьтоно.

Гажано лыдӟисьёсмы, тӥ-ляд но потэ ке визьдэс сынамды, жингыртэ «Удмурт дунне» газетлэн редакцияз 73-33-42 телефон номеръя яке учкелэ udmdunne.ru сайтысь, юанъёс возьмало тӥледыз.

Мария Векшина

Туспуктӥз А. Горбунов

Удмурт Дунне
By Удмурт Дунне Ноябрь 24, 2016 13:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<