Балезино ёросысь Юнда: Крезьёссэс тодо Россиын

Удмурт Дунне
By Удмурт Дунне Ноябрь 25, 2016 16:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Юнда муниципал кылдытэтэн кивалтӥсь Владимир Урасинов.

Балезино ёросысь Юндаын бесерман калык улэ. Шуркынмон толэзе гуртлы 370 ар тырмиз. Татын вань улыно-вылыно школа, культура юрт, почта, амбулатория, нылпи сад, шаертодонъя музей, кибашлыослэн юртсы, библиотека но 2 магазин. Культура юрт азьын ож лудэ быремъёслы сӥзем синпелет сылэ.

Шыкыссы узыр

— Шаерысьтымы кӧня гуртъёсты гожъяды ини, бускель республикаосы но вуылӥськоды, нош ми доры малы ке уд лыктӥське, — ӝож мылкыдын вазиськиз вал Юнда гуртысь шаертодонъя музеен кивалтӥсь, Россиысь дышетон удысысь отличник, Удмурт Республикаысь культура удысысь дано ужась Ангелина Урасинова. — Милям но гуртмы сярысь юн гожтытэммы потэ, палэнын улӥсьёс но мед тодозы со сярысь. Туэ ми солэсь 370 ар тырмонзэ пусйим. Праздникамы лачак калык люкаськылӥз, сьӧрло улыны кошкемъёс бертылӥзы. Зӧк (бадӟым) кивалтӥсьёс, бускель ёросъёсысь кырӟась коллективъёс но гурт калык быдэс клуб тыр люкаськылӥм. Гуртысьтымы кибашлыос киужъёсынызы адӟытон возьматӥзы. Вордӥськем гуртсэ данъяса, сюлме пырымон кылбур чуръёс гожтэм но келям подводник Александр Завалин.

— Милям гуртмы шудо кизили улын вордскемын, дыр, — вера Юнда шор ёзо школаен кивалтӥсь Ольга Фёдорова. — Туэ армы юбилейёсын узыр. Шор ёзо школамылы 30 ар тырмиз. Туж умой со, гуртын школа вань ке, озьыен, улон уз быры, азинскоз.

Юнда урам.

— Тӥ та гуртын ик-а вордскемын? — юасько Ольга Анатольевналэсь.

— Мон татчы Красногорск ёросысь вуи. Дышетсконме йылпумъяса, ужаны келязы Юндае. Отӥяз бесерман семьяе бызи.

— Удмуртъёслэсь соос маин ке висъясько-а?

— Номыр сыӵе-таӵе пӧртэмез ӧвӧл кадь — кырӟанъёссы (крезьёссы) ке шат. Аслам (милям) сярысь, бесерманъёс, юн зол нёжтыса, кырӟало ук. Дӥсьёссы аспӧртэмесь.

— Мон но юнда кен, бесерман пилы быземын, нош ныл йыры асьме ёросысь ик Поторочино гуртысь, — вера Ангелина Урасинова. — Юндаын 60 ар ӵоже улытозям, бесерманъёслэн улэм-вылэменызы, культураенызы но историенызы тунсыкъяськеменым но музей кылдытэменым, ачим но бесерман выжы кадь потӥсько ини. Гуртамы бесерман культураез утьыны выриськомы, калык сярысь сюлмаськиськомы. Культура юртмы но шаертодонъя музеймы 25 арзэс пусйизы, 40 ар луиз нылпи садмылы. Юнда муниципал кылдытэтэ пырись Ягошур гуртысь больница кылем арын 101 ар тырмонзэ пусйиз. 110 арзэ пусйим гуртысь библиотекамылэсь. Со интыяськемын азьвыл церковно-приходской школалэн юртаз. Алигес гинэ ортчытӥм Юнда базармес. Ми солы бырыны ум сётӥське. Туэ оштолэзе Вќйдыр ёрос праздник но дорамы ик ортчиз. Одӥг но тэк пукыны дырмы ӧвӧл. Гуртамы черк пуктон сярысь сюлмаськиськом. Малпам ужмы мед пӧрмоз вылэм. Но со понна туж трос аръёс кулэ на.

Шаертодонъя музей.

Улон пӧзе клубын

— Милям муниципал кылдытэтамы 10 гуртъёс пыро, — вера Юнда муниципал кылдытэтэн кивалтӥсь Владимир Урасинов. — Бен куке-соку лачак калык отын улӥз. Зӧк гуртъёс пумен-пумен пичиязы, быризы. Туннэ нуналлы Юндаын 138 коркан 540 адями улэ. Валлё аръёсы талэсь но трос вал калыкез. Гуртамы ӝыныез нулло Биянов но Урасинов фамилиосты. Одӥгез гинэ умойтэмез вань: гуртамы татчыозь газ кыскемын ӧвӧл на.

Гуртоослэн ваньмыз ик ужрадъёссы культура юртазы ортчыло. Кивалтэ соин Надежда Сидорова.
— Мынам пичи дырысеным клубын ужаме потэ вал, — вера Надежда Михайловна. — Отын ужаны нимысьтыз дышетскем адямиосмы мон дорозь ӧй вал. Соин ик школа бере Ижысь культурая училищее дышетскыны пыри. 2007-тӥ арын, сое йылпумъяса, гуртэ бертӥ, ужаны кутски, семья кылдытӥ. Алексей кузпалы Глазов карын вордскемын, но мынам городын улэме уг поты, Юнда гуртме номырин уг вошты.

Милям кемалась ини фольклор ансамбльмы ужа. Коллективез кылдытӥз но бесерманъёслэсь крезьёссэс быдэс Россие вӧлмытӥз Ангелина Урасинова. Со калык понна туж трос ужаз, али но тэк пуконэз уг тоды, музеен кивалтэ. Берло аръёссэ ансамбльмы «Азвесь крезь» шуыса нимаське. Соин кивалтӥсько мон. Школаын дышетскись нылпиосын, егит семьяосын но арлыдоосын пӧртэм ужрадъёс но кружокъёс ортчытъяськом. 15 ар ужа ини нылпиосмылэн «Юндыш шунды» фольклор ансамбльзы. Таиныз кивалтэ Ирина Зянкина. Туэ соослы шуд усиз Санкт-Петербурге но Сыктывкаре нылпи фестивале вуылыны. Вань на пиналъёслэн «Чингыли» ансамбльзы. Кивалтэ соин Надежда Урасинова.

И. Биянов но А. Урасинова трос тодо гурт сярысь.

— Мон но татын ик вордски, татын ик пересьми, — вераськонмы борды итӥське 1939-тӥ арын вордскем Иосиф Биянов. — Пенсие потытозям, «Большая Юнда» колхозын но, «Свобода» СПК-ын но, «Прогресс» ООО-ын но (хозяйстволэн нимыз но кивалтӥсьёсыз олокӧня пол вошъяськылӥзы) тракторист луыса тырши. Каль тани шутэтскисько ини. Ялан магазинэ ветлӥсько, сиён-юонтэк адями улыны уг быгаты ук, калык пӧлы потасько, выль иворъёсты, пӧй, кылоно.

Юнда гуртын вордскемын литературовед, педагогика наукаосъя кандидат Надежда Лекомцева, Москваысь Венгер посольствоын кылысь кылэ берыктӥсь Ольга Урасинова, гурт удысъя но сиён-юонъя министрлэн воштӥсез Олег Урасинов, медицина наукаосъя доктор, профессор Евгений Бутолин, медицина наукаосъя кандидат Светлана Калинина.

Любовь Тихонова

Удмурт Дунне
By Удмурт Дунне Ноябрь 25, 2016 16:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<