02 ивортэ: нылъёсты яратӥсь дышетӥсь, фермаын жугиськон но каталы гочан

Удмурт Дунне
By Удмурт Дунне 11 ноября, 2016 12:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Дышетӥсь — пытсэт сьӧрын

Грак ёросысь дышетӥсь 5 арлэсь кема пукоз пытсэт сьӧрын.

Кылем арын Грак ёросысь Бадӟым Вожой гуртын вань вераськонъёс вал татысь физкультураен дышетӥсь сярысь. Арлыдо педагогез, Удмуртиысь дано дышетӥсез янгыш карыны выризы 9-тӥ классын дышетскись нылъёсты урокъёсаз маяллямез понна. Та учырлы сӥземын вал А. Малаховлэн одӥгез «Пусть говорят» программаез но. Гуртын улӥсьёс, дышетӥсьёс но анай-атайёс кыклы люкиськизы. Кин ке оскиз, дышетӥсь янгыш шуыса, мукетъёсыз вераны выризы: пиосмуртэз юромо саптаны выро. Следствие кема мынӥз, дышетӥсь ортчиз пӧртэм экспертизаосты. Табере суд аслэсьтыз кылзэ вераз. 62 аресъем дышетӥсь янгышен лыдъямын но 5 ар но 4 толэзьлы пытсэт сьӧры келямын.

Фермаын жугиськон

Глазов ёросысь огаз фермаын 42 аресъем воргорон 47 аресъем дояркаез вииз.

Пудо сюдӥсь но скал кыскись юыса пукиллям, куспазы керетон потэм. Йыркурзэ вормытэк, пиосмурт нылкышноез кӧня ке пол выж борды кокам, бӧрысь кирпичен йыраз шуккем на. Жугем нылкышноез утьыны ӧз луы. Воргорон йыруж лэсьтэмезлэсь ӧз танӥськы. Со 15 арлы пытсэт сьӧры пуксьыны быгатоз.

Жаляз но кузьмаз

Ижысь 81 аресъем песянай 100 сюрс манетсэ тодмотэм кышномуртлы сётӥз.

Югдурез утисьёс доры алигес вазиськиз Ижысь Октябрь ёросын улӥсь нылкышно. Огнуналэ коркаез дорысен песяйлы вазиськем кыӵе ке кышномурт, шуэм, мон тӥляд Санкт-Петербургын улӥсь пидылэн эшез. Иже командировкае лыктӥ но, коньдонэ быриз. Вазиськи пидылы. Пиды ӵектӥз тӥ доры лыктыны, адрестэс сётӥз. Арлыдо кышномуртлэн пиез зэмзэ но Питерын улэ, вылаз ик, нылкышно песяйлэсь нимтулзэ но адрессэ быдэсак вераз. Песянай, картаысьтыз 100 сюрс манетсэ басьтыса, пиезлэн тодмоезлы сётӥз. Кӧня ке нунал ортчыса гинэ, песяй жингыртоно кариськиз Санкт-Петербурге, пиеныз вераськемез бере валаз: сое пӧязы.

Та учыръя уголовной уж ӝутэмын. Югдурез утисьёс адямиосты сак луыны куро. Пӧяськись нылкышнолэн тодметъёсыз таӵеесь: ӝуждалаез 160 см, 35-40 арес котыр, ӟучлы кельше, акценттэк вераське. Дӥсяськемын керттэм изьыен но югыт курткаен.

Каталы гочаз

Ижысь огаз школаын пыдкукъёс ышылыны ӧдъязы.

Ижысь Устинов ёросысь огаз школаысь кылиськон-дӥсяськон интыысь кык пар катаос пыдъяськизы. Нырысь учыре 3 сюрс 500 манетэн пыдкутчан ышиз, мукетъят — 5 сюрс манетэн. Полиция мурт ваньбурез яратӥсез ӝог шедьтӥз. Катаослы синмаськем 9-тӥ классысь нылаш. Лушкаськон учыръя уголовной уж ӝутэмын, пыдкук кузёослы берыктэмын.

Галина Семёнова

Удмурт Дунне
By Удмурт Дунне 11 ноября, 2016 12:55 Updated