Улонэз тыро. Марина Андреева малпанъёссэ быдэстэ

Удмурт Дунне
By Удмурт Дунне Октябрь 27, 2016 12:13
Алнаш ёросысь Марина Андреева: Кун Кенешысь креслоын пукон, тыныд оско шуыса шӧдон гинэ но туж дуно ни

Алнаш ёросысь Марина Андреева: Кун Кенешысь креслоын пукон, тыныд оско шуыса шӧдон гинэ но туж дуно ни.

Алнаш ёрос библиотекаын ужась Марина Андреева — пӧртэм ужрадъёсты но пумиськонъёсты радъясь, ёросысь Егитъёслэн парламентэнызы кивалтӥсь. Алнаш егитъёс пӧлын нырысь ик со проектъёс гожъяны кутскиз.

Кутскон

Ваньмыз кутскиз 2015-тӥ арын «Егит азьветлӥсьлэн школаез» элькун ужрад бере,  сое радъяз вал шаерысьтымы Улосэз азинтонъя институт. Со дырысен Марина проектъёсын выре, элькунамы но Россиын ортчылӥсь форумъёсы, семинаръёсы пыриське.

«Егит азьветлӥсьлэн школаезлэн» йылпумъянъёсызъя Марина Удмуртиысь усто егитъёс пӧлы шедиз. Татын солэн «Ми бордын вуоноез» нырысетӥ проектэз вордскиз.

— Кыӵе ке калыккуспо ужрад радъям потэ вал, но кызьы сое ортчытоно, кема  малпаськи, — вера Марина. — Фестиваль вылэ дугдӥ. Со пӧрмиз 2 люкетлэсь: егит семьяосын пумиськон — отын тунсыко шудонъёс но ӵошатсконъёс радъяськизы, нош кыкетӥ люкетэз — удмурт дискотека ортчытон. Форумъёс сярысь, кытын луэ возьматыны проекттэ но грант утыны, милемлы «Егит азьветлӥсьлэн школаяз» веразы. Матысез форум — Приволжск федерал округысь егитъёс понна Самара котырын ортчылӥсь «iВолга». Отчыозь дыр воксё ӧжыт кылемын. Мон ӝогак проект гожтӥ но заявкаме келяй.

«iВолгае» ветлон туж иназ луиз: отын Марина, проектсэ йылаз-пумаз вуттэм сяна,  трос тунсыко адямиосын тодматскиз, соослэн ужъёссы сярысь тодӥз.

Проектэз гожтон — со одӥг уж, но воксё мукет — сое улонэ пыӵатон, угось та понна юрттӥсьёс но, коньдон но шедьтоно. Аслэсьтыз проектсэ быдэстон понна Марина Нациосын ужан политикая министерствое вазиськиз. Удалтӥз! 50 сюрс манет висъязы. Со уксё, фестивалез ортчытонлы сяна, «Геокруиз» визь сынанэз радъянлы но тырмиз на. «Геокруизэ» ёросысь уно егитъёс пыриськизы, соин Марина оске, таӵе шудонэз арлы быдэ радъяно. Туэ визь сынан сӥземын вал Кинолэн арезлы но быръёнъёслы.

«iВолга» бере нылаш мукет форуме вуылӥз — «Тавридае», со ортчиз Крымын. Кытын эшшо, таӵе бадӟым ужрадын сяна, Марина кылзысал, шуом, Юрий Вяземскиез — «Умники и умницы» шудонэз нуисез!

— «Тавридае» шедён понна заявка келяно, — вера Марина. — Собере радъясьёс тыныд юанъёс ысто. Соослы валэктонъёс лэзёно. Мон историяя ӧре сюри. Туж кельшиз, угось кылӥ пӧртэм тодмо историкъёслэсь но политикъёслэсь дуннелэн историез сярысь малпанъёссэс, шӧдӥ туала югдур шоры учкемзэс. Со котькинлы тунсыко, дыр, нош мыным, ёросысь Егитъёслэн парламентэнызы али гинэ кивалтыны кутскисьлы но библиотекаын ужасьлы, эшшо но.

Проектъёсын вырыны Мариналы кельшиз, куддыр, аслаз верамезъя, ваньзэ куштэмез но огсыр улэмез потэ ке но. Но солэн трос тунсыко но туннэ нуналлы тупась малпанъёсыз йыраз бергало. Озьы кылдӥз «Мынам территорие» ӵектос — соя алнаш егитъёслы нимысьтыз инты кылдытоно, кытын соос быгатысалзы люкаськылыны, лэчыт юанъёсты сэрттыны-пертчыны, тунсыко адямиосын пумиськонъёс ортчытъяны, проектъёс гожъяны. Нош али пумиськыло кытын сюрем: егитъёслэн «Ошмес» центразы, ёрос администрациын яке библиотекаын.

Кыклы уг люкы

Проект гожъяны быгатэмысьтыз, сое пыртӥзы ёросысь Егитъёслэн парламентазы. Бырйизы кивалтӥсе. Озьы нылаш Егитъёслэн элькун парламентазы но вуиз — отчы котькуд ёросысь одӥг ёзчи пыре. Мариналы со уж кельше.

— Кун Кенешысь креслоын пукон, тыныд оско шуыса шӧдон гинэ но туж дуно ни, — шуэ Марина. — Али ми дасяськом кудӟытӥсь юонъёсын но электрон тамакен герӟаськем законлэсь проектсэ, 18 аресозь пиналъёслы соосты медаз вузалэ шуыса. Огшоры тамакез нимысьтыз интыосын гинэ кыскыны луэ, нош электроннойзэ — котькытын. Адями кыске ке, сыӵе тамак юрттэ, дыр, урод сямызлэсь куштӥськыны. Нош уг кыскы ке? Оло, электроннойёсыз бордысен ик куд-ог адямиос ӵындыны кутско.

Егитъёслэн парламентсы лулчеберетэн герӟаськем ужрадъёс тросгес ортчытъя.

— Туэысен ми ужан планмес воштыны малпам. Али егитъёслэсь юалляськиськом, мар соослы кулэ но тунсыко потэ. Валэктонъёсты эскерыса, тодом, кыӵе ужрадъёс туннэ нуналлы уг тырмо. Озьы ик оскисько, ёросысь Депутатъёслэн Кенешсылэн  заседаниосаз вуылом шуыса. Жаляса верано, соос нуназе ортчо, куке ми ужаськом.

Али Алнаш ёросын «Молодая гвардия» огазеяськонлэн ёзэтэз кылдытӥське, соин валче Егитъёслэн парламентсылэн ужаз но воштӥськонъёс луозы. Марина трос выроно луэ документъёсын. Сюлмаськонъёсыз йылӥзы быръёнъёс ортчем бере но — егит ныл Алнаш черкогуртысь депутат луиз.

— Выль ужме умойгес валан но быдэстон понна пыри дышетскыны Удмурт кун университетысь кивалтонлэн социологиез (социология управления) ӧре. Али мон магистрант, — вера Марина.

Табере яратоно ужезлы — киужен выронлы, лыдӟиськонлы, суредаськонлы — дырыз эшшо но ӧжыт кылиз. Туспуктӥсе дышетскыны но матысь дыре уз пӧрмы, дыр. Ӝытъёсыз солэн часъёсын-минутъёсын радъямын.

— Уж бере арняяз 2 пол Алнаш клубе ужась егитъёслэн «Зодиак» театразы ветлӥсько. Ми пуктӥськомы комедия жанрен миниатюраос, пыриськиськом концертъёсы но вожвылъяськонъёсы, вормонъёсмы но ӧжыт ӧвӧл ини, — шумпотэ Марина. —  Огласянь, театр — со сюлэмлы эмъюм, ми отын ял кариськомы. Нош мукет ласянь, театрын дӥсьтӥсьгес луиськомы, сцена вылын шудыса, трос калык азьын кышкан но тулкымъяськон быре. Озьы ик мон кивалтӥсько гитараен шудӥсьёслэн «В кругу друзей» клубенызы. Отчы люкаськыло крезьгурасьёс, гитараен шудӥсьёс но ваньмыз, кин кырӟаны яратэ. Пумиськонъёсамы тодматскиськомы пӧртэм крезьгур ӧръёсын, музыкантъёслэн, группаослэн творчествоенызы. Гужем алнаш площадьын кырӟалляськом, походъёсы ветлӥськом.

Дышетскемезъя Марина — ӟуч кылъя но литературая дышетӥсь, Удмурт кун университетэз йылпумъяз. Но Ижысь бертыса, Алнаш школае интыяськемез ӧз луы — интыос ӧй вал, озьы ужаны кутскиз библиотекаын. Тани куинетӥ арзэ ини со егитъёсын ужанъя методист.

— Мынам уже — арлы планъёс но отчётъёс дасян, гожтэтъёс басьян но келян, вотэсын библиотекалэсь бамзэ нуон, ёросысьтымы библиотекарьёслы юрттон, пӧртэм ужрадъёсты дасян но ортчытъян.

Библиотекаын тыршон но общественной уж маин ке ог-огзылы матын луо, соин нылаш висказы гож уг лэзьы. Ваньзэ рос-прос лэсьтэ, кужымзэ но дырзэ уг жаля. Со понна сое огъёзъёсыз но, ӵош ужась эшъёсыз но, ёрос кивалтӥсьёс но гажало.

Елена Рябина

Удмурт Дунне
By Удмурт Дунне Октябрь 27, 2016 12:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<