Удмуртилэн бюджетаз витетӥзэ воштонъёс пыртэмын

Удмурт Дунне
By Удмурт Дунне 5 октября, 2016 10:22

Ӟечез ӟечен берытске

27-тӥ сентябре ортчиз Кун Кенешлэн 26-тӥ сессиез. Эскериськиз 30 пала ужпум. Пӧлазы — 18 пӧртэм законъёслэн проектъёссы. Валтӥсез — 2016-тӥ арлы бюджетэ воштонъёс пыртон.

gossovet

Кун Кенешлэн сессияз 2016-тӥ арлы бюджет сярысь вераськизы.

Быръён бере…

Сессия кутскон азьын Кун Кенешлэн Тӧроез Владимир Невоструев депутатъёслы, сессие ӧтемъёслы тау кариз Кун Думае быръёнъёсы пыриськемзы понна. Владимир Петрович тодэ вайытӥз: Кун Думае быръёнъёс дыръя шаерамы ӝыныезлэсь тросэз оскемзэс веразы «Огъя Россия» партилы. Сыӵе ик югдур ёросъёсы, поселениосы депутатъёсты быръёнъя. Ортчем арня ӵоже тросаз ёросъёсын нырысетӥ сессиоссы ортчизы, отын  ёросъёслы выль йыръёс быръемын. Озьы Кун Кенешлэн таяз сессияз 19 выль быръем ёрос кивалтӥсьёс вуылӥзы.

Сессиын депутатъёс азьын вераськиз «Огъя Россия» партилэн списокъёсызъя Кун Думае депутатэ потэм  Игорь Сапко.

— Кампания капчи ӧй вал, — пусйиз со. — Та дыр ӵоже мон Удмуртиысь но Пермь улосысь сюрс иськемлэсь трос сюресъёсты ортчи. Калыкен, огшоры ужась адямиосын кенеши. Соос трос дэмланъёссэс, уно сю куронъёссэс веразы. Табере асьме азьын сылӥсь ужпум: калыклэсь осконзэ уж вылын быдэстоно!

Игорь Сапко пусйиз на, Удмуртилэн но Пермь улослэн нимынызы Кун Думае быръем депутатъёс туж золэсь. Оскон вань: соос быгатозы калыклэсь  кулэяськонъёссэ быдэстыны, республикаямы инвестициос кыскыны.

Удмуртиысь бырйисьёслы тау карыса, вераськиз Кун Думалэн депутатэз луэм Валерий Бузилов но. Таяз сессиын со, Кун Кенешысь депутат луонлэсь куштӥськыса, пусйиз:

— Кун Кенешлэн та залаз мон нырысьсэ лыктӥ вал 19 ар талэсь азьло. Лыктӥ, Удмуртиысь улонэз ӟечгес  кареме потыса. Туннэ мон тау карисько Удмуртилэн Тӧроезлы Александр Соловьевлы монэ Кун Думаысь депутатэ кандидатэ дэмламез понна. Тау карисько мыным оскем калыклы. Асьмелэн республикаямы ӟеч адямиос уло, соослэн улонзы но сыӵе ик ӟеч луыны кулэ.

Берло аръёсы Валерий Бузилов кивалтӥз Кун Кенешысь Экономикаын политикая, промышленностья но инвестициосъя ялан ужась комиссиен. Кин со интые кылёз?  Кун Кенешлэн Тӧроез Владимир Невоструев верамъя, али тодмо ӧвӧл на. Но нырысь ик чаклалозы, вылды, комиссиен кивалтӥсьлэсь воштӥсьёссэ.

Нялтас вераса, али Кун Кенешын кык депутатлэн интыез буш.

 Туннэ тырод, ӵуказе басьтод…

Нырысьёсыз пӧлын сессиын эскеремын вал ёрмисьёслы улон-вылонын юрттэт сётонъя законопроектэ ватсанъёс. Социальной политикая комиссилэн кивалтӥсез Ольга Казанцева тодэ вайытӥз: законлэсь проектсэ ӵектӥз Удмуртилэн Тӧроез Александр Соловьев, нырысетӥ лыдӟемен со кутэмын ни туэ март толэзе.

Мар сярысь вераськон? Трос квартираем  юртын улӥсь мӧйы муртлы, со 70 арессэ тырмытӥз ни ке, капремонт понна тыриськонлэн 50 процентэз  берытскоз, нош 80 аресъемъёслы — 100 процентэз. Та компенсациос сётӥськозы, пенсионер чылкак огназ улэ ке, яке быдэс семья — ужасьтэм пенсионеръёс ке.

Ӵектонэз депутатъёс умоен лыдъязы но законопроектэз кыкетӥ лыдӟемен кутӥзы.

Кун Кенешлэн Тӧроез Владимир Невоструев пусйиз:

— Та компенсациос республикалэн бюджетысьтыз висъяськозы. Лыдэ басьтӥськозы капремонт понна туэ 1-тӥ январьысен тыриськонъёс.

Нош Ольга Казанцева ватсаз на:

— Шаерамы та компенсациез 58 сюрс пала адями басьтоз. Вазиськоно луоз интыосысь калыклы улон-вылонын юрттэт сётонъя, семья но демография ужпумъёсъя ужась ёзъёсы. Адями ачиз вазиськыны уг ке быгаты, со понна ӵыжы-выжыосыз ветлыны быгатозы яке дораз соцработникез ӧтьыны луоз.

Та законэз быдэстон понна Удмуртилэн бюджетаз 2016-тӥ арлы чакламын 102 миллион 194 сюрс манет.

 Зӧкомем кисы

Сессилэн валтӥсь ужпумез — туэ арлы бюджетэ ватсанъёс пыртон. Законопроектэн тодматӥз коньдон ужпумъёсъя министрлэн воштӥсез Вера Сухих. Со пусйиз, Удмуртилэн бюджетэзлэн доход люкетэз  5 миллиард 403 миллион 354 сюрс манетлы будэ. Озьыен, сомындалы ик будэ расход люкетэз но. Та коньдон мыноз бюджет удысын тыршисьёслы уждун тыронлы, муниципал кылдытэтъёслы дотациослы, нылпиосты сюдонъя программаез улонэ пыӵатонлы, куинь но тросгес нылпи ваемъёслы толэзьлы быдэ тыриськонъёслы но мукет.

Но кытысь ватсаса  сомында уксё вуиз?

— Та выжыкыл ӧвӧл, — пусйиз Кун Кенешысь Бюджетъя, вытъёсъя но коньдон ужпумъёсъя комиссилэн кивалтӥсез Софья Широбокова. — Со возьматэ, промышленностьысь но гурт  удысысь предприятиосмы ӟечгес ужаны, соин валче бюджетэ тросгес вытъёс тырыны кутскизы шуыса.

Сессиын ик Удмуртилэн Тӧроез Александр Соловьев дэмлаз бюджетлэсь доход люкетсэ эшшо 1 миллиард 355 миллион 800 сюрс манетлы будэтыны. Ваньбур поттонлы вытъёс, пӧртэм трансфертъёс чотын, пе, сое лэсьтыны луоз. Озьы 1 миллиард манет мыноз на лэсьтӥськонлы, 200 миллион — йӧл поттонъя программаез пыӵатонлы, 50 миллион — вылӥ технологиосъя эмъюрттэт сётонлы, кылемез — пӧртэм министерствоослы но ведомствоослы.

Та дэмланэз Кун Кенешысь депутатъёс умоен пусйизы но законопроектлэсь ӵектоссэ кыкетӥ лыдӟемен кутӥзы. Сессия вискын Удмуртилэн Тӧроез Александр Соловьев журналистъёслы тодазы вайытӥз:

— Туэ ар кутсконын лэсь-тӥськисьёс азьын 2 миллиард 250 миллион манет пунэмъёсмы вал. Али лэсьтӥськон удыслы 1 миллиард манет ватсамы. Бюджет сярысь законэ ватсанъёс пыртэмез лыдэ басьтыса, лэсьтӥськисьёс азьын 1 миллиард пала пунэмъёсмы кылё на. Ӧжыт ӧвӧл. Но та коньдонэз но пумен сётом.

Агропромышленность удысэ ватсаса 200 миллион манет сётӥськом 1 миллион тонна йӧл поттонъя программаез быдэстон понна. Гуртоос та программаез ӟечен пумитазы. Ар пумозь 44  выль ферма ӝутэмын луоз. Ӵапак та ужъёслы ик мыноз 200 миллион манет. Кылем арен ӵошатыса, туэ огъя йӧл поттон йылӥз 5,5 процентлы. Но мон огпол гинэ ӧй вералля ни: йӧл поттонэз 1 миллион тоннаозь вуттэммы потэ ке, арлы быдэ 7 процентлы тросгес кыскыны кулэ. Малпасько, гуртоос та ужпумез быдэстозы.

Озьыен, сессиын кутэм ватсанъёсты лыдэ басьтыса, республикалэн бюджетэз оглом 6 миллиард 760 миллион манетлы будӥз.  Бюджетлэн расход люкетэз 70 миллиард 456 миллион манетозь вуиз. Нош доходэз — 66 миллиард пала. Бюджетлэн дефицитэз азьвыл кадь ик — 4 миллиард 300 миллион манет — кылиз.

— 2016-тӥ арлы бюджетэ та витетӥзэ кутэм ватсанъёс ни, — пусйиз Софья Широбокова. — Азьвыл ми коньдонэз шыръян сярысьгес сюлмаськиськом ке вал, таосыз воштонъёс — чылкак мукетэсь. Ми оскиськом, Удмуртилэн Тӧроезлэн, Кун Кенешлэн, Правительстволэн но асьме предприятиослэн тыршемзылы луыса бюджетэз уж вылын быдэстыны быгатом.

Шаерысьтымы экономикалэсь азинскемзэ ӟечен пусйиз Кун Кенешлэн Тӧроез Владимир Невоструев но.

— Бюджетэ ватсаса коньдон вуэ ке, котьку шумпотоно. Но туннэ мон тужгес шумпотӥсько гуртоос понна, — шуиз Владимир Петрович. — Миллион тонна йӧл поттонъя программа — со огшоры кылъёс гинэ ӧвӧл, со зэмос ужъёс. Нош та удыслы висъям коньдон — гуртоослы ӟеч юрттэт.

Елена Миннигараева

Удмурт Дунне
By Удмурт Дунне 5 октября, 2016 10:22