«Удмурт нылкышно кенеш» котькуд семья дорозь вуттӥське

Удмурт Дунне
By Удмурт Дунне Октябрь 10, 2016 10:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
«Удмурт нылкышно кенешен» кивалтӥсь Н. Степанова.

«Удмурт нылкышно кенешен» кивалтӥсь Н. Степанова.

Кылзӥсь, юрттӥсь, бурдъясь

«Удмурт нылкышно кенеш» огазеяськонэн 11-тӥ арзэ кивалтэ ни Надежда Степанова. 25-тӥ коньывуонэ огазеяськонлэн йылпумъянъёс лэсьтонъя конференциез ортчоз.

— 2003-тӥ арын «Удмурт нылкышно кенешен» Галина Никитина тодосчи кивалтэ вал. Мон правленилэн ёзчиез.  Ужасько удмурт радиоын, нылкышноослы «Ибырвесь» передача нуисько. Галина Аркадьевна шуиз: наукаен выреме потэ, егитъёс, ойдолэ мон интые, тӥляд пӧрмоз. Пие будэ, ма сюлмаськытэ нылкышноез, тодӥсько, ужрадъёсы ветлылӥсько. Соглаш кариськи. Лӧптэм мылкыдын вамыштӥ быръёнъёсъя конференцие. Но соку Галина Аркадьевнаез ни куризы: эн кошке, тӥляд дырды тырмоз наукаен но, общественной ужен но вырыны. Мон Галина Аркадьевна вӧзын ужало, солэсь дышетско шуи. Озьы солэн воштӥсез луи. Но отӥяз Галина Аркадьевна, интыяз монэ кельтыса, дырызлэсь вазь «Удмурт нылкышно кенешысь» кошкиз. Кивалтӥсе монэ юнматӥзы ни 2005-тӥ арын конференция дыръя.

Малпай: ужаны кулэ анайёсын, семьяосын. Соку «Табань» клуб кылдытӥм. Нимзэ Удмуртиысь калык артистка Надежда Уткина дэмлаз. Котырамы люканы быгатӥмы нылпи садъёсысь удмурт воспитательёсты. Озьы Ижысь К. Герд нимо гимназиын «Зарни бугор» клуб кылдытӥм. Дэмен ужаса, клуб бордысь потӥз «Пичи чеберайёс но батыръёс» конкурс, со али быдэс шаерамы бренд кадь луиз ни.

— Малпам проектъёсты пӧлысь ваньмыз сямен али но уло кадь…

— Ог 60 процентэз  азинтӥське. Малы удмуртлыкын сомында шуг-секытъёс? Ужан амалъёс системалы уг пӧрмо. Кутскыны кутскиськом, нош азинтыны ум пӧрмытӥське. Кема аръёс ӵоже «Удмурт нылкышно кенешен» кивалтӥсько, темаосты муромытыса азинтӥсько, соин ик проектъёс уло. Туж сюбег ужаськоды шуисез вань. Но со валтӥсь ӧрмы, со вал но луоз. «Нылкышно кенеш» нырысь ик огазея анайёсты. Кызьы ужано семьяосын, туж ӧжытэз тодо. Туннэ верасько: милям со амалъёсмы вань. Психологъёсын, «Кенешом» проектэн, гуртъёсы потаны кутскимы. Гуртоос понна со нырысь валантэм вал. Калык пумиськонэ лыктэ но кылзӥське. Нош нимысьтыз консультацие кыльыны ӧз дӥсьтылэ — асьмеос дышемын уго пушкамы ватӥськыса улыны. Шумпотӥсько: шедьтӥ удмурт кылын вераськись психологъёсты. Галина Чучалова трос саклык висъялляз юонэн нюръяськонлы. Ольга Глухова дышетэ: шудо анай вордэ шудо нылпиосты. Ольга Смирнова нылпиосын ужа. Адямиос усьтӥськыны, визь-кенеш юаны ӧдъязы. Нылкышноос шуо: тӥледыз кылзыса, улэм ик потыны кутске.

Нимысьтыз семинаръёс радъяны чакласькомы. Семьяос пӧртэмесь луо. Котькудӥзлэн аслаз куректонэз, аслаз шумпотонэз. Котькудӥзлы юрттыны мед быгатомы. Мон ачим олокыӵе но вакытъёсы вуылӥ. Мон тодӥсько вань ужпумъёсты: нылкышно но ужтэк кылён, нылкышно но люкиськон, нылкышно но юись кузпалэн улон, нылкышно но оген нылпи будэтон. Инмарлы тау, ваньмыз та пыр потыса, валасько пӧртэм нылкышноосты, соос понна ужаме потэ.

Туннэ удмурт кылын ӧвӧл кыӵе ке ужрадъёс ортчытонъя нимысьтыз сборник. Усьтӥд но, ваньмыз гожтэмын мед луоз кадь. Но ваньзэ аслыд утчано. Анайлы сӥзем кинлэн кыӵе ужрадъёсыз ёросъёсын вань, ваньзэ люкаськом. Кылсярысь, Алнашысь ёзэнымы кивалтӥсь Валентина Иванова котькуд ар Анайлэсь нуналзэ пӧртэм сямен радъя. Огаз аре котькуд гурт поселениысь трос нылпиё анайёсты люказ. Котькудӥз сярысь нимысьтыз презентация возьматӥз. Мукет араз нырысьсэ ӝутӥзы секыт темаез: нылпизэс оген будэтӥсь анайёс. Соосты люказы. Ужрад бере огез кышномурт шуэ: семьялэн я анайлэн нуналыз луэ ке, милемыз ноку уг ӧтё, нылпиосмес адӟем карымон будэтӥськомы ке но. Туннэ асме адямиен лыдъяны кутски, пе.

Гуртъёсын потэ анайёслэсь клубъёссэс кылдытэме. Нылкышно клубъёс ужало ни. Соос туж кулэ. Кытын но отын уго культурая юртсы гинэ но ӧвӧл. Нылкышноослэн гур азьын гинэ пукемзы уг поты. Пичи Пурга ёросысь Гожнялан «Ибырвесь» клуб кылдытӥм. Нылкышноос асьсэос гуртэ гур пуктытӥзы — огазеясь сэрег лэсьтытӥзы.

— Таӵе вормонъёс ик бурдъяло, луоз?

— Туж трос кужым сёто. Берло арзэ ужамы гурт поселениосын. Озьы  быгатӥмы 11 школаосысь 1-тӥ классъёсын удмурт кылъя урокъёс усьтыны. Кылсярысь, Дэри ёросысь Хохрякиын ноку удмурт кыллы ӧз дышетылэ. Али нылпиос урокъёсы туж мыло-кыдо ветло. Таӵе вормонъёслы луыса ик ужаськод. Туж потэ удмурт кылын вераськись шудонъёс лэсьтонъя проектэз улонэ пыӵатэме.

Ижын  семьяос понна «Шудон корка» клублэсь ужамзэ азьланьтом. Ижын трос ӧвӧл пиналзэс удмурт будэтӥсь анайёс. Аслам нылы пичи на бере, тае туж умой валасько. К. Чуковскийлэсь кылбуръёссэ нылылы лыдӟисько. Со уг вала ӟуч кылэз. Котькудзэ сямен удмуртэ берыктӥ. Яратоно книгаез луиз, ява. Тросэз анайёс озьы берыкто ук. Со берыктэмъёсты люканы но бичет поттыны умой луысал.

Алигес вуылӥ Финляндие. Отын радъямын вал нимысьтыз дышетскон: калык огазеяськонъёслэн кылэз утёнын интызы. Мыным потӥз: мукетъёслэн коньдонзы но проектъёсын вырыны вань. Но мыло-кыдо ужасьёссы ӧвӧлгес. Асьмелэн пиналъёсмы верасько ай удмурт кылын.  Со удмурт анайлэн кужымезлы луыса. Сыӵе анайёсты тросгес возьматоно, ваньмыз соос сярысь мед тодозы. Куддыр киос юскисько, но ӵапак сыӵеос шоры учкыса, кужым пыре.

— Асьтэ семьядылы дырды кыле-а?

— Весь калык пӧлын улэменым, быдэ вуэм пие дышетэ: пичи сузэрелы тросгес дыр висъяны кулэ. Пумитаз вазисько: удмурт движенилы луыса но тон удмурт луид ук. Удмуртлыкез азинтон сюрес капчи ӧвӧл. Но туннэ мон понна со тужгес шонерез сюрес.

Елена Сараматова

 

Удмурт Дунне
By Удмурт Дунне Октябрь 10, 2016 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<