Татьяна Миннияхметова удмуртъёс сярысь маде 16 кылын

Удмурт Дунне
By Удмурт Дунне 10 октября, 2016 13:06
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Дунне ныл

Австриысь Инсбрук карын трос аръёс ӵоже ни улэ тодмо удмурт этнограф, философия наукаосъя доктор Татьяна Миннияхметова. Инсбрукысен Ижозь — 3 сюрс 712 иськем. Но та сюресэз Татьяна араз кык-куинь пол ортче, угось мӧзме дорезлэсь, удмуртъёслэсь.

miniyakhmetova

Этногаф Т. Миннияхметова улэ Австриын, но ӵем вуылэ дораз.

Буйгасьтэм

1980-тӥ-1990-тӥ аръёс, егит тодосчи камсьӧр удмуртъёслэн сям-йылолъёссылы сӥзем диссертация гожъя. Со понна Татьяна Миннияхметова пыдлось гуртъёсысь удмурт песянайёс дортӥ ветлэ. Нялтас мынӥсь машинаос соку шер пумиськыло вал. Огпол гуртысь гуртэ ветлонъяз нылашлэн пыдъёсыз сокем нярӟизы-пульсазы, азьлань но, берлань но вамыштэмез уг ни луы. Татьяна сюрес урдсы пуксиз — чидантэм вӧсь! Нош гурт дорозь эшшо 25 километр вамышъяно. Озьы ке но нылаш султӥз, пыдызлэн урдэсъёсаз гинэ лёгаськыса, азьлань конгыльтӥз. Ярам, шудэз вылэм на, мотикен лыктӥсьёс шедизы. Асьсэос воксё мукет пала мыно ке но вал, нылашез пуктӥзы, матысь гуртэ вуттӥзы, одӥгаз семьяе кельтӥзы. Отын, пыдъёссэ адӟыса, воксё чабкиськизы. Нылашез эмъязы, сюрес вылэ потыны ӧз лэзе ни. Но Татьянаез возёд шат? Солэн быдэс улонэз — азьлань вамышъян, усьылонъёс но выльысь ӝутсконъёс пыр.

Удмурт кун университетысь удмурт филология факультетэз йылпумъяса, Татьяна Башкортостанысь Бурай ёросысь вордӥськем Байшады гуртаз бертӥз. Ӝоген сое, 23 аресъем нылашез, школалы директоре пуктӥзы. Нош 3 ар ортчыса, калыкез дышетонъя отличник ним сётӥзы. Ваньмыз огсыр радъяське вал. Но Татьяналэн сюлэмыз буйганы ӧз вала. Иже вуылыкуз, нош ик пумиськиз дипломъя кивалтӥсеныз   Людмила Христолюбова тодосчиен. Солэн ӝуткамезъя наукая статьяос гожъяны кутскиз, камсьӧр удмуртъёслэсь сям-йылолъёссэс эскериз. Ужаз Удмуртиысь шаертодонъя музейын, Историяя, кылъя но литературая институтын, Уфаысь этнологиез эскеронъя институтын. Собере дышетӥз Эстониысь Тартуысь университетын, Венгриысь Печ карысь университетын. Нош берло 14 арзэ Австриысь Инсбрук карысь Историяя но Европаысь этнологияя университетын ужа.

Татьяна Миннияхметова кабинетын пукись огшоры этнограф ӧвӧл. Со — полевой этнограф, калыклэсь сям-йылолъёссэ эскере, экспедициосы потаса. Солэн эшез, тодосчи Елена Попова верамъя, полевой этнографез, самолётэн нуыса, дуннелэн котькыӵе сэрегаз кушты, со вань шуг-секытъёсты вормоз, эшшо ке мукетъёсызлы юрттоз на.

 Кылзон но кылон

Малы Австрия? Аслаз Татьяналэн верамезъя, докторантуразэ йылпумъямез бере со Иже но Уфае вуылӥз, но та каръёсын солы инты ӧз шедьы. Оло вакытэз сыӵеен, оло кылдэмез озьы вал. Со понна тодосчиез огдырлы ужаны Австрие ӧтизы. Нырысь вакытэ туж мӧзмиз вордӥськем палъёсызлэсь. Но пумен-пумен дышиз.

— Немец кылэз дышетоно луи 42 аресам, Австрие лыктыса гинэ, — тодаз вае тодосчи. — Отчыозь пал кыл но вераны ӧй быгатылы. Выль кылэз дышетон понна ваньзэ сюлэм пыртӥ поттоно луиз. Кылэн ӵош Австриысь калыкез, отысь улонзэ тодоно-валано на вал. Палэнысен гинэ ваньмыз капчи адӟиське. Али мон туж зол валасько: макем секыт со лулсэрлы — выль улонлы дышон, собере азьлань вамыштон но азьпалтон.

Али Татьяна Миннияхметова 16 пӧртэм кылэз тодэ, 8-эныз эркын вераське: ӟуч, удмурт, бигер, башкир, чуваш, пор, венгер, эстон, фин, англи, француз, немец, турецкой… Нош гожъямъёсты берыктылӥз ни 25 кылысь.

Сомында кылъёсты тодыса, сураськонъёс уг луо-а? Луыло, пе.

— Туннэ тон одӥгаз кунын, нош ӵуказе — мукетаз, — серектэ Татьяна. — Одӥгысьтыз мукет кылэ ӝог выжоно луэ. Шуом, мон Эстониын вераськисько, собере, ачим ик шуак луыса, юасько: «Нош мон али эстон сямен-а верай?» Берло дыре тросгес немец кылын вераськоно луэ. Соин куд-огез али пыкылэ: англи кылын, пе, немец акцентэн вазиськод ни. Мон тодӥсько, удмурт сямен но камсьӧр удмуртъёслэн диалектэнызы вераськисько. Но тазэ сямме воштэме уг поты. Со мынам выжы шӧдонэ, мусо кылы но калыке. Озьы верасько экспедициосын пумиталлям пересьёсы. Соос али но син азям. Валамон, мурт азьын соос соку ик уз усьтӥське, мар кулэ, сое гинэ вералозы. Соин ик пукиськод вал, нырысь улон-вылонзы сярысь юалляськыса, кылзыса. Кыӵе но секытъёс пыр потэмын ӧвӧл пересьёс! Собере пумен-пумен аслэсьтыд юанъёстэ сётӥськод ни. Туж шумпотӥсько, камсьӧр удмуртъёс сярысь трос материал люкай шуыса. Ваньмыз со пыраклы вунысал ук…

 Иськемъёс пыр

Татьяна Миннияхметоваез, солэсь ужъёссэ, книгаоссэ ӟечгес тодо, дыр, Европаын. Тодосчи Иже шер вуылэ, дыртэ Башкортостанысь Бурай ёросысь вордӥськем гуртаз. Но таяз радэ со юромо Удмуртие лыктоно кариськиз «Мудор: сакральное пространство в культуре народов Урало-Поволжья» симпозиуме пыриськон вылысь. Та нуналъёсы ик Национальной библиотекаын ужасьёс Татьяна Миннияхметоваен пумиськон, выль книгаосыныз тодматскон радъяно кариськизы. Ваньмыз сокем ӟеч тупаз кадь, но… сюрс иськемъёсты котьку сямен капчиен выжыны ӧз пӧрмы. Кыӵе ке валантэм мугъёсъя самолёт омыре ӧз ӝутскы. Кин ке киыныз шонтысал, нунал-кык возьмасал, дыр, мукет рейсэз. Но Миннияхметова озьы улыны дышемын ӧвӧл! Иже тупатэм дырлы мед вуоз шуыса, тодосчи 5 пӧртэм самолётэн, кӧня ке городъёсын пересадка лэсьтыса, лобиз. Удмуртиысь эшъёсыз доры, библиотекалэн шуныт «Тӧро сэрегаз» со дыраз вуиз, пумиськонэ лыктэм егитъёслы но мӧйыослы ачиз лобон бурдъёс кузьмаз кадь.

Татьяна Миннияхметоваен пумиськонэ лыктэмъёс, солэн улон сюресэныз сяна, тодматскизы берло потэм книгаосыныз но. Кылсярысь, одӥгаз люкамын тодмо фин тодосчилэн Уно Хольмберглэн 1911-тӥ но 1913-тӥ аръёсы удмуртъёс но поръёс доры вуылэмез сярысь гожтэтъёсыз. Тодосчилэн верамезъя, соос сокем тунсыкоесь, сокем яркыт усьто огшоры адямиослэсь нуналмысь улонзэс — лыдӟыкуд ачид но со вакытъёсы вуиськод кадь.

— Даур талэсь азьло Уно Хольмберг туж шуныт гожъяз удмуртъёс сярысь. Соослэн улон-вылонзылы но улонэз валамзылы паймылӥз, — шуэ Татьяна Миннияхметова. — Удмуртъёслэн, пе, вӧсяськон интыоссы нюлэскын, туж шулдыр интыын, сяськаос пӧлын. Фин тодосчи аслэсьтыз юа: кыӵе гинэ зарниям черкъёсын вӧсяськонэн сое ӵошатыны луоз меда? Собере ачиз ик шуэ: инкуазь чеберын тазьы улӥсь адямиослэн котьку ваньмыз умой луыны кулэ…

 Мурт ӧвӧл

Татьяна Миннияхметовалэн тужгес тодмо книгаосыз: «Удмурты Башкортостана: история, культура, современность», «Календарные обряды закамских удмуртов», «Традиционные обряды закамских удмуртов: Структура. Семантика. Фольклор», «Ми бурай удмуртъёс», «Az ismeretlen ismerоs…» (венг. кылын «Та тодмотэм тодмо») но мукет. Со сяна, та кышномурт трос пӧртэм наукая бичетъёсты люкан бордын тырше. Этнологъёслэн но фольклористъёслэн калыккуспо огазеяськоназы ужаса, кемалась ӧвӧл 600 бамъем выль бичет дасяз. Отчы пыризы дуннеысь пӧртэм калыкъёслэн тунаськонэн, веднаськонэн, пӧртэм кужымъёслы осконэн герӟаськем сямъёссы.

— Та проект туж трос кужымез кыскиз, — шуэ тодосчи. — Котькуд статьялэн автореныз электрон почта пыр кусып возёно луиз, оглом 1 сюрслэсь трос гожтэтъёс вал. Текстъёсазы одӥг янгышез но, валамтэез но медаз кыльы шуыса сюлмаськи.

Татьяналэсь лекциоссэ шумпотыса пумитало Венгриын, Финляндиын, Эстониын, Англиын, Шотландиын, Чехиын но трос мукет кунъёсын. Котькытын со возьматэ удмуртъёслэсь сям-йылолъёссэс, культуразэс. Но аслаз будэмез понна тау каре удмурт тодосчиослы — Людмила Христолюбовалы, Валентин Кельмаковлы, Владимир Владыкинлы, Александр Шкляевлы.

— Татьяна Миннияхметовалэн книгаосыз УдГУ-ысь студентъёс понна нуналлы быдэ ӝӧк вылын возён книгаос кадь луо, — Национальной библиотекаын пумиськон дыръя пусйиз филология наукаосъя кандидат Галина Глухова. — Кин быгатоз на удмуртъёс сярысь англи кылын сыӵе чебер гожтыны, вераны, удмуртъёсты быдэс дуннелы сыӵе лад-лад возьматыны…

— Татьяналы ми егит дырысеныз ик туж паймиськом вал, — пусйиз педагогика наукаосъя кандидат Светлана Арекеева но. — Яркыт, шаплы, визьмо. Со дыре ик Татьяна пуш ласянь котьку туж эрико вал. Эрико луэменыз ик со улонын сомында лэсьтыса вуттӥз ни, дыр.

Зэм но, 55 аресъем тодосчилэн пуш эрикезлы, кужымезлы, улон шоры капчиен учкемезлы али но паймоно. Нош кунгож сьӧрысь эшъёсыз паймо мукетызлы: малы Татьяна али но Австрилэн кунмуртэз уг кариськы, соку солэн трос выль луонлыкъёсыз усьтӥськысалзы ук. Нош ачиз тодосчи шуэ:

— Мон улӥсько Инсбрукысь туж чебер интыын, гурезьёс вискын, пичи ты дурын. Австриын одӥг гинэ гражданство луыны кулэ. Озьыен, мыным Россия но Австрия куспын быръёно. Но кызьы мон вордӥськем шаерам мурт луыса бертылом?! Мон — Россилэн гражданинэз! Удмуртъёслэсь монэ уно сюрс иськемъёс висъяло ке но, соос котьку вӧзам, йырам-сюлэмам.

Елена Миннигараева

 

 

 

 

Удмурт Дунне
By Удмурт Дунне 10 октября, 2016 13:06 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<