Спорт сузьет: Зарни арлыдоос но 96 миллион вамыш

Удмурт Дунне
By Удмурт Дунне 7 октября, 2016 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Пыдын ветлон

96 миллион вамыш

Кылем шутэтскон нуналъёсы шаерамы ортчиз «Удмуртиысь кругосветка» ужрад.

Ижысь но шаерысьтымы 14 ёросысь пыдын ветлыны яратӥсьёс 19 сюрс кузя люкаськизы. Котькуд адями 2-сен 30 иськемез ортчиз, ужрадэз радъясьёс лыдъямъя, та нуналэ огъя 96 миллион вамыш лэсьтэмын вал. 137 мурт спорт туризмъя ГТО-лэсь куронзэ быдэстӥз на, со пӧлысь 72-ез ГТО-лэсь зарни значоксэ басьтӥз.

Спартакиада

Командалы 2 зарни

Тулаын йылпумъяськиз Россиысь пенсионеръёслэн 3-тӥ спартакиадазы.

Ужрадэ 65 улосысь 550 арлыдо спортсменъёс пыриськизы. Удмуртиысь 8 мурт ветлӥзы. Пӧлысьтызы кыкез зарни медаль басьтӥзы: Ярысь Юлия Рудина ваньзэ азьпалтӥз пыдын бызьылонын, нош Воткаысь Валерий Анциферов котькинлэсь кужмо вал ӝӧк выл теннисэн шудонын. Огъя зачётын Удмуртиысь команда 8-тӥ инты басьтӥз, кылем арен ӵошатыса, одӥг пагӟалы вылӥегес ӝутскиз.

Кужмоез семья

3-тӥ инты дано

Кизнерысь Кощеевъёслэн семьязы Россиысь спортэз яратӥсь семьяослэн вожвылъяськоназы пыриськиз.

Та семьяез 4-тӥ октябре Кизнерысь вокзалын быдэс ёросэн пумитазы, шуыны луоз. Бадӟым вожвылъяськон Кощеевъёс понна кемалы вунонтэм кылёз. Гужем куазен куасэн бызьылӥллям. Усьылыса но полуфиналэ соос шедиллям. Ӟырдыт йӧтэм финалын. Бызьылэм-тэтчам сяна, Россиысь дано спортсменъёс сярысь но соослэн вормонъёссы сярысь тодыны кулэ вылэм. 4 семья пӧлысь 3-тӥ интые потэмзылы Кощеевъёс туж шумпото.

Параспорт

Кутсконэз ӟеч

Та нуналъёсы Омскын ортче инвалид спортсменъёслэн трекетӥ великен ворттылонъя Россилэн чемпионатэз.

Ӵошатсконэ пырисько 11 улосысь 25 спортсменъёс. Удмуртилэсь данзэ утё Сергей Пудов но Арслан Гильмутдинов. Кыкназы ик зарни медальёс утӥзы: С. Пудов 1000 но 4000 метре ворттылонын, А. Гильмутдинов — 1000 метре ворттылонын. Ӵошатскон азьланьтӥське на.

Валентина Емельянова

Удмурт Дунне
By Удмурт Дунне 7 октября, 2016 13:30 Updated