Скаллэсь кышкан ортче

Удмурт Дунне
By Удмурт Дунне Октябрь 7, 2016 08:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Вотка ёросысь «Пихтовка» хозяйствоысь устоез доярка В. Кузнецова.

Вотка ёросысь «Пихтовка» хозяйствоысь устоез доярка В. Кузнецова.

Вотка ёросысь Пихтовка черкогуртысь Валентина Кузнецова егит дыръяз суредась луон мылкыдын улӥз. Но улон сое скал кыскисе кутскыны косӥз.  Татын но со ужез шоры творчество шоры кадь учке.

— Пичи дыръям котьку шуисько вал: будӥ ке, художник луо, — вера Валентина Николаевна. — Оломалы сокем-сокем кельше вал суредаськыны. Но ӵыжы-выжыосы мылкыдме берыктӥзы: семьядэ, пе, сюдыны уд быгаты. Апае али ке но суредаське, нош племянницае Санкт-Петербургын та удысъя тодон-валанзэ будэтэ. Воткаысь училищеез йылпумъяй, штукатур-маляр луи. Быгатонлыкъёсме адӟыса, тодон-валанме будэтыны Казане ысто вал. Но сюранае шуиз: тонэ дышетыны луонлыке ӧвӧл. Котьма ке но номыр сярысь уг жаляськы. Воткаын мон пумитай мужикме (картме). Вордскем Шаркан палъёсам со бертыны ӧз лэзьы ни — сьӧраз Пихтовка гуртэ вайиз. Мужике сьӧрысь ӧй кыльы: со трактористын ужа бере, мон но артэ тыршоно кариськи — скал кыскисе куриськи.

Ноку уг вунэты нырысетӥ ужан нуналъёсме. Мыным 18 арес, мугоры пичи. Скалъёс бадӟымесь. Шоразы учкыса ик, сюлэм оломар луылӥз. Абдралляй Наталья Лопатина бригадирмылы: кызьы меда скалъёс солэсь кылзӥсько? Дыр ортчемъя валай: котькуд скаллэн аслаз сямыз, котькудзэ гажано, соку тонэ но вӧсь уз каре.  Но тае валатозь, кӧня синву кисьтӥ! Соку ай ваньзэ скалъёсты киын нуналаз 3 пол кысконо вал. Котькудмылэн 15 скал. Котькудӥз быдэс ведра йӧл сётэ. Киосы ик тӧрнало вал! Суйёсы висемысь, жадемысьтым, синвуосы бам кузям шатыр вияллязы. Кызьы суредаськон сярысь малпалод на? Нош кӧня пол быжынызы йыгазы, ӵыжазы! Тау арлыдо дояркаослы — котьку юрттылӥзы. Али ке но малпасько: соос ужаны ӧй бурдъясалзы ке, оло, скал кыскон удысысь кошкысал.

Валентина Кузнецовалэн котькыӵе мылкыдъёсыз вылэм. Мужиксэ Иже кошкыны но ӧтьылэм. Нылкышнолы Ижысь огаз лэсьтӥськонъя фирмаын бригадир луыны ӵектылӥзы, карттэ но интыялом, квартира сётом, шуизы вал. Но мужикез чурыт вазем: семьяын мон пичиез пи, кытчы анай-атайме кельтом? Валентина Николаевна нокытчы ӧз ӝутӥськы ни.

— Али уж но трослы каньылгес луиз — ог 30 арзэ ни молокопроводэн улӥськомы.  Дэмен кенешыса ужаны тыршиськомы. Котькудӥз ачизъя ужасалыз ке, таӵе бадӟымесь азинсконъёс басьтыны ӧй быгатысалмы.  Котькуд скаллэсь нуналаз 23 литр йӧл кыскиськом. Кылем арын сярысь, та ӝыны литрлы уногес. Пӧсь куазен  лыдпусъёсмы усьылӥзы ик.

Хозяйство скал кыскисьёслы нуналлы быдэ ӝыны литр йӧл сётэ. Сое люканы, собере суменак басьтыны луэ. 20 кило чорыг ар ӵоже висъя на. Ужамъя ужам потоз! Соин но гуртэ егитъёс кылё. Скал кыскисе пиос но кутско. Куд-ог ёросъёсын талы туж абдрало.

Милям кивалтӥсьмы, Георгий Крылов, котьку калык пала кариське. Садэз, школаез возе, гуртоослы пуктӥськыны юрттэ. 2015-тӥ арын хозяйство монэ мужикеным ӵош Уваысь санаторие тазалыкме юнматыны ысъяз. Асьмеос копейка но со понна ӧм тыре. Куд-ог ёросъёсын ужасьёс тазьы улэм-вылэммылы туж паймо. Сыӵе кивалтӥсь, сыӵе юрттэт вань ке, со туж бадӟым пыкъет. Кенешонъёс дыръя но кивалтӥсьмы калыклы тау каре, тӥляд ужам ужды вылын хозяйство возиське, шуэ. Та сюлэмез туж шунтэ. Эшшо но золгес ужам потэ. Мынам пичиез пие но хозяйствое ужаны кылиз. Али корка пуктэ. Бадӟымез пие — военной.

Валентина Кузнецовалы, пенсие потытозяз, 5 ар ужаны кылемын. Но со гань-гань кариськыны уг дырты. Ас вакытаз сое ужаны дышетӥз зоотехник Елизавета Васильева. Соос ӵошен дасяськылӥзы шаерысьтымы скал кыскисьёс пӧлын ортчылӥсь вожвылъяськонъёслы. Отын Валентина Николаевна кӧня ке пол чемпион луылӥз. Берлозэ вормиз 2002-тӥ арын. Элькунамы устоез доярка луэмез солы луонлык сётӥз шаермылэсь данзэ Россиын но утьыны. Татын но со возьытэ ӧз усьы. Ӵапак сыӵе вожвылъяськон бере Валентина Кузнецова аслыз шуиз: аслэсьтым ужаны быгатэмме возьматӥ ни, табере егитъёсты конкурсэ дасяно. Озьы Валентина Николаевна одӥг-огзэ ӵошатсконэ дасяз, чемпионэ поттӥз. Нялтас вераса, «Пихтовка» хозяйствоысь потӥз ни шаерысьтымы 5 абсолютной чемпион.

— Россиысь дояркаос пӧлын ортчылӥсь ӵо-шатсконъёслы ӵем дасяськоно луэ. Соин ик али милемлы туала скал кыскон зал кулэ. Али уго ваньмыз компьютерен лэсьтӥське. Милям со ӧвӧл на.  Но хозяйствоын гид пукто. Пумен выль сямен но ужаны кутскомы. Вань тодэм-валамме егитъёслы кельтэме потэ. Пенсие потыса, соосын мед данъяськом.

Елена Сараматова

Удмурт Дунне
By Удмурт Дунне Октябрь 7, 2016 08:18 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<