«Шулдыр ӝытысь» шулдыр династия

Удмурт Дунне
By Удмурт Дунне Октябрь 28, 2016 10:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Н. Ушакова

Н. Ушакова

«Шулдыр ӝыт» ансамблен кивалтэ егит кырӟась Наталья Ушакова.  Анаез — Россиысь дано, Удмуртиысь калык артистка Галина Платонова. Атаез — Россиысь дано артист, удмурт маскарчи Анатолий Ушаков. Соос нылзылы пыӵатыса вуттӥллям крезьгурез шӧдыны, учкисьёслэсь сюлэмъёссэс бугыртыны, сцена вылын астэ йӧно возьыны быгатонлык. Наталья семья кылдытӥз егит артистэн Андрей Камалтдиновен. Будэто Ева нылзэс.

 Сюлэм шутэтске сцена вылын

— Наташа, анай-атаед сцена вылысь ӧз поталлялэ. Тонэ гастрольёсы ялан сьӧразы кутылӥзы. Соин ик чик ӧз пайме, дыр, нылзы но та удысэ кыстӥськиз шуыса?

— Пичи дыръям мон ноку ӧй малпалля, кырӟась луо шуыса. Школаысь бертыкум, сюресэ одӥг вал — филармоние анай-атай доры. Отын Валерий Яковлевич Митрофанов, филармонилэн азьвыл чеберлыкъя кивалтӥсез, бордам юанъёсын тэбиньылӥз: Наташа, ку сцена вылэ потод ини? Мыным соку артистлэн ужез тунсыко уг поты вал. Соин Валерий Яковлевичлэсь пегаса ветлылӥ. Сцена сярысь юанъёсызлы мар вераны уг тодӥськы вал.

Анае-атае сьӧры гастрольёсы, 7 арес тырмытозям, поталляй. Гастрольёс мон понна праздник выллем вал. Автобусэ пуксиськомы гинэ — «Шулдыр ӝытысь» кырӟась Геннадий Ганьков монэ серекъятыны кутске ини. Куаразэ вошъяса, олокызьы но маскаръяське. Я Б. Ельцин кариське, я «Пурысь кечпи» кырӟанэз нёръя.

Мукетыз кырӟась но — Вячеслав Дуркин — монэ юмоке ӵем вуттылэ вал. Огпол гастрольёс дыръя гримёркаысь небыт пукон вылэ анаелэсь чильк-вальк шубазэ пуктэм. Бордаз изьызэ кышетэн думем. Мон отчы пыри но лӧптӥ: о-о, концерт йылпумъяськиз, озьыен, анаез ӟыгыртыны луоз! Пукон доры бызьыса ик мынӥсько. Шубалэсь кизэ маялляны кутски но… анае ӧвӧл. Эх, Дуркинлы йыры кур луиз ук! Но ӧй куатаськы. Артистъёслэсь горемзэс адӟыса, кит-кит серекъяны кутски.

Анай-атай вӧзын.

Анай-атай вӧзын.

Сцена вылэ потон азязы анае но атае ӝот-ӝот верало вал: концерт бырытозь, шыпыт шудӥськод, суредаськиськод! Мон кылзӥськылӥ. Ужаны ӧй люкетылы. Но огпол соосты паймытӥ. Концерт йылпумъяськиз. Анае но атае, учкисьёслы тау карыса, йыбыртто. Огпол, 2 пол, 5 пол — лыдъясько ас поннам. Тодӥсько вал: артистъёс, 5 пол мыкырскыса, катанчи сьӧры кошко ини. Соин лӧптыса ик сцена вылэ вамыштӥ. Но анае-атае борды ӟыгырски но… куалектӥ. Залысь одӥг адями но кошкемын ӧвӧл. Монэ адӟыса, эшшо золгес! чабыны ӧдъязы. Соку артистъёс, оло, 10 пол йыбырттӥзы.  

— Анаедлэн но атаедлэн данзы юрттӥз яке люкетӥз тыныд творчество удысэ, сцена вылэ вамыш лэсьтыны?

— Нырысь-валысь соослэн данзы мыным туж юрттылӥз. Афишае анаелэн нимыз вӧзы мынэсьтымзэ но гожъяллязы. Учкисьлы тунсыко потыны ӧдъяз, кыӵе ай та Ушаковлэн но Платоновалэн нылзы: чебер-а тусыз, жингрес-а куараез? Сцена вылын кырӟамме-эктэмме пыр-пыр учкылӥзы. Концерт бере юанъёсынызы тэбиньылӥзы. Мыным, 18 аресъем нылашлы, со туж кельшылӥз. Аслым пичи кизили потыны ӧдъяй.

Аръёс ортчемъя, культура удысэ мургес выйыса, талэсь акыльтыны кутски. Анай-атаелэн данзы шӧлкын кема ӧй улы. Кутски ас бордам зол ужаны. Шедьтӥ аслэсьтым ӧрме. Туннэ вань ини аслам кырӟанъёсы, учкисьёсы. Соин ик туж потэ, мед шуозы кадь: нош таиз — Наталья Ушакова!

Зэм, атаелэн уг поты вал, улонме сценаен мед герӟалом шуыса. Вералоз вал: секыт та уж — котьку сюрес вылын. Та кылъёсыз йырам туж умой кылизы. Соин ик 9-тӥ классозь крезьгуръя школаын дышетски ке но, азьлань улонме культураен ӧй герӟа. Пыри Удмурт кун университетысь кунсьӧр кылъёсъя факультетэ. Малпай: переводчик луыса Москваын яке Питерын ужало. Озьы удмуртсэ, ӟучсэ сяна, дышетӥ англи, француз но немец кылъёсты.

Но кырӟанлэсь но сценалэсь воксё ӧй куштӥськы. 2-тӥ курсысен кутски ужаны филармониын, «Шулдыр ӝыт» ансамбльын. Та уж мынэсьтым ог 70 процентсэ ваньмон вакытме басьтӥз.  «Шулдыр ӝытэн» пӧртэм фестивальёсы, пумиськонъёсы потаны кутски. Озьы шӧдыны ӧдъяй: сцена вылын мылкыд ӝутӥське, сюлэм гань-гань луэ!

 Сюрес кырӟантэк мӧзмыт

— Со вакытэ ик «Шулдыр ӝыт» ансамбль пушкын пичи группа кылдӥз — «Малпан».

— Зэм. Нырысь-валысь «Малпанын» Светлана Ручкина но Эльвира Панченко кыкназы ужазы. Берло ини бордазы мон итӥськи. Со вал туж тунсыко аръёс, нылъёсын кырӟаны-вераны мылкыдмы, дартмы пачылазы соку! Капчи, шулдыр кырӟанъёсмы егитъёслы но туж кельшизы. 3 ар ортчыса, «Малпанмы» ворсаськиз. Эля Санкт-Петербурге, Света Финляндие дышетскыны кошкизы. Ми валамы:  азьлань мыноно, мае ке но выльзэ эскероно.

Мон но малпаськонэ уси. Удмурт кун университетэз йылпумъяса, кытын ужалом? Дышетӥсь яке кылысь кылэ берыктӥсь луыса тыршоно ке, улонам уз луэ ини сцена, кырӟанъёс, учкисьёс… Пушкам соку ик мӧзмон каръяськиз, мылкыды пуксиз. Соку аслым ӝот-ӝот шуи: улонме культураен ик герӟало!

"Малпан" ансамбль.

«Малпан» ансамбль.

Удмурт кун университетысь выпускнойме кельтыса, Санкт-Петербургысь культурая но искусствоосъя университетысь режиссура факультетэ пыри. Мыным тунсыко вал: кызьы бадӟым представлениосты но концертъёсты радъяло, кызьы аспӧртэмлыко эстрада концерт номеръёсты дасяло. Дышетскыны капчи ӧй вал. Нырысь-валысь малпалляй, малы меда татчы мерски шуыса. Но берло ӧраз пыри — университетэз горд дипломен быдтӥ. Нялтас вераса: анае но, атае но дышетскизы Санкт-Петербургын.

— Анаедлэсь тыныд кырӟаны быгатон лякиськем, нош атаедлэсь — маскаръяськон сям?

— Эшъёсме, ӵыжы-выжыосме куспамы серекъятыны быгато. Сцена вылын профессионал музэн калыкез горытыны — уг. Маскаръяськон Россиын али паськыт вӧлмемын. Учкисьёслы кельшо «Комеди клаб» выллем передачаос. Ми но та удысэз тыршиськом азьланьтыны, угось удмурт сцена вылын та жанр шер кутылӥське. Кылсярысь, ньылетӥ арзэ ини ортчытӥськом Анатолий Ушаков нимо «Маскара» фестивалез. Отын выль маскарчиосты сцена вылэ поттыны тыршиськомы.

Атаелэсь сцена вылын маскаръяськемзэ видеокассетаос вылысь ӵем учкылӥсько. Туннэ но паймисько: кызьы со учкисьёслэсь сюлэмъёссэс сыӵе бордаз биньыны быгатӥз! Атаелы сӥзьыса ик, 21-тӥ октябре радъяломы выль сезонмылэсь нырысетӥ концертсэ — «Очей Толи» серекъян-маскаръяськон ӝытэз. Со Анатолий Ушаковлэн вордскемез дырысен 65 ар тырмонлы сӥземын. Отын семьямылэн архивысьтыз тунсыко видеосюжетъёсты, туспуктэмъёсты возьматомы, улонысьтыз учыръёсты тодамы ваёмы. Озьы ик та ӝытэ учкисьёсты серекъятозы атаелэн ӵош ужам эшъёсыз — элькунысьтымы тодмо но дано маскарчиос.

— «Шулдыр ӝытлы» вуоно арын 40 ар тырмоз. Та дыр куспын ансамблен кивалтӥзы атаед,  анаед, табере — тон. Секыт-а та биньгозыез валтыны?

— Капчи ӧвӧл. Тросэз адямиос ӵошато, кызьы «Шулдыр ӝыт» ансамбль ужаз, улӥз-вылӥз атае дыръя. Соин ик мыным, оло, кык поллы тросгес тыршоно — вылӥ тубатысь васьконо ӧвӧл. Секыт югдур кылдыку, вазиськисько анаелы. Угось солэн дэмланъёсыз котьку шонер но ӟеч луо.

«Шулдыр љыт» ансамбль.

«Шулдыр љыт» ансамбль.

Ансамбльмы ялан егитоме. Одӥгъёсыз кошко, мукетъёсыз вуо. Та бордысь уродзэ уг адӟиськы. Выль адями выль малпанъёсын лыктэ. Нош яркыт идеяос милемлы туж дуно. Угось репертуар бордын ужакумы, шуг-секытъёс ӵемысь кылдыло — ӧвӧл эстрадалы тупась ӟеч кырӟанъёс, та удысъя дышетскем крезьгурчиос. Соин ик куддыр вашкала но калык кырӟанъёсты, туала шӧм пыӵатыса, быдэсъяськомы.

Зэм, ми доры ӵем пырало самодеятельной крезьгурчиос. Но ужзэс фортепианоен шудӥськод но валаськод: гурез но, кылъёсыз но огшорыесь. Уд тодӥськы кызьы соослэсь «кампет» лэсьтыны. Ӵектӥськисьёслэсь одӥг-ог гинэ кырӟанзэс сцена вылэ поттӥськомы. Соин ик малпасько: оло, аслым кырӟан гожъян борды куаж-куаж басьтӥськоно ини? Но та ужен вырон понна кулэ вдохновение,  кулэ дыр.

— Вылысьтыз вылаз концертъёсы, гастрольёсы потаса, соос сюлэме, йыре кыльыса вутто-а?

— Одӥг концертмы но огдышем сямъя уг ортчы. Котькудӥз маиныз ке но вунонтэм кыле.

Башкириысь Улӥ Балтач удмурт гуртэ концертэн потӥмы. Клубазы крезьгур аппаратурамес пуктылӥмы-дасямы. Тани-тани концертмес усьтомы. Витьымтэ шорысь гудыръяны, зол тӧласькыны кутскиз. Сцена вылэ потыса ӧм вуттэ — быдэс гуртысь тыл тёпак кысӥз. Ми куалектӥмы: ма кароно? Ульчаын пеймыт. Берен уд кошкы — калык зал тыр люкаськемын. Озьы кенешимы: крезьгурен фонограмматэк улэп концерт возьматомы! Гуртоос но шаплы кариськизы: кытысь ке фонарикъёс, сюсьтылъёс шедьтӥзы. Озьы, я гитараен, я арганэн шудыса, быдэс концертмес ортчытӥмы.  Кырӟаку ритмез медам ыштэ шуыса, учкисьёс но зол юрттӥськизы — кичабонъёссы быдэс ӝыт ӧз чалме.

Красногорск ёросэ гастрольёсы потамы. Нунал куспын 2 концерт сётоно вал. Нуназе кырӟаммы-вераммы бере ӝытозь дырмы кылиз. Кенешимы: шутэтскомы возь вылын. Коркаослэн бакча беразы шобрет валимы, гань-гань шунды улын пыжиськомы. Вӧзамы ик скалъёс, ыжъёс турын сиё…

Огаз юртысь кузё бакчаяз потӥз. Милемыз адӟыса, шулӟектӥз. Мар вазьыны ик ӧз вала: ма, пе, та выжыкыл яке зэмос — «шулдыр ӝытъёс»-а та? Собере песянай чиптэм-чаптэм ышиз. Учкиськомы но — нош дорамы лыктэ. Огназ ӧвӧл — сьӧраз 10 пала бускельёссэ ваем. Юанъёсынызы согизы. Кырӟаны куро. Нош милям закон: шутэтскыкумы ум кырӟаське. Но яратоно учкисьёсмы понна мар но уд кары. 2-3 кырӟанмес быдэстӥмы. Гуртоос соку возь вылысь вань сяськаосты, дыр, ишкыса милемлы кузьмазы. Сылалтэм огречъёссэс, помидоръёссэс, варенняоссэс поттӥзы на. Та учырез гуртоос но, ми но кема тодамы ваёмы на.

Пичи дуннеын  шуныт

5-semya

Выль семья кылдӥз.

— Озьы пӧрмиз яке анай-атаедлэсь адӟем карид — семья кылдытӥд артистэн. Кызьы пумиськид Андрей Камалтдиновен?

— Андреен тодматскимы 2013-тӥ арын. Егит усточиослы сӥзем «Выль куара» шоу-проект ортчытыны малпамы. Отчы мон пинал кырӟасьёсты утчаны кутски. Ӵапак со вакытэ Интернетысь «ВКонтакте» бамын Андрей монэн тодматскыны мылкыд кариз. Туспуктэмъёссэ учки но пайми: тусыз — пиштӥсь, выжыез — удмурт, будэмын башкир музъем вылын. Кырӟанъёссэ кылзӥ но нош пайми — куараез аспӧртэмлыко чузъяське вылэм. Озьы ик тодматскеммы луиз. Андрей пыриськиз «Выль куара» проектамы. Отын 2-тӥ интые потӥз. Собере ини «Шулдыр ӝытэ» ужаны кылиз. Нырысьсэ ог-огмес адӟеммы бере ик яратонмы ӧз кенжы. Нуналысь нуналэ ӵошен тыршыса, шуныт мылкыд вордӥськиз.

— Сюан шудӥды шыпытак. Матысь эшъёсты но та сярысь тодытэк кылизы. Интернет бамъёсын но туспуктэмъёсты, мукет егит артистъёсын ӵошатыса, ичигес. Улон-вылондэс шарае поттэмды уг поты?

— Туала егит артистъёс катанчи сьӧрысь улонзэс калык азе вӧлак потто: мар соос туннэ сиё, кыӵе дӥсяськемын, кин туганзы, кытын шутэтско… Артистлэн улон-вылонэз кырымпыдэс вылын кадь адске. Мынам пичи дуннеме — семьяме — шарае поттэме уг поты. Муртъёслы отчы ӧс пытсамын. Соин ик сюанмы но шыпытак ортчиз, матысь ӵыжы-выжыосынымы гинэ.

Анае-атае сямен ик, мынам но туж потэ вал улонме артистэн герӟаме. Угось бер бертылонъёсты, вылысьтыз вылаз репетициосты, учкисьёслэсь кузьымъёссэс валалоз та удысын бергась мурт гинэ.

— Куд-огез шуэ: «Шулдыр ӝыт» — со, пе, династия. Нылды та удыстэс азинтоно кариськиз ке?

— Бадӟым будэмез бере артист луо шуиз ке, ма карод на — уг пумитъяськы. Но али мон сое быгатэмея сценалэсь… утё. Сценалэн йӧспӧртэм кужымез вань. Отчы одӥг пол потыса, со бордысьтыз уг лэзьы ини.

Ольга Корепанова

Удмурт Дунне
By Удмурт Дунне Октябрь 28, 2016 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<