Шоркар дась удмуртомыны

Удмурт Дунне
By Удмурт Дунне 27 октября, 2016 13:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Кылем арняе  «Удмурт кенеш» огазеяськонлэн Ижкар ёзъёсысьтыз  азьветлӥсьёс пумиськылӥзы шоркарлэн кивалтӥсьёсыныз — Иж городлэн йырыныз Юрий Тюринэн но город Думалэн тӧроеныз Олег Гаринэн.

Ижлэн администрацияз пумиськон.

Ижлэн администрацияз пумиськон.

Берло аръёсы «Ижкар кенеш», ӵош кариськыса ужам интые,  тросгес пазяськылӥз, нимазъяськыны выриз. Но со «Удмурт Кенешлэн» бурд улысьтыз одӥгез огазеяськон луэ, соин ик асьмеос сюлмаськыны кулэ огъя ужъёсмес быдэстон сярысь, шуиз пумиськонэз нуись, «Удмурт Кенеш» огазеяськонлэн тӧроез Татьяна Ишматова.

Ёросъёсысь ёзъёслэн кивалтӥсьёссы мадизы асьсэлэн ужзы но сюлмаськонъёссы сярысь. Ваньзылэн шуг-секытъёссы огвыллемесь. Кылсярысь, городын ӧвӧл дунтэк люкаськылон интыос — нокытчы калыкез люканы, ужрадъёс ортчытъяны. Культурая юртъёс но бадӟым залэн учреждениос  бадӟым дун куро. Соин валче «кенешчиос», юрттэт курыса, вазиськизы город кивалтӥсьёслы. Юрий Тюрин вераз, нимысьтыз зал пуктыны али нокыӵе луонлык ӧвӧл, но администрациосты курыны луоз, ужрадъёс-пумиськонъёс ортчытъяны залъёссэс дунтэк мед висъялозы шуыса.

Ижын улӥсь удмуртъёс кемалась сюлэмшугъясько ни Кызьпу арама пумысен но. Трос аръёс ӵоже со аналтэмын вал, инвесторъёс ӵекто сое  чеберъяны-тупатъяны. Мар пӧрмоз солэсь, уз ышы-а арамалэн удмурт шӧмыз, угось со  выжыосмылэн вӧсям интызы, трос аръёс ӵоже отын ортчыло Гербер но Виль шулдыръяськонъёс. Та пумысен кенешонъёс кыкетӥ арзэ кыстӥсько ни. Но городлэн кивалтӥсез  оскытӥз: Кызьпу арама кылёз удмурт шӧмо! Отын азьло сямен ик удмурт шулдыръяськонъёс ортчылозы, со понна нокин дун уз куры.

«Удмурт Кенешлэн» Первомай ёросысь ёзэзлэн кивалтӥсез Ольга Шилова вазиськиз, Ижын удмурт школа усьтыны курыса. Котьку сямен, вераськон ӝутскиз  удмурт кадръёсты будэтон пумысен но.

Пумиськон туж кема кыстӥськиз ке но, город кивалтӥсьёс ваньзэс сак кылзӥзы. Юрий Тюрин шуиз:

— «Удмурт Кенеш» — шаерысьтымы  общественной огазеяськонъёс пӧлысь одӥгез  адӟем карымонэз, город котьку мыло-кыдо вазиське солэн кичӧлтонъёсызлы. Тани учке ай, берло аръёссэ городысь афишаос но 2 кылын адӟисько ни — огласянь, чыры-пыры кадь, мукет ласянь, со удмурт кылэз но калыкез гажан. Тунсыко луэ котькуд проектты, малы ке шуоно соос удмуртъёсты гинэ ӧвӧл, вань мукет калыкъёсты но огазеяло. Ми котьку дась юрттыны, нош ог-огмес ӟечгес валан понна таӵе пумиськонъёс ӵемгес ортчытъяно.

Олег Гарин тау кариз  общественной ужен вырисьёслы асьсэлэсь дырзэс но кужымзэс калыклы висъямзы понна.

— Куддыр общественной огазеяськонлы луыса интыысьтызы вырӟо бадӟым ужпумъёс, кылэз-культураез азинтонын проектъёс но ваньмыз сямен вордӥсько тӥ бордысь, — шуиз со. — Табере асьмелэн данъяськеммы луэ Кун Думае ортчем быръёнъёсын вормеменымы но — удмурт калык, огинэ кариськыса, аслэсьтыз адямизэ — Алексей Загребинэз — ӝутыны быгатӥз. Ми возьматӥм: та улонын ваньмыныз уксё гинэ уг кузёяськы.

«Удмурт Кенеш» огазеяськонлэн тӧроез Татьяна Ишматова город кивалтӥсьёслы ӵектӥз  валче ужан пумысен  тупанкыл кутыны.

Зинаида Кириллова

Удмурт Дунне
By Удмурт Дунне 27 октября, 2016 13:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<