Риф Насибуллин: 52 книга поттысал на

Удмурт Дунне
By Удмурт Дунне Октябрь 21, 2016 09:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Р. Насибуллин — уно кыллюкамъёслэн авторзы.

Риф Насибуллин вань удмурт вераськетъёсты эскериз

Удмурт кыллэн диалектологияя атласэзлэн, удмурт-ӟуч, ӟуч-удмурт, ӟуч-удмурт-бигер кыллюкамъёслэн, 20 томъем историко-хронологической научной словарьлэн но оглом вераса 450-лэсь ятыр научной но научно-популярной ужъёслэн, книгаослэн авторзы, филология наукаосъя доктор, Удмуртиысь наука удысысь дано ужась Риф Насибуллин 80 арессэ пусйиз.

— Атайды, Быдӟым оже кошкыкуз, анайдылы тӥледыз школае сётыны ӧвӧл лэзем вылэм. Нош тӥ, Риф Шакрисламович, наукаосъя докторозь будӥды…

— Зэм, атаелэн кылъёсыз али ке но пель сьӧрам чузъясько. Анаеным вераськыкуз, мон ӝӧк улын кылзӥськыса пукисько вал. Со вал 1941-тӥ арын, мыным соку 5 арес гинэ мынэ вал. Атае агайме гинэ дышетыны куриз, мон анай вӧзын юрттӥсь луыны кулэ вал. Но 3 ар ортчыса, мон школае мынӥ ик. Кӧня ке дышетско но ачим школае ветлэмысь дугдо, малпа вал анай, угось рос-прос дӥськут но, сиён но ӧй вал.

Нырысетӥ классын дышетскыкум, школаямы выль дышетӥсь кылдӥз — Михаил Борисов. Берло тодӥ, со удмурт автономиез кылдытӥсьлэн Трофим Борисовлэн вынызлэн пиез луэ шуыса.  Со одӥг пол монэ урок бере дораз куное ӧтиз. Со нунал али ке но толон ортчем кадь син азям: дышетӥсьмы монэ чаен, ӟег нянен но сакырен утялтӥз. Но шуиз: пие, тыныд одно дышетсконо. Тон кадь визьмо нылпиосты мон шер пумиталлясько. Солэн кылъёсыз дышетскон мылкыдме уката бурдъязы. Но Борисов выжыысь адямиослы со вакытэ одӥг интыын одӥг арлэсь кема улыны ӧз лэзе: гуртысьтымы кошконо луиз.

Мыным пичи дырысеным котьма тунсыко потылӥз. Азбарамы трос пӧртэм турын-куар будэ вал. Туж яратӥсько вал тӧдьысяська вылысь нымы-кибыосты учкылыны. Атаймы войнаысь ӧз берты бере, воргорон ужъёс агаеным ми вылэ усизы. 4-тӥ классын дышетскыкум, мон пулэсь салазки лэсьтӥ. Коркамы вырйылын сылӥз, эшъёсынымы гурезь уллань зол ширтылӥм. Куасъёс но анай мыным ӧз басьтылы, ачим пулэсь соосты лэсьтылӥ.

Башкортостанысь Янаул ёросысь Чытырман гуртысьтымы калыкмы кык кылын вераськиз — удмурт но бигер. Озьы пичи дырысен, кык кыл тодыса, будӥмы. Покчи классъёсы ветлыкум, дышетӥсьёс вань предметъёсты удмурт сямен валэктылӥзы. Озьы мон 4-тӥ классме Похвальной грамотаен йылпумъяй. Анай монэ бадӟым классъёсы мыныны ӧз лэзьы ни. Соин колхозэ ужаны интыяськи. Пиналъёс сентябре визь люканы мынӥзы, мон бусыостӥ валэн ю-нянь калтӥ. Одӥг пол кезьыт зор улэ сюрыса, туж зол висьыны уси, кематэк ӧй бурмы. Соку дорам ветлыны кутскиз Анас эше. Со ӧтиз монэ школае, соку гинэ усьтӥськем бигер классэ. Та кылэз дышетытэк но тодӥсько шуыса, мынэме уг поты вал, озьы ке но школае выльысь вамыштӥ. Вуоно араз артысь гуртысь шор ёзо бигер школае мынӥ. 7-тӥ-8-тӥ классъёсын словарь лэсьтыны кутски: ӟуч но удмурт кылъёс вӧзы бигер но немец кылъёсыз пуктылӥ. Но талы дыры трос ӧй вал — кузь ӝытъёсы, аслым но сузэръёсылы кут кутаса, пукылӥ.

— Крестьян нылпи кызьы тодосчилэн сюрес вылаз вуиз?

— Школаез йылпумъяме бере Бирскысь педагогической институтэ дышетскыны пыри. Отын ми, удмуртъёс, кӧня ке кузя вал, пӧламы дышетскиз Александр Сафин. Со туж яратылӥз удмурт диалектъёс сярысь вераськыны. Саша шуылоз вал: берыктэ ай удмуртэ «поясница» кылэз. Мон аслам диалектэным «кыс» шуисько, татышлыос  — «кус», нош Удмуртиын поттэм книгаосын «кус» шуыса гожъяло, озьы ик «борода» кылэз но: мон — «тыш», татышлыос — «туш», нош мукет удмуртъёс — «туш».

2-тӥ курсын дыръям улонысь кошкиз анае. Сузэръёсылы юрттӥськоно шуыса, дышетсконме куштыны малпасько вал. Но институтмылэн директорез Иван Зотов ӧз лэзьы: кыксэ ик сузэръёсме  Бирске интыяны юрттӥз.

Институтын дышетскыкум, тунсыкъяськыны кутски литератураен. Туж кельшо вал Н. Чернышевскийлэн, Н. Добролюбовлэн произведениоссы. Пушкы тырыса ик, лыдӟылӥ та тодмо писательёслэн улэм-вылэмзы, творчествозы сярысь книгаосты. Соос крестьян калыклэсь улонзэ умоятон понна сюлмасько вал уго. Ачим крестьян семьяын будэмын бере, соос сямен ик, гуртысь калык понна умойзэ лэсьтыны быгато шуыса малпанэн улӥ. Нош Н. Некрасовлэсь «Кому на Руси жить хорошо» поэмазэ лыдӟыса, асме Гришка Добросклоновен кожалляй — со сямен ик, огшоры гурт калыклэн ӟеч улонэз понна нюръяськысал кадь.

Бирскысь институтэз йылпумъяме бере одӥг ар Татышлы ёросысь газетын бигер кылысь удмуртэ берыктӥсь луыса ужай. Собере Башкириысь удмурт школаосын удмурт, ӟуч, немец кылъёсъя дышетӥсь вал. Та вакытэ рос-прос басьтӥськи фольклоръя но кылтодонъя материалъёс люканы. Кутски Т. Тепляшиналэн диалектъёслы сӥзем книгаяз ӝутэм юанъёслы валэктонъёс гожтон бордысен. Башкириысь турын-куаръёслэсь удмурт нимъёссэс люкай. Татын мыным юрттӥськизы вылӥ тодон-валанэн адямиос — агроном С. Сакратов но биологияя дышетӥсь Г. Кузиахметов. Со сяна, башкир но бигер словарьёсъя пыр-поч эскери ас диалектам пырем тюрк кылъёсыз. Та материалъёсме Удмурт научно-исследовательской институтэ (УдНИИ) келяй, отысь ужасьёс но Москваысь Т. Тепляшина но В. Лыткин профессор вылӥ дунъет сётӥзы но дэмлазы Москваысь аспирантурае пырыны. Лыктӥ Иже. Быдэс ар Совето Союзысь Наукаосъя академилэн Кылтодонъя институтаз пырыны дасяськи, немец кылъя кандидатской минимум шуонэз сётӥ — «витьлы», нялтас ужай «Дась лу!» газетын.

Аспирантураын кивал-тӥсе луиз финно-угроведениез одӥгез кылдытӥсь, профессор В. Лыткин, кудӥз СОФИН ужъя  ас вакытаз репрессия улэ сюриз вал, но берло сое мозмытӥзы. Камсьӧр удмуртъёслэн вераськетъёссыя диссертациме ути Тартуысь кун университетын.

— Тӥ нырысьсэ Удмурт кун университет бордын лингвистической картаос лэсьтонъя но исторической лексикологияя лаборатория усьтӥды но 24 ар  ӵоже соин кивалтӥськоды ини…

— Диссертациме утеме бере 11 ар ужай УдНИИ-ын. 1983-тӥ арын интыяськи Удмурт кун университетэ. Татын ужаны кутски обратной (мыддорин) кыллюкам лэсьтон бордын. Книгаын кылъёс радъямын аспӧртэмлыко — кыллэн пумызъя алфавитэн тыремын. Со юрттэ шараяны, кыӵе суффиксъёс ӵемгес кутӥсько. Таӵе кыллюкамъёс кылдытэмын кылъёсын тунсыкъяськисьёс понна. Обратной  кыллюкам лэсьтӥ университетысь 7 тунгон сьӧры ворсам компьютерен, со секретной объектэн лыдъяськиз. Одӥг пол адӟи, кызьы отысь ӧсэз кышномурт усьтӥз. Сьӧраз калъяськи. Монэ, трос  юалляськытэк, компьютер сьӧры интыязы. Озьы ужме нуналлы быдэ пичиен-пичиен печатлай. Одӥг нунал пумиськи та центрлэн кивалтӥсеныз Анатолий Журавлёвен, солы валэктоно луи, кин мон сыӵе но мар секретной объектын карисько. Ужме йылпумъяны лэзиз. Ужалод уйин, шуиз.  Берло А. Журавлёв УдГУ-лэн ректорез луиз. Со кие сюрем обратной кыллюкаме. Соку со монэ дораз ӧтиз но выль потэм уженым ӟечкылаз, кылтодонъя лаборатория усьтом, шуиз. Отчы кивалтӥсе монэ юнматӥзы.

— Тӥ тэк улыны уд чидаське — нуналлы быдэ уже ветлӥськоды. Озьыен, йырады трос лэсьтоно ужъёсты бергало на.

— Али лабораториын Удмурт кыллэн диалектологической атласэзлэн 6-тӥ томез бордын ужаськом. 5-сэ поттӥм ни, ӝоген 7-тӥез борды кутском. Зэм, люкам материалмы 52 том мында бичамын. Арлы быдэ ке но одӥг книга поттыны быгатысалмы ке… Ваньмыз коньдонлэн ӧвӧлтэмез вылэ пыкиське уго. Книга поттыны быгатӥськом грантъёс чотын гинэ.

Таӵе атласъёсысь шедьтыны луоз, кыӵе диалектэн, кыӵе кылъёсты пыртылыса, сояз яке таяз ёросын верасько, кытысь но ку со кыл асьме кылэ вуэмын, та кылэз удмуртъёс кыӵе амалэн кылдытӥллям но трос мукетсэ. Нялтас вераса, Европаысь кылъёсъя атласэ 21 удмурт гурт пыремын. Нош Удмурт атласэ — 175 гурт.

Атласмес Санкт-Петербургысь лингвистической эскеронъёсъя институт дуннеысь тужгес устоез шуыса пусйиз. Ужъёсмес ми, азьвыл потэм книгаосты — Европаысь кылъёсъя  атласэз, славянъёслэн кылъёссыя огъя атласэз — лыдэ басьтыса, кылдытӥськом. Удмурт атлас — со быдэс Россилэн данъяськонэз.

               Ангелина Снигирёва

Удмурт Дунне
By Удмурт Дунне Октябрь 21, 2016 09:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<