Рекламаез лыдӟем уг поты. Мар возьмало лыдӟисьёс

Удмурт Дунне
By Удмурт Дунне 26 октября, 2016 11:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Журналистъёс тол но, гужем но сюрес вылын. Нош сӥзьыл, газетлы гожтӥськон вакытэ, ми дорамы ик ум пыраське, шуыны луоз, лыдӟисьёсынымы пумиськонъёсы котьку шумпотыса потӥськомы.

udmurt-kyshnoos, кильтырнаос

Дэри ёросысь Пероггуртысь «Кильтырнаос» ансамбль.

Кылем арня вискын Дэри ёросысь Пероггуртысь «Кильтырнаос» ансамбле ветлӥсьёс нош ик доразы ӧтчазы.

Ансамблен кивалтӥсь Зоя Ушакова, кырӟасьёссэ сяна, пумиськонэ мукет нылкышноосты но  люканы быгатэм. Шумпоттэ соиз: городлы матын ке но, та гуртын анай кылмы но туж ӟеч возиське.

— Ой, однако, со «Удмурт дуннеез» яратӥсько ке яратӥсько лыдӟыны, — вера Татьяна Скобелева. — Сое кие кутоно ке, нокыӵе уж кулэ уг луы ни, йылысеныз пумозяз лыдӟыса потӥсько — кыӵе но иворез уг тодӥськы. Паймисько та журналистъёслы, кытчы но соос уг вуо! Пичи гуртъёс сярысь гожъямъёстэс лычсузьымон ик лыдӟисько.

Пероггуртысь шумпотыса кошкимы. Ми отысь нош ик 15 лыдӟисьёсмес  шедьтӥм.

Озьы ик алигес капчи мылкыдын бертӥмы Пичи Пурга ёросысь Баграш-Бигра гуртысь но Куреггуртысь. Отысь но выль эшъёс шедьтӥмы.

— Лыдӟиськытэк улыны мӧзмыт, табере мон но «Удмурт дунне» газетэз басьто ини, — шуэ Баграш-Бигра культура юртэн кивалтӥсь Ольга Замараева. — Ми доры  ӵемгес вуылэ, соку газеттылы гожтӥськисьёс эшшо тросгес луозы.

— Милям гуртамы калык туж лыдӟиськись, — вера библиотекарь Яна Зайцева. — «Удмурт дунне» газетэз тросэз гуртазы уг ке но басьто, сое лыдӟыны библиотекаямы ветло. Романъёсты но повестьёсты, «Тӧр шорын» рубрикаез но пичиесь гуртъёс сярысь гожъямъёсты мыло-кыдо лыдӟо.

Баграш-Бигра почтаен кивалтӥсь Любовь Дмитриева кошкеммы бере ӵуказеяз телефон пыр ивортӥз:

— Шумпотыса верасько, вуоно арлы подписка умой мынэ. Уката ик со шӧдӥськиз ми доры ветлэмды бере. Гуртмы милям туж бадӟым. Почта отделениямы Орлой но Куреггурт пыро на. Соин ик журнал-газетэз люкыло кык почтальонъёс — Лидия Миннагулова но Лариса Александрова. Малпасько, соос но гожтӥськон умой ортчытозы. Туэ ар понна соослэн кыкназылэн ик песьтэразы 100 котыр «Удмурт дунне» газет.

* * *

Та нуналъёсы Кизнер ёросысь Гуӵин-Бӧдья гуртэ но вуылӥмы. Татын клубзы кемалась, пе, ӧвӧл ни — соин ик люкаськон интызы магазин луэ. Басьяськыны лыктэм нылкышноосын но вуз карисьёсын газет сярысь кенешонмы ӟырдыт ортчиз.

— Гуртамы та вакытэ кык мурт сяна «Удмурт дуннеез» уг лыдӟы, — верало вуз карисьёс Екатерина Макарова но Надежда Ермолаева. — Талэсь азьвыл тросэз сое лыдӟо вал, берло аръёссэ, дуно шуыса, лэся, гожтӥськемысь дугдӥзы.

— Ма, мон но тани сое басьтэмысь дугдӥ, арлыд будэмъя синъёсы начар адӟыны кутскемен валче лыдӟиськем уг луы ни, — вера Клавдия Чайникова. — Пиосы газетэз кулэ уг каро, уг лыдӟисько. Но кызьы сотэк улод? Ми пинал дырысен «Советской Удмуртиез» лыдӟыса улэмын. Табере тросэз уг лыдӟисько ни. Ёросамы потӥсезлы гожтӥськисько ик на, но отысь номырзэ лыдӟыны, со рекламаен но ӟечкыланъёсын тырмемын.

— Озьы, озьы, — Клавдия Захаровна борды итӥське Надежда Ермолаева. — Нош «Удмурт дунне» котыр ласянь узыр: отысь вероссэ но, кылбурзэ но, киужъёссэ но шедьтод. Ай тани пайми, вторнике потӥсяз эшшо оломаиз но вылэм на.

— Такем кыдёке лыктӥллямды бере, мон но газеттылы гожтӥсько ай, — мылкыдыз ӝутӥськиз Юлия Гавриловна Титовалэн. — Лыдӟиськемъя лыдӟиськем потыны кутске ук. Но газет бамъёсады милемлы тупась кырӟанъёс тросгес печатлалэ, — мылкыдзэ вераз выль гожтӥськисьмы. — Ас поннам ке но коть нёжъяса пукысал.

Редакцие бертыса, кенешим вуоно арын кырӟанъёсын нимысьтыз номер поттыны.

Любовь Тихонова

Удмурт Дунне
By Удмурт Дунне 26 октября, 2016 11:51 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<