Потоно «окопысь»: Кыӵе ужпумъёсты ӝутӥзы фин-угор журналистъёс

Удмурт Дунне
By Удмурт Дунне Октябрь 5, 2016 11:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

21-тӥ-22-тӥ куартолэзе Карелиын фин-угор журналистъёслэн «Фин-угор дунне. Син азьын Карелия» форумзы ортчиз. Петрозаводске быдэс Россиысь 100 пала журналистъёс люкаськылӥзы.

kareliya-smi

Карелиын нылпи журналъёсты эскерон.

 Кириллица но латиница

Форумын вераськон мынӥз иворъёсты вӧлмытӥсь ёзэсъёслэн ужамзы, соослэн аспӧртэмлыксы, азинскыны луонлыкъёссы сярысь. Озьы ик анай кылэз, калык лулчеберетэз, сям-йылолъёсты утён но вӧлмытон ужпумъёс ӝутэмын вал.

Карелия — пичи элькун, 2014-тӥ арын отын 634 сюрс 400 адями улэ вал. Туннэ отын 45 сюрс карелъёс (вань калык пӧлысь 7,4 процент), 3 сюрс 500 вепсъёс (0,3 процент), 7 сюрс финъёс (1 процент) лыдъясько. Выжы калыкъёслэн — карелъёслэн но вепсъёслэн — асьсэлэн кылынызы ивор вӧлмытон ёзъёссы вань.

— Туж потэ вылэм, карел кыл шаерамы кун кылэн мед лыдъяськоз шуыса. Россиын ми одӥг гинэ сыӵе улосвыл, кытын выжы калыклэн кылыз кун кылэн уг лыдъяськы, — вера Карелиысь нациосын ужан политикая, мерлыко но вӧсьлыко огазеяськонъёсын кусып возёнъя министрлэн воштӥсез Ирина Петрова. — Карел кылын 3 наречиос — карел, ливвиковской но людиковской. Умойгес азинскизы ливвиковской но карел наречиос. Россиын кун кыл луыны быгатэ кириллицаен гожтэмез гинэ. Но ми Финляндиен артэ бере, милям но, соослэн кадь ик, латиница. Али вань учебникъёсты берыктыны кириллицае, тодосчиослэн верамзыя, уг луы — кыллэсь фонетикая аспӧртэмлыкъёссэ кириллицаен возьматыны шуг. Валамон, ми, карелъёс, туж оскиськомы, кылмы кун кыл луоз шуыса. Соку кыллы юрттон ласянь мукетгес луонлыкъёс усьтӥськозы. Карел кылэз Интернетэ пыртыны тыршиськомы, дискъёс поттӥськомы, онлайн курсъёс радъяськомы. Мукет улосвылъёсын, кылсярысь, Удмуртиын та ласянь азьпала бадӟым вамыш лэсьтэмын ни.

Выжыен тунсыкъяськон будэ

Фин-угор журналистъёслэн форумазы пыриськиз Карелилэн тӧроез Александр Худилайнен. Солэн верамезъя, карел кылэз дышетыны мылкыд карисьёслэн лыдзы берло аръёсы шӧдскымон йылӥз.

— 3-4 ар талэсь азьло Петрозаводскысь кун университетлэн фин-угор факультетаз пырыны мылкыд карисьёс ӧй вал. Туэ 1 интые 5 адями куриськиз, — вера Александр Худилайнен. — 2012-тӥ арын сӥзьылысен дышетӥсьёслы ватсаса коньдон сётӥське, али 150 адями сое басьтэ. 2012-тӥ-2013-тӥ дышетскон аръёсы фин-угор кылъёсты 4 сюрслэсь трос пиналъёс дышето вал ке, туннэ — 7 сюрслэсь тросэз.

Солэн верамезъя, фин-угор кылъёсын литература но учебникъёс пото. Кылем арын 20 пӧртэм книгаос поттэмын, 7-ез со пӧлысь — бюджет чотын. Карел, фин, вепс кылъёсын газетъёс вань, телевидениын но радиоын передачаос лэсьто. Элькунлэн тӧроез бордын Карелъёслэн, финъёслэн но вепсъёслэн кенешсы кылдытэмын. 2013-тӥ ар Карелиын карел кыллэн ареныз ялэмын вал. Со улсын 800-лэсь трос ужрадъёс ортчытэмын. Кылдытэмын клубъёс, отын тунсыко адямиосын пумиськонъёс радъяськыло.

Кыллэн кулэлыкез

Выжы калыкъёслэн газет-журналъёссыя, телевидениын, радиоын передачаосъя валаны луэ, макем калык кулэ каре кылзэ, пусйиз Россиысь связья но ивор вӧлмытонъя министрлэн воштӥсез Алексей Волин.

— Россиын улӥсь калыкъёслэсь 2 сюрс 200 пала СМИ-оссэс арлы быдэ чакласькомы (со пӧлын Интернетын ужасьёссэ но). Тросэзлы юрттэт висъяське. Кылсярысь, гожтӥськон понна Россиысь почта ӧжытгес коньдон басьтэ. 2016-тӥ арлэн кыкетӥ палараз 182 газетъёслы но журналъёслы сыӵе юрттэт сётэмын, 2017-тӥ арын нырысетӥ паларезлы — 207-лы, — вера Алексей Волин.

Министрлэн воштӥсез верамъя,   валтӥсез ужпум — тунсыко материалъёс, передачаос лэсьтон, со чотын коньдон поттыны луысал. Но нылпиос понна печатласькись газет-журналъёсты рынок кусыпъёсысь поттоно. Ивор вӧлмытӥсьёс улонэз котыр ласянь возьматыны кулэ, лулчеберет вылэ гинэ ӧвӧл дугдоно. Ӝутсконо улосвыл «окопъёсысь», лыдъя Алексей Волин.

Россилэн йӧскалык политикая кун стратегияз бадӟым инты висъямын кылъёсты утёнлы, ивор вӧлмытӥсь ёзъёсты азинтонлы. Форуме люкаськем журналистъёс но пумиськонъёсы пыриськем мукет муртъёс сое огпол гинэ ӧз вералэ. Анай кылэзтэк калык быре. Яркыт чибориё вуюись сылме ке, со интые сайкыт, но одӥг буёло инбам кыле.

 

Майя Бывальцева,

Ивор вӧлмытонъя «Удмуртия» агентство

 

Удмурт Дунне
By Удмурт Дунне Октябрь 5, 2016 11:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<