Пиналэз быдтэ турын

Удмурт Дунне
By Удмурт Дунне 18 октября, 2016 16:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
Ма каре пинал анай-атай адӟымтэ дыръя?

Ма каре пинал анай-атай адӟымтэ дыръя?

Ижысь «Подросток» центр бадӟым саклык висъя пиналъёс пӧлын шузимытӥсь суретъёсты вӧлмытонэн нюръяськонлы. Центрысь социальной педагоглы Зульфия Якуповалы анай-атайёс ӵем вазиськыло пӧртэм юанъёсъя.

— Кыӵе наркотикъёсын али шузиясько быдэ вуымтэос?

— Туннэ пиналъёс пӧлын тужгес паськыт вӧлмемын кыскон суретъёс — изэм турын-куаръёс.  Егитъёс соосты наркотик чот уг каро. Киынызы шонто: ма, со огшоры тамак гинэ ук! Мургес учконо ке, та кыскон суретъёс, мукет наркотикъёсын ӵошатыса, трослы кышкытэсьгес. Мугорез сяна, лулсэрез зол быдто. Огпол кыскыса, пинал мурт та суретлэн четлыказ шеде. 2 толэзь ортчыса, сотэк улонзэ адӟемысь дугдэ.

Ивор вотэсысь ог 30 пумо шузимытӥсь кысконъёсты шедьтыны луэ. Турын-куаръёс сяна, отын вань на сылалъёс но. Таосыз эшшо но кышкытэсьгес. Угось адямиез 2 поллы шаплыгес сисьто. Ульчаетӥ ортчыку, турын-куарен усыкмем муртэ, оло, уд вала. Нош сылалэн кудӟемзэ соку ик тодмалод. Сылаллэсь йӧнатӥськон трослы секытэнгес ортче. Егит адямилэн кӧня ке толэзь сое кыскытэк улэмез бӧрсьы но йырысьтыз юан уг тӧлӟы: кытысь кыскон шедьтоно?

— Кытысь пиналъёс та суретъёсты шедьто?

— Усыкмытӥсь турын-куаръёсты, сылалъёсты вӧлмытон паськыт мынэ Интернет, телефон, почта пыр, киысь кие. Городъёсысь, черкогуртъёсысь мынӥсь-вайись транспорт дугдылон интыосысь но ялонъёсты адӟыны луэ. Озьы школаосы сурет капчиен вуэ. Та сярысь дышетон учреждениосысь возьмаськисьёс тодытэк но кылё.

Нылъёс-пиос пӧлын югдур секыт соин но: школаосын дышетскисьёсты тестъёс пыр эскеро. Тест огшоры наркотикъёсты шаплы шарая, нош кыскон суретъёсты уг возьматы. Соин ик семьяын быдэ вуымтэ пинал вань ке, анай-атайёслы кык полэс чакласькись луоно.

— Кызьы мумы-бубы валалоз, пинал кыске шуыса?

— Пурккетэм бӧрсьы 20 минут ортчыса, наркотик мугоре пыӵа: синъёс гордэкто, кыл быгыльме, кызэм, ву юэм потыны кутске, сюлэм зол жугиське,  гороно яке уйбыртоно.

Но пиналлэсь таӵе дырзэ анай-атайёс ӵем дыръя адӟыса уг вутто. Угось егитъёс усыкмыны люкаськыло дорзылэсь палэнэ. Озьы ке но мыдлань сюрес кузя вамышъямзэс валаны луэ. Соос урокъёссэс келляны кутско, «2» отметкаен бертыло, ӵем алдасько, выль эшъёссы кылдо, телефон пыр лушкем верасько, анай-атаенызы кенешонъёслэсь палэнско, уг тодо, кыӵе туннэ нунал. Пинал ӵем коньдон курылэ. Валэктэ: я соизлы, я таизлы эшезлы тыриськонэз вань. 2-3 нуналлы ышылыны кутске. Дораз вуэ ке, лумбыт кӧлэ.

Анай-атайёслы сюлмаськыны кутсконо, пинал бордысь нырысьсэ пурккетэм зын лыктыку ик. Угось кыскисьтэм муртъёс кышкыт тамак борды шер кырмиськыло. Утчаськоно пиналлэн арбериосыз пӧлысь, сэрегысьтыз, шкафъёсысьтыз. Турын-куаръёс но сылалъёс зынэсь. Таос бордын ик луыны быгатозы пичи пластик ӟенеликъёс, пипетка порма векчи гумыос.

— Мар кароно, нылпи кыске ке?

— Нырысь ик, тодоно: кытысь пинал усыкмытӥсь суретэз шедьтэ. Та сюресэз одно ик пытсано. Со понна вазиськоно реабилитацияя центръёсы, югдурез утисьёслы. Юрттыны быгатомы ми но.

Кыкетӥез: пиналлэсь социальной сетьёсысь эшъёссэ бугыръяно. Бадӟым саклык висъяно выль тодмоосызлы. Оло, соос вӧлмыто шузимытӥсь кысконъёсты.

Куинетӥез: чидась луоно — пинал наркотикъёслэн четлыказы шедемын ке, солэн улонэз понна нюръяськон 2-3 толэзь гинэ уз кыстӥськы — аръёсын.

«Подросток» центрлэн телефонэз 8 (3412) 78-10-40.

Ольга Корепанова

Туспуктӥз А. Горбунов

 

Удмурт Дунне
By Удмурт Дунне 18 октября, 2016 16:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<