Огкылысь улон — со уж

Удмурт Дунне
By Удмурт Дунне 14 октября, 2016 14:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
kasimov-udm-kenesh

«Удмурт Кенешлэн» национальной политикае пыриськемез сярысь кенешон.

Малы кулэ мэрлыко огазеяськонъёс

Таяз арняе Кун Кенешысь Национальной политикая, кышкытлыклэсь утиськонъя но Кун Кенешлэсь ужзэ радъянъя ялан ужась комиссилэн кичӧлтэмезъя  ортчиз «Удмурт Кенеш» огазеяськонлэн  национальной политикаез  улонэ пыӵатонын интыез» котырес ӝӧк. Со сӥземын вал удмурт  огазеяськонлы 25 ар тырмонлы.

Ӝӧк сьӧры люкаськизы шаерысьтымы пӧртэм национально-культурной огазеяськонъёслэн кивалтӥсьёссы, депутатъёс, тодосчиос, иворчиос. Ялан ужась комиссилэн кивалтӥсез Энвиль Касимов пусйиз: Удмуртия — калык кусыпъёс ласянь синмаськымон шаер. Но ас кожаз номыр уг луы, сыӵе югдур возиське кивалтӥсьёслэн валаса ужамзылы, национальной политикалы саклык висъямзылы но… удмуртъёслэн ӟеч сямзылы луыса. Татын улӥсь адямиос — ваньзы ӧжытак удмуртъёс, лыдъясько мон, шуиз Энвиль Владимирович, угось трос аръёс ӵоже артэ улыса,  асьмеос ог-огмылэсь сяммес пыӵатӥськом.

«Удмурт Кенеш» огазеяськонлэн вице-президентэз Владимир Байметов вакчияк тодматӥз удмурт движенилэн историеныз. Удмуртъёслэн, ма, трос мукет выжы калыкъёслэн но, асваланзы сайканы ӧдъяз революция бере. Ортчылӥзы съездъёс, саклык висъяськыны кутскиз калыкез дышетонлы, национальной интеллигенция будэтонлы. Ӵап со вакытэ ик воректӥзы удмурт кизилиос Трокай Борисов, Кузебай Герд но мукетъёс. Но 1930-тӥ аръёс нош ик  шуккизы асьмеды — трос визьмо адямиосмы быдтэмын вал. Бадӟым кивалтӥсьёс выльысь валатскизы 1960-тӥ аръёсы гинэ — национальной политика луиз кун политикалэн оглюкетэз, адямиос дугдӥзы кышкамысь, со вакытэ трос лэсьтэмын вал культура, искусство, литература удысъёсын, будэтэмын трос удмурт кивалтӥсьёс. 1990-тӥ аръёс бере со уж вунӥз, национальной политикаен вырыны кутскиз ачиз калык — озьы быдэс Россиын улӟизы выжы калыкъёслэн движениоссы. Ӵап со вакытэ кылдӥз асьме «Удмурт Кенеш» но. Туннэ югдур ӟечгес,  выжы калыкъёслэсь кылзэс, культуразэс утён сярысь валан вань кивалтӥсьёс ласянь, но, котьма ке но, туж тросэз возиське общественной огазеяськонъёс вылын, та ласянь «Удмурт Кенеш» шаерысьтымы одӥгез валтӥсез луэ. Сое ик пусйизы мукет калык огазеяськонъёслэн кивалтӥсьёссы но.

Удмуртиын 180 национально-культурной огазеяськонъёс лыдъясько, куспазы соос ваньзы тупаса уло.

— Ми гажаськом Удмуртиез, удмуртъёсты, малы ке шуоно та милям шаермы луиз, — шуэ армян огазеяськонлэн тӧроез М. Аракелян. — «Удмурт Кенеш» ми понна адӟем карымон луэ — ми котьку дурбасьтӥськом солэн кичӧлтонъёсызлы, шумпотӥськом, удмуртъёслэн сюлэмшугзы сэрттӥське-пертчиське, малпанзы быдэсме ке.

Кылсярысь, туэ Кун Кенешын нош ик эскерозы кун кылъёс сярысь законэ воштонъёс пыртон пумысен «Удмурт Кенешлэсь» ӵектонзэ — отын вераськон уг мыны удмурт кыл сярысь гинэ, выль кат утьыны кулэ  шаерысьтымы вань калыкъёслэсь анай кылзэс.

Ӝӧк сьӧры люкаськизы шаерысьтымы пӧртэм национально-культурной огазеяськонъёслэн кивалтӥсьёссы, депутатъёс, тодосчиос, иворчиос.

— Сое одно ик кутыны кулэ, — шуиз Э. Касимов. — Вераськон уг мыны шаерысьтымы вань калыкез удмурт кыллы дышетон сярысь, но  кинлэн потэ анай кылзэ дышетэмез, одно луонлыкъёс сётоно — со государстволэн сюлмаськонэз.

Кылсярысь, Удмуртиын матысь аръёслы Дышетонэз азинтонъя программаын одӥг чурен но пусъемын  ӧвӧл этнокомпонентъя дышетон. Ог-огед сярысь тодытэк, мукетъёссэ уд вала, эшъяськыны быгатон озьы гинэ уг сётӥськы, шуизы котырес ӝӧке пыриськисьёс.

«Удмурт Кенеш» огазеяськонлэн кивалтӥсез Татьяна Ишматова тодэ вайытӥз туэ феврале ортчем ӧтчам сярысь. Отын туж ӟеч резолюция кутэмын, но сое быдэстон — одӥг огазеяськонлы вормонтэм.

— Соин ик мон ваньдэс курисько дэмен кариськыса ужаны. Ми пӧртэмесь, но сюлмаськонъёсмы огкадесь. Туж оскиськом, кивалтӥсьёс милемыз азьланяз но адӟозы-кылозы, калыкмылэсь сюлмаськонъёссэ лыдэ басьтозы, — шуиз со.

Татьяна Витальевна вань огазеяськонъёслэсь кивалтӥсьёссэс ӧтиз «Удмурт Кенешлэсь» юбилейзэ но валче пусйыны.

Куд-огез уг вала, мар со национальной политика, малпало, со кылэз дышетон, сямъёсты-йылолъёсты утён, но со озьы гинэ ӧвӧл. Национальной политика — котькуд удысын. Котькӧня асьмеос йӧл мед кыском, курегпуз мед поттом, но куспамы тупаса улыны ке ӧм быгатэ, номыр со кулэ но уз луы ни. Соин ик валтӥсез — ог-огдэ гажан но азинскыны луонлыкъёс кылдытон, йылпумъяса вераз депутат Э. Касимов.

Зинаида Кириллова

Туспуктэм: www.udmgossovet.ru

 

Удмурт Дунне
By Удмурт Дунне 14 октября, 2016 14:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<