Можга городэз сайкатӥсь

Удмурт Дунне
By Удмурт Дунне 12 октября, 2016 10:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
vladimirov

Можга педколледжлэн выль кивалтӥсез Г. Владимиров.

Можга ёросысь Кватчи гуртын вордӥськем удмурт воргорон Григорий Владимиров ас вакытаз туж трос лэсьтӥз городысь школаосын удмурт кылэз дышетон понна. Алигес сое юнматӥзы Можга педколледжлы директоре.

Григорий Спиридонович — дышетӥсь, 11 ар ужамын Можга ёрос администрациысь спортъя комитетын, отӥяз 6 арзэ городысь дышетонъя управлениен кивалтэмын.

— Дышетонъя управленилы кивалтӥсе юнматэмзы бере ас азям ужпум пуктӥ: городысь школаосын удмурт кылэз пыӵатоно, — тодаз вае Григорий Спиридонович. —  Куд-огаз удмурт кылэз факультатив амалэн дышето вал. Но та тырмыт ӧз поты, кулэ предмет. Умой шат со: нылпи садъёсын удмурт кыллы дышетӥськомы, нош школае вуыса, солэсь палэнскиськомы? Ачим анай-атайёслэн собраниосазы ветлылӥ, соосын кенешылӥ. Нырысь-валысь туж секыт вал мылкыдзэс удмуртлык пала берыктыны. Куд-ог удмурт мумы-бубыос ик юаллязы: малы кулэ со удмурт кыл? Эскеронъёс возьмато: 2-3 кылэз тодӥсь пиналлы дышетскон но капчиенгес сётӥське, йырыз но умойгес ужа, ЕГЭ-я но баллъёсыз умоесьгес. Тазэ валало но нош мукет юан сёто: удмурт кылын пиналмы кытчы мыноз? Валэктыса-валэктыса югдурез тупатыны луиз. 9-тӥ, 10-тӥ школаос возтӥ ортчыкум, туннэ ке но мылкыды лӧптэ: удмурт нылпиос татын быдэс класс люкасько! Гимназиын тани ужпумез вырӟытыны секытгес луиз. Но со удмурт кыллэсь уг палэнскы. Отысь одӥг нылаш шаерысьтымы удмурт кылъя олимпиадаын ӟучомем нылпиос пӧлын 1-тӥ инты басьтӥз. Таӵе вормонъёслы мукет нылпиос но гочазы, удмурт кылэз дышетон борды мыло-кыдогес басьтӥськизы. Зэм, удмурт кылэз пыӵатонын туж тросэз потэ дышетӥсь бордысь. Можгаын визьнодасьёс туж юнэсь.

Удмурт кылъя дышетӥсьёслы уждунзы вӧзы ватсаса коньдон тыриське. Со туж умой. Но удмурт кылъя кружок нуэмзы понна номыр уг тыриськы. Кружокен ужасьёслы но уксё шедьтыны луэ. Стимулирующей фондысь директоръёс быгато коньдон висъяны. Кивалтӥсьлэн мылкыдыз гинэ медло. Школаосын кылэз азинтонын туж тросэз потэ директор бордысь.

Туннэ Григорий Владимиров ачиз директор — Можга педколледжлэн. Азьвылэз кивалтӥсь Николай Пискунов шутэтскыны кошкиз. Николай Аркадьевич ик ас дораз кыскиз Григорий Спиридоновичез, ас интыяз ӝутъяны кутскиз. «Удмурт Кенеш» огазеяськон но Владимиров пала дурбасьтӥз. Дышетонъя но наукая министерство юнматӥз. Педколледж котьку удмурт кадръёсты дасясь кебит вал. Та миссиез азинтоно, шуизы.

— Шаерамы ми гинэ на покчи классъёслы удмурт кылъя дышетӥсьёсты дасяськомы,  — шуэ Григорий Спиридонович. —  Али вань кужымме поно, колледжез йылпумъям егитъёс ужаны школаосы мед мынозы шуыса. Уноез уго вылӥ тодон-валан басьтыны кошко собере гуртлэсь палэнско. Педколледж бере ик школаосы интыяськизы ке, эсьма, дышетӥсьёсты утём. Туннэ кык палтӥз но удмурт кылэз утёно. Пиналъёсты но удмурт кыллы дышетоно, дышетӥсьёсты но дасяно. Дышетӥсьёс кошкизы ке, кин нылпиосты дышетоз на? Школаын ӧз дышетэ ке, азьланяз дышетӥсьёсты но будэтыны ум быгатэ.

Туэ 1 удмурт группа бичамы. Нылпиосты люканы арысь аре секытгес но секытгес луэ. Кылэз валамтэенызы куд-огезлы ми дорын дышетскыны секыт. Ваньмыз сямен ужрадъёс удмурт кылын ортчыло уго. Педколледжлэн улонысьтыз вуж кассетаосыз учкылӥ. Удмурт группаосын дышетскисьёслэн азьвыл нимысьтыз нуналъёссы вылӥллям. Сыӵе дыръя быдэс нунал нылпиос урокъёс удмурт кылын радъялляло вылэм. Та ужез берыктэме потэ.

Июнь толэзьысен педколледжын ужаны кутскиз этнокультурая центр. Со удмурт кыллы бадӟымгес саклык висъялоз. Ёросъёсысь дышетӥсьёс, центрамы  лыктыса, тодон-валанзэс муромытыны мед быгатозы, ми дорысь ужаны бурдъяськыса мед кошкозы. Со центр педколледжлэн брендэз мед луоз шуыса, сюлмаськомы.

Йыр висе Можгалан удмурт гимназия усьтон пумысен. Городысь калык солы дась. Инты быръемын педколледж котыре — пристрой гинэ пуктоно. Мукет юртъёсын уго инты ӧвӧл. Татын ик мед луоз нылпи сад, школа, отысен выжозы лицее (тазэ усьтом), собере — колледже. Дышетон нюжаез чигытэк азинтӥмы ке, пайдаез бадӟым луоз. Матысь дыре пуктӥськон борды басьтӥськомы. Зэм, нырысь-валысь педколледжез тупатъяно. 1928-тӥ арын ӝутэмын со, рос-прос выльдэмын огпол но ӧвӧл. 2018-тӥ арын 100 арзэ пусйыны малпаськомы. Колледж кыдёкысен яркыт мед адӟиськоз.

Елена Сараматова

 

Удмурт Дунне
By Удмурт Дунне 12 октября, 2016 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<