Мария Феоктистова гурезез но берыктоз

Удмурт Дунне
By Удмурт Дунне 10 октября, 2016 16:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
feoktistova

М. Феоктистова.

Балезино ёросысь Кожильгурт (Кожило) шор ёзо школаысь историен дышетӥсь Мария Феоктистова шуэ: визьнодась чурытэсь куронъёс нылпиос, анай-атайёс азе гинэ пуктыны кулэ ӧвӧл, нырысь ик — ачиз азе. Мар соку пӧрме? Пиналъёс котыр ласянь адӟем карымон будо, дышетӥсьлэн котькуд нуналыз  праздниклы пӧрме.

 Устоез  — Удмуртиын, Россиын

Уж дураз вань сюлэмзэ, тодон-валанзэ, быгатонлыксэ сётыса тыршись дышетӥсез адӟытэк кельтыны уг луы. Таӵеослэн нимъёссы куке но тодмо луо быдэс элькунын, собере — Россиын но. Озьы Мария Феоктистова кылем арын «Дышетон» нацпроект чотын радъяськись конкурсэ пыриськиз но элькунысьтымы устоосыз дышетӥсьёс пӧлы шедиз — соку со возьматӥз нылпиослы ватсаса тодон-валан сётон удысын усто луэмзэ. Нош туэ та конкурсын ик Россиысь тужгес кужмоосыз пӧлы шедиз! Та рад жюрилы возьматӥз историяя, шаертодонъя урокъёссэ. Кызьы огшоры гуртысь дышетӥсь вожвылъяськиз бадӟым городъёсысь лицейёсын, гимназиосын визьнодасьёсын? Мария Михайловна уг ваты: вормонлы осконэз сокем бадӟым ӧй вал. Угось Россиын ӧжыт ӧвӧл бадӟым опытэн кужмо  визьнодасьёс.

Нош Мария Михайловна тусызъя трос ик уг висъяськы нылпиосызлэсь. Серекъя: пиналъёсын кытчы ке палэнэ потӥськом ке, ӵемысь юалляло: нош дышетӥсьты кытын?

bwwcmamxyai

Школаын пионерлэсь нуналзэ пусйыку.

Кожильгурт школае со лыктӥз 2005-тӥ арын… 1-тӥ мартэ.

— Соку мон Глазов пединститутын 5-тӥ курсын дышетскисько на вал, — тодаз вае дышетӥсь. — Школаын практикаме ортчеме бере директор шуиз: Мария, оло, ужаны но кылёды ни, милемлы туж кулэ вожатой. Соглаш кариськи. Ныр улын — 8-тӥ Март, солы быдэс арня дасяськи. Ужрадмы туж умой ортчиз! Нылпиос отчы мыло-кыдо пыриськизы, анай-атайёс тау карон кылъёс веразы… Мынам ужаны мылкыды ӝутскиз.

 Йыртэманы но быгатылӥз

Дышетскиз но Мария Феоктистова Кожильгурт школаын ик. Анай-атаеныз, выныныз улӥз Балезино каргуртысь Лесобаза районын. Артэ гуртысь школае бусы вамен ог 15 минут гинэ потонэз.

— 1-тӥ классэ мынэмме туж умой тодӥсько на, — азинтэ веранзэ дышетӥсь. — Школа туж бадӟым, чебер потӥз. Мон отчы пыри гинэ — бызисько, бызисько, кытчы — ачим уг тодӥськы. Туж шумпотэмын вал. Нош эшъёсы тросэз кышкамын ай, вырӟылыны уг  дӥсьто. Зэмзэ верано ке, мон интыям пукыны чидасьтэм вал. Тросгес эшъяськылӥ пиосын. Анае школаысь собраниысь бертэ ке, шуэ вал: Маша, нош ик йӧнтэмъяськемед ук!

Анаез дышетскемезъя бухгалтер, атаез — инженер. Но выжыязы дышетӥсьёс вань — атаезлэн вынъёсыз ужазы Эгралась 4-тӥ шор ёзо школаын. Одӥгез али но Эгралась хоккеен шудонъя нылпи командалэн тренерез луэ.

vypusknojj-v-stile-stilyagi

Тодмалэ, кытын пиналъёс, кытын дышетӥсьсы.

Мария Феоктистова 9-тӥ классын ик тодэ ни вал: 11-тӥ класс бере мыноз Глазовысь пединститутэ. Та понна со нырысь ик тау каре дышетӥсьёсызлы. Соос сярысь тодаз вайыны кутске ке, синъёсыз уката но ӝуаны ӧдъяло кадь:

— Покчи классъёсын дышетӥз Людмила Борисовна Егорова. Мон паймисько вал: кызьы со уг жадьы милесьтым, уг кесяськы. Ми классамы 28 кузя, ӵаш поттӥськом. Людмила Борисовнаен сэрен яратыны кутски походъёсты. 5-тӥ классысен милемыз басьтӥз Ольга Петровна Зайцева, таиз вералляз: Маши, тыныд дышетӥсь луоно.  Мон школаын ортчись одӥг ужрадэ но пыриськытэк ӧй кыльылы, дыр, культмассовик вал, покчи классъёсын дышетскисьёс пӧлын пӧртэм ужрадъёс ортчытъяй.

Нош малы историен дышетӥсь луыны малпаз? Та понна Мария Михайловна нырысь ик тау каре Эгралась песятаезлы. Со огшоры лэсьтӥськисьын ужам. Нош Эгра, татын улӥсь калык сярысь мар но уг тоды вылэм! Трос вераллям Лӧпшо Педунь сярысь, Кушъя палъёсысь потэмын, пе, со. Мария Михайловна уг ваты: Эгра палъёслы со али но  туж синмаськемын.

Нырысетӥ луоно!

Школаын вожатой луэм сяна, Мария Феоктистова ӝоген нуыны кутскиз на историез но шаертодонэз. Шаертодонъя программа со гожтӥз, Глазовысь пединститутын дышетскыкуз ик. Отысь педагогикая дышетӥсезлы Татьяна Витальевна Сафоновалы уката тау каре: со, пе, дышетӥз котькыӵе ужез шонер радъяны, ас азяд ужпумъёс пуктыны.

— Кожильгурт школамы туж бадӟым, 500 пиналлы чакламын, — вера со. — Бен, дышетскисез туннэ нуналлы 209 гинэ. Ужаны вань луонлыкъёс кылдытэмын, коллективмы туж ӟеч — ог-огмылы юрттӥськом. Соин ик ужаны кутскыны секыт ӧй вал.

Мария Михайловна верамъя, дышетӥсьлэн ужез сыӵе, пе: емышлэсь кисьмамзэ соку ик возьмано ӧвӧл. Озьы нуналлы быдэ: кӧня сюлэмдэ, чидандэ понӥд, сомында ик басьтод. Атаез юнме уг шуы, дыр: мынам Мария Михайловнае шутэтскон нуналъёсты но, отпускез но уг адӟылы — ялан ужын. Нош ужаз со кулэ ке — иське, ас интыяз.

v-berloge-medvedya-s-kokman

Гондыр гуысь потоз.

— Дышетӥсьёслэн отпусксы вакчи ӧвӧл ук, кызьы уд шутэтскиське? — паймемме уг ватӥськы.

— Бен, туэ гужем ӵоже ог 10 нуналзэ дорын вал ик, дыр, — шуэ Мария Михайловна. — Пиналъёсын пыриським Россиысь туристъёслэн слётазы — отын арня быриз. Собере Балезино ёросысьтымы шаерчиослэн слётсы ортчиз — солэсь но ӧм кыле… Но ӧй шутэтскы шуыны уг быгатӥськы. Нылпиослэсь мон уг жадиськы, сюресъёсты туж яратӥсько.

Арлы быдэ Кожильгуртысь пиналъёс котыръяло ёроссэс, потало артысь районъёсы но. Кылсярысь, огпол гинэ ӧз вуылэ ни Кез ёросэ Кам шурлэн кутсконаз. Ортчизы Сибирь трактэтӥ. Ӵемысь вуыло Эгра палъёсы. Мария Михайловназы котьку соосын: ӟеч мылкыдыныз, визь-кенешъёсыныз… Сюрес вылэ кемагес потыны уг ваньмо ке, пиналъёс котырысьтыз уг кошкыло ни: ойдолэ но ойдолэ.

— Ми солань-талань токма ум ворттылӥське, — ватса дышетӥсь. — Одно дугдылӥськом сюрес выламы шедись гуртъёсы, пумиськылӥськом отысь калыкен, али, азьло улэм-вылэмзы сярысь юалляськиськом. Люкам материалмес собере кутӥськом исследовательской ужъёсамы. Озьы эскерим ни уйпал удмуртъёслэсь армие келян, корка пырон сям-йылолъёссэс. Балезиноослэн йӧ келян сямзы туж тунсыко потӥз, сое ми ӵошатӥм на мукет уйпал ёросъёсын улӥсьёслэн та сяменызы. Жаляса верано, тросэз вашкала сямъёс вуныны кутскемын, соин ик соосты гожтыса ке но кельтэм потэ.

«Арлэн дышетӥсез» вожвылъяськонын - устоез вожатой.

«Арлэн дышетӥсез» вожвылъяськонын — устоез вожатой.

Мария Феоктистовалэн дышетэм пиналъёсыз мыло-кыдо пырисько Россиын ортчылӥсь пӧртэм вожвылъяськонъёсы, отысь вормонъёсын берытско. Олимпиадаосын но ӟеч тодон-валанъёссэс возьмато, соосты ӧтчало «Артек», «Орлёнок» лагерьёсы. Вормонъёссы понна дышетӥсь тау каре асьсэлы нылпиослы ик — тыршемзы, быгатэмзы понна.

— Кылем арын 11-тӥ класслэн кивалтӥсез вал, — азинтэ веранзэ Мария Михайловна. —  Ми со пиналъёсын, оло, гурезез берыктӥм: кытчы гинэ ӧм вуылэ, кытчы гинэ ӧм пыриське. Уг быгато  вал берпуметӥ кыльыны — котькытын нырысетӥ луоно. Малпасько, та сям урод ӧвӧл: улонын, оскисько, ас интызэс одно шедьтозы. Кылсярысь, одӥгез пияшмы пыриз Санкт-Петербургысь А. Можайский нимо военно-космической академие. Вераллязы солы: отчы пырыны туж секыт, баллъёсыд уз тырме. Нош со аслэсьтыз лэсьтӥз! Кылемъёсыз но выпускникъёсмы одӥгтэм пыризы вузъёсы. Куинез со пӧлысь — Глазовысь пединститутэ. Шуизы: ми адӟем кариськом Мария Михайловнамылэсь!

Турслётын нырысетӥ луон понна музъемез гудоз.

Турслётын нырысетӥ луон понна музъемез гудоз.

Котькуд ӵукна — Интернетын

Мария Феоктистова шуэ:

— 10 ар пала гинэ дышетӥсько ай, но та дыр куспын но валай ни, нылпиос воштӥсько шуыса. Школаын табере уг тырмы ужлы дышетон. Мон пичи дыръя гуртын пу но, ву но пыртылӥськом вал, классын партаосмес но, полэз но асьмеос ик миськылӥм — уродгес ӧм луэ. Туала пиналъёсты талы дышетоно. Табере нылпиос  компьютер сьӧрын трос пуко. Одӥг ласянь, соос отысь асьсэлы трос ивортонъёс шедьто. Кылем арын выпускникъёсмы, кылсярысь, презентациос, фильмъёс капчиен лэсьтыны быгато вал. Мынам но соослэсь бере кылеме ӧз поты. Уг керпотӥськы вал вераны: дышетэ монэ но, адями ваньзэ тодыны уг быгаты — мон тӥледыз марлы ке дышето, тӥ — монэ.

Мукет ласянь, компьютер нылпиослэсь трос дырзэс быдтэ. Соин ик Мария Михайловна нуналлы быдэ 5 часын ӵукна султэ, электрон журналэ толло нуналысь отметкаосты пуктылэ но… «ВКонтакте» вотэсбаме пыре.  Учке: ку нылпиос кӧлыны выдӥллям — вотэсбамын со адӟиське. Пинал берозь пукемын ке, дышетӥсь адӟымтэ улсы уг кариськы, анай-атаезлы соку ик вуттэ.

— Тӥ лек дышетӥсь шат?

— Туж лек, куддыр валасько: небытгес но луоно, дыр. Но мукет ласянь, классын дисциплина ляб ке, уроклэн пайдаез уз луы. Походъёсын но нылпиослы асьсэдыз урод возьыны уг сётӥськы. Соин но, дыр, анай-атайёс оско мыным нылпиоссэс, кыдёке, кӧня ке нуналлы сюрес вылэ дасяськыкумы но, пумит уг карисько.

феоктитст

Удмурт дӥськут тусызъя.

Но таин ӵош ик нылпиос, анай-атайёс уг кепырало дышетӥсьсылы лушкем малпанъёссэс но усьтыны. Дораз пӧртэм юанъёсын вазиськыло. Визьнодась ӵемысь шуэ: мон уг тодӥськы, кызьы тӥ кароды, нош мон тазьы лэсьтысал…

Огкадь нуналъёс уг луо

— Мон одӥг пол но ӧй жаля на, дышетӥсь луи шуыса, — азинтэ веранзэ Мария Михайловна. — Асме мукет интыысь уг адӟиськы. Школа — урокъёс гинэ ӧвӧл, со — пӧртэм тунсыко ужрадъёс, нылпиосын сюлмысь кенешонъёс. Дышетӥсьлэн огкадь нуналъёсыз ноку уг луо, котьку мар ке но вылез, мукетэз. Мынэсьтым ӵемысь юало: кыӵе яратоно праздникед? Та юанлы мон валэктон сётыны уг быгатӥськы. Вордскем нуналы? Дышетӥсьёслэн удыс праздниксы? Бен, та нуналъёсы нылпиос ӟечкылало. Но шуныт кылъёссэс, ӟеч мылкыдзэс мон огшоры нуналъёсы но адӟисько-кылӥсько.

Мария Феоктистовалэн аслаз семьяез ӧвӧл на. Соин ик солэн нырысетӥ юрттӥсьёсыз, дунъясьёсыз луо анаез но атаез. Школаын пӧртэм ужрадъёслы но соос ӵош дасясько. «Дышетон» нацпроектъя конкурсэ документъёсты гинэ но, эсьма, соос ик дасяны юрттӥллям. Атаез одӥгзэ папкаез люкам-радъям, анаез — мукетсэ.

pokhod-lyzhnyjj-na-severnyjj-ural

Гурезь йылэ тубоз.

Кыӵе азьланезлы малпанъёсыз?

— Малпанэ вал: пиналъёсын Байкалэз адӟоно, оло, соку буйгатско. Вуылӥм отчы, — шуэ визьнодась. — Но табере Камчаткае вуылэме потэ! Туспуктэмъёсын со сыӵе чебер. Озьы одӥг ужпум азям пуктӥсько, со быдэсме ке, мукетыз малпанэ кылдэ ни.

3 ар талэсь азьло Мария Феоктистова вожатойысь куштӥськиз, директорлэн воштӥсез луиз. Соин ик малпаз вал: классысьтыз пиналъёс школаез йылпумъязы ке, выль классэн уз кивалты ни — дырыз уз окмы.

Но со нош ик — классэн кивалтӥсь. Туэ 5-тӥ классэ лыктӥсьёслэсь кадет класс кылдытӥзы. Отчы шедемын кылем ар выпускникъёслэн сузэр-вынъёссы но. Соослэн анай-атайёссы туж куризы: Мария Михайловна, таоссэ но пиналъёсмес тӥ ик басьтэ вал.

— Классамы ми 16 кузя,  — пусйиз дышетӥсь. — Алигес нылпиосмес кадетэ пыртон ужрад ортчытӥм. Аслам пушкы тыриз, синкылиосме мырдэм возисько. Уката зол валай: макем мон яратӥсько вордӥськем музъеммес!

Элина Кумачёва

 

Удмурт Дунне
By Удмурт Дунне 10 октября, 2016 16:42 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<