Кыктоослэн улонысьтызы суредъёс

Удмурт Дунне
By Удмурт Дунне Октябрь 28, 2016 11:58
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
kyktoos

Кыктоос София (вылӥысез) но Ксения Хохряковаос: кызьы улом ог-огмытэк?

Малы мон кадь кырӟаськод?

Ми кыкто сузэръёс! Соин сэрен милемын пӧртэм-пӧртэм учыръёс луыло…

 Буёл — пӧртэм

Ми пӧлысь одӥгезлы Соня (София) ним понӥллям, малы ке шуоно, роддомысь бертыкумы, быдэс сюресэз кӧлэм, нош мукетызлы, Софияен ӵош мед чебер кылӥськоз шуыса — Ксения.

Анай-атаймы, милемды медам суралэ шуыса, Сонялэсь одӥг гижызэ лакен зыраллязы. Йӧл понон бутылкаосмы вал пӧртэм буёлоесь: Ксюшалэн — горд, Сонялэн — ӵуж. Ми соосты ноку но ӧм сураллялэ, котьку асьмелэсь бутылкамес басьтӥськом вал. Соин ик, дыр, али но дӥсенымы но мукет арбериосынымы куспамы ум вошъяськиське.

Соня одӥг минутлы вазьгес вордскиз, соин ик ассэ бадӟымгес кожа. Ксюшалы валэктэ, кызьы ассэ возёно, мар кароно, кызьы вераськоно. Пичи дыръямы одӥг валесын кӧласьком вал — соин ик сое ӵош тупатъяно. Нош одӥгез уг тупаты ке, жугиськыны кутскылӥм.

Анаймы шумпотэ, ми кыктоос шуыса, малы ке шуоно пичи дыръямы возьмась милемлы кулэ ӧй вал — ог-огенымы шудылӥмы.

Классэн кивалтӥсьмы 6-тӥ классозь ӧз тодылы, ми кыктоос шуыса. Ноку но ӧз сураськылы, нош одӥг пол ми школае огкадь дӥсяськыса вуимы. Со ми шоры абдраса учке, журналэ синъёссэ лэзе: кык Хохряковаос, тӥ кыктоос-а, мар-а?

Ми асьмедыз воксё одӥг адями кадь кожаськом. Киноын бӧрдымон учыр луэ ке, одӥг дыре ик зар-зар бӧрдыны кутскиськом.  Милесьтым маке юало ке, ӵемысь одӥг кадь кылъёсын, одӥг дыре валэктон сётӥськом. Одӥг пол Соня  атаен ӵош мынӥз телефон басьтыны, нош Ксюша — анаен. Бӧрысь учкиськом но одӥг кадь телефон басьтӥськеммы, буёлъёссы гинэ пӧртэмесь. Ми яратӥськом одӥг кадь ужъёсын вырыны: кырӟаськом, суредаськиськом, кылбур гожъяськом. Одӥг кадь гожъяськисьёс ярало: Е. Евтушенко, Э. Асадов, Р. Рождественский, М.  Шолохов, А. Куприн, Ф. Достоевский. Кыӵе ке произведениез лыдӟиськом ке, ог-огмылы бӧрысь мадиськом, созэ-тазэ валэктӥськом.

Ми котьку ог-огмылы юрттӥськом, туж матысь эшъёс. Ог-огмылы гинэ ваньзэ вераськом но сюлэммес усьтӥськом. Тодосчиос верало ук, кыктоос ог-огзэсты шӧдо шуыса. Висьыны но одӥг дыре кутско, одӥг кадь малпасько, огез шуккиське ке, мукетыз но вӧсь луэмез вала, пе. Ми но кӧня ке шӧдӥськом.  Кылсярысь, йырын кыӵе ке кырӟан берга, ми сое шара кырӟаны кутскиськом, нош со луэ одӥг кырӟан. Ӵем дыръя одӥг кадь выросъёсмы луо — огкадь пукиськом яке сылӥськом, соку вераськом ог-огмылы: «Малы тон астэ мон кадь возиськод?»

Нош сямъёсмы пӧртэмесь. Ксюша котькыӵе куронэз быдэстоз, нош Соня малпаськоз на. Ксюша йыркуръяськонзэ сюлмаз кема уг возьы, нош Соня кема уг вунэты. Соня вань малпанъёссэ, мылкыдзэ, куректонзэ, шумпотонзэ кыре-буре поттэ, мае уг яра, сое но вераны быгатоз. Ксюша котькинэн лякыт вераське, солэсь мылкыдзэ валаны шуггес.

Гужем коӵышмы пыдзэ чигтӥз. Соня бӧрдыны, куалекъяны кутскиз, нош Ксюша коӵышен ӵош пукиз, юрттӥз солы. Ксюша керпотӥсьгес. Нош Соня ӵем лӧптылэ, шуо дышетӥсьёс. Сиён сярысь ке верано, Ксюша яратэ изюмез,  оливкаосты, нош Соня соосты ымаз но уг понылы. Творчество сярысь ке верано, Ксюша яратэ суреданы пейзажъёсты, нош Соня — портретъёсты. Кылбуръёсмы но пӧртэм темаосъя гожъямын: Ксюшалэн яратон, ож, семья сярысь, нош Соня мур пуштросо малпаськонъёссэ кылбуръёсаз возьматэ.

Ӵемысь валэктоно луэ, маин ми пӧртэмесь. Шуиськом: «Милям ныръёсмы пӧртэмесь. Эшшо Соня кӧйгес но пичигес, нош Ксюшалэн синъёсыз муресьгес». Одӥг пол Ксюша ачиз но сураськиз. «Мон Ксюша ӧвӧл ук, мон Соня», — вераз со.

Ми пыримы УдГУ-э Удмурт кылосбуръя, финноугроведениея но журналистикая институтэ. Дышетӥсьёс одӥгез шоры учко, мукетыз шоры но паймо. Ми шуиськом: «Бен, бен, ми кыктоос».

 Пияш — одӥг

Кыкто луэмлэн урод палыз но вань. Анаен атай кыкнаместы ик куарето, одӥгез гинэ янгыш ке но. Али малпаськиськом ке азьлань сюресмы сярысь, ум валаське, кызьы улом ог-огмытэк. Ми ог-огенымы сыӵе юн герӟаськемын шуыса, со туж ик умой ӧвӧл. Ог-огмытэк ми ум быгатэ пӧраськыны но, ужаны но, кино учкыны но. Соня вера, Ксюшатэк фильм учкисько ке, куддыр вунэтӥсько, со вӧзам ӧвӧл шуыса. Вераськыны кутскисько соин но витисько, ку Ксюша монэным вераськоз, учкисько но — со бордам ӧвӧл. Малпанъёсамы но кылдытӥмы асьмелы одӥг кадь пияшлэсь туссэ, соин ик туж кышкаськом, одӥг пилы синмаськом шуыса.

Озьы ке но ми шудоесь. Котьку вераськом: «Ми сузэръёс гинэ ӧвӧл, ми одӥг классын дышетским, нош табере — одӥг группаын». Ваньзы паймо, ми одӥг интые дышетскыны пыримы шуыса. Нош милемлы потэ: со озьы ик кулэ.

София но Ксения Хохряковаос

Туспуктӥз Елизавета Митрофанова

Удмурт Дунне
By Удмурт Дунне Октябрь 28, 2016 11:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<