Кылдозы выль клубъёс

Удмурт Дунне
By Удмурт Дунне Октябрь 27, 2016 11:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиысь культурая но туризмъя министр В. Соловьёв журналистъёсын пумиськылӥз. Министерстволэн туэ 9 толэзь ужамезлы йылпумъянъёс лэсьтӥз.

«Гурт-fest» фестиваль огазеяз гуртоосты но, городъёсты но.

«Гурт-fest» фестиваль огазеяз гуртоосты но, городъёсты но.

 Мӧзмыт ӧвӧл

Удмуртиын культура улон тунсыко но яркыт. Пӧртэм аресъем адямиос понна ужало 15 театръёс но концерт учреждениос, искусствоосъя 56 нылпи школаос, 32 музейёс, 665 культура юртъёс но шутэтскон центръёс, 542 библиотекаос. Театръёсын 14 выль спектакль пуктэмын, 60 концерт программа возьматэмын, Ижысь циркын 80 представление ортчытэмын. Со сяна, Удмуртиын радъяськизы пќртэм фестивальёс: Цирк искусствоя 9-тӥез, «П. Чайковскийлэн дор палъёсаз»,  «Гурт-fest», «Воршуд».

Но котькыӵе удысын сямен ик, сюлмаськонъёс но ичи ӧвӧл. Министр вераз Национальной библиотека сярысь.

— Та одӥгез висьытӥсь пӧськы. Шаерысьтымы валтӥсь библиотека П. Чайковскийлэн юбилеез чотын выльдӥськыны кулэ ни вал. Пӧртэм мугъёсъя ӧз пӧрмы. Но ми та бордын ужаськомы. Ноябрь пумын Национальной библиотекалэн проектэз дась луоз ини. Сое тупатъяны 600 миллион манет кулэ. М. Калашниковлэн 100 ар тырмонэзлы сӥзем юбилейлы дасяськон сямен выльдӥськозы ни библиотека но «Ижмаш» заводлэн башняез. Тазэ выльдыны кулэ луоз ог 2 но ӝыны миллиард манет. Россиысь культурая министр Владимир Мединский Иже вуылыку, ми та объектэз учкимы. Министр ӵектӥз башняез тупатъянэ ужбергатӥсьёсты но кыскыны. Озьы ик палэнэ кельтэмын уз луы Егит учкисьлэсь театрзэ лэсьтон, — оскытӥз В. Соловьёв.

 Туссэс вошто

Культура удысын тупатъян ужъёс азьланьтӥсько. Короленко нимо театрлэн юртэз вылласянь воштӥськиз ини. Вуоно арын лэсьтӥськоз пушкыз. Та юрт сётэмын фольклор кырӟанъя но эктонъя «Айкай» театрлы. Дано коллективлэн 25 ар ӵоже аслаз липетэз ӧй вал. Татчы ик выжыны дасяське Удмуртиысь симфонической оркестр.

— Тупатъян ужъёс мынозы на П. Чайковский нимо Операя но балетъя театрын, выльдэмын луоз цирклэн липетэз. Ижысь «Столичный» микрорайонын искусствоосъя нылпи школаез но Шарканын культурая но шутэтсконъя центрез пуктон азьланьтӥське. Дас ёросъёсысь культурая объектъёсын липетъёс но укноос выльдӥсько. Толлы дасяськыны шуыса висъяськоз 9 миллион манет, таӵеез шаерамы ӧй вал на. Вуоно арняе лэсьтӥськисьёс ужзэс мытозы ини Ижысь З. Лятушевичлэн коркаяз. Та юрт федерал синпелетэн лыдъяське. 12 ар ӵоже со буш улӥз. Та интылы трос вожмаськисьёс вал. Но Удмуртилэн Тӧроез А. Соловьев  но министерство сюлмаськемен, юрт сётэмын киужъёсъя элькун центрлы. Удмуртиын кадь куиськонъя зол школа Россиын ӧвӧл, вылаз ик, асьмелэн котькуд ёросын сямен киужъёсъя юртъёсмы ужало. Инвесторъёс шедьтэмын. Тупатъян ужъёс 60 миллион манет тыр усёзы. Проект дась ини, сое лэсьтӥзы Кировысь усточиос. Выль центрын луозы куиськонъя, мастер-классъёсты ортчытъянъя, адӟытонъёсты радъянъя залъёс, — шуиз Владимир Соловьёв.

 Питранъёс

Культура удысын тыршисьёслэн одӥгез сюлмаськонзы — концертъёсын потаны ӧвӧл транспортсы. Туэ 16 муниципал огазеяськонъёсы вуозы автобусъёс. Озьы Дэри но Эгра ёросъёсын табере луозы автоклубъёссы, 14-яз районъёсын — выль автобусъёссы. Культурая но туризмъя министерство Россиысь грантъёсъя конкурсъёсы пыриське.

—  Автобусъёс басьтонлы но культурая юртъёсысь ужан тӥрлыкез выльдонлы грантъёс утӥмы. Озьы туэ гуртысь клубъёслэсь ужзэс умоятыны 7 миллион манет вуиз. Та уксё висъямын ёросъёсы, отысь кивалтӥсьёс ӟечгес  тодо, дыр, кыӵе гуртъёсысь клубъёс малы кулэясько, — пусйиз министр.

Гуртысь культураез азинтонлы сӥзем программаез дася Россиысь Культурая министерство. Удмуртия отчы но шедьыны тыршоз. Кылсярысь, гуртъёсы выль клубъёс пуктонлы сӥзем куинь проектэн. Ваньмыз пӧрмиз ке, шаерамы нырысь ик  выль культура юртъёс  кылдозы Грак ёросысь Каменной гуртын, Алнаш ёросысь Асангуртын но Дэбес ёросысь Тыловайын.

 Синпелет усьтозы

Странаямы ужа Военно-исторической общество, соин кивалтэ Россиысь культурая министр Владимир Мединский. Та огазеяськонлэсь Удмуртиысь ёззэ валтыны оскемын Владимир Соловьёвлы. Огазеяськонлэн валтӥсь ужпумез — Россилэсь ожгар историзэ дышетон, патриотизмез пыӵатон, историяя но культурая объектъёсты утён но мукет. В. Соловьёв верамъя, шаерамы 3 ар талэсь азьло кылдӥз ни вал таӵе огазеяськон.

— Соку отчы 4 мурт гинэ пыриз, нош али 30-лэсь уно ёзчиосыз лыдъясько ини. Тыршемлэн нырысетӥ емышъёсыз вань ини. Кылсярысь, республикаысьтымы 25 школаосын, кытын дышетскизы Россиысь Геройёс, буре ваён пулъёс усьтэмын луозы. Со сяна, Военно-исторической общество асьмелы Атыкай музъеммес утисьлы сӥзем синпелет кузьмаз. Памятник сӥё-дано усьтэмын луоз Балезино ёросысь Быдыпи гуртын туэ ноябрь толэзе, — шуиз  В. Соловьёв.

Галина Семёнова

Туспуктӥз А. Горбунов

 

Удмурт Дунне
By Удмурт Дунне Октябрь 27, 2016 11:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<