Кыӵе луоз шоркармы матысь 20 ар куспын?

Удмурт Дунне
By Удмурт Дунне Октябрь 6, 2016 10:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
030097gorod-izhevskgorodok-metallurgovstroitelstvoehlitnyjj-domnovostrojjkavetkhijj-domzhile

Висъяськозы нимаз адямиослы пуктӥськон интыос, но тросгес ӝужалозы трос этажъем юртъёс.

Дасямын Ижлэн 2035-тӥ арозь генпланэз, со шараямын ни, калыклэсь мылкыдзэ  но юазы.

 Малпанъёс бадӟымесь

Таиз генплан — куатетӥез. Нырысетӥзэ 1809-тӥ арын Семён Дудин архитектор дасяз вал ай. Соя ик ӝутэмын Иж заводлэн валтӥсь корпусэз — «Ижмашлэн» башняез, Александро-Невский собор, Арсенал но архитектурая мукет памятникъёс. Собере сыӵе планъёс юнматэмын вал 1934-тӥ, 1963-тӥ, 1987-тӥ, 1999-тӥ, 2006-тӥ  аръёсы. Озьы пичи гинэ каргуртысь Ижевск шоркарлы пӧрмиз.

Тазэ генпланэз дасязы Санкт-Петербургысь «Энко» компаниысь экспертъёс. Нялтас вераса, 1999-тӥ арын юнматэмзэ но соос ик дасязы вал. Но город бюджетын коньдон ӧвӧлэн со улонэ пыӵатэк кылиз. 2006-тӥ арын ини выль план дасямын вал, нош 2009-тӥ арын отчы воштонъёс пыртӥзы, угось соку «Столичный» микрорайон кылдытон сярысь малпанъёс кисьмазы. Ӵапак со документъя али азинске город. Бен, отын быдэстымтэ ужпумъёс вань на, кылсярысь, Октябрьлы 10 ар урамез 2016-тӥ арын августозь Металлургъёслэн городокозязы кыскыны чакламын вал. Азьло ик вералом: та ужпум пусъемын выляз генпланын но.

Иж город администрациысь архитектурая но городэз пуктонъя валтӥсь управленилэн кивалтӥсез Владимир Некрасов верамъя, выль генпланын 9 схемаос: газ, шуныт, тыл кысконъя, сюресъёс лэсьтонъя но мукет. Азьло ик верано: шоркарлэн гожъёсыз матысь аръёсы уз паськыталэ — экспертъёс чакламъя, кырал интыос город пушкын но ӧжыт ӧвӧл. Но отын тросгес луозы шутэтскон интыос — паркъёс, спорткомплексъёс но мукет. Улон юртъёс пӧлысь ог 80 процентэз пуктӥськыны кулэ город дуре — Пазелы, Новоорловка, Люлли, Пероггурт котыре, Воткае мынон сюрес кузя, автовокзал дӥне но мукет. Арлы быдэ шорлыдын 650 сюрс квадрат метр улон юртъёс ӝутозы. Висъяськозы нимаз адямиослы пуктӥськон интыос, но тросгес ӝужалозы трос этажъем юртъёс.

Усьтӥськыны кулэ выль школаос но, кылсярысь — «Столичный», Прасовский, А-10, А-8 микрорайонъёсын. Тыро-пыдо выльдэмез возьмало «Ижсталь» йӧ дворец, «Купол», «Динамо» стадионъёс, «Аврора» кинотеатр интые усьтӥськоз единоборствоосъя юрт.

— Производствоен вырись предприятиос городын ог 20 процентлы кулэсмыны кулэ,  — пусйиз Владимир Некрасов. — Соос выжтэмын луозы город сьӧры, улон коркаослэсь палэнэгес.

Бадӟымесь воштӥсь-конъёс луыны кулэ сюресъёсъя но. Проектэз дасясьёс, кылсярысь, Октябрьлы 10 ар урамез сямен ик, кузёмытыны дэмлало Удмурт урамез Сарапул трактозь, Пушкин урамез Вотка микрорайонозь но мукет. Удмурт урам но Славян шоссе вожын кылдозы выжъёс.

073462,город Ижевск,производство,завод Ижсталь

Производствоен вырись предприятиос городын ог 20 процентлы кулэсмыны кулэ. Соос выжтэмын луозы город сьӧры, улон коркаослэсь палэнэгес.

Эшшо: Карл Маркс но Чугуевский урамъёс вожвылэ 200 интыем автовокзал пуктыны чакламын. 50, 100 пассажиръёслы автостанциос озьы ик кылдозы Автозаводской, Азин, Вотка шоссе урамъёсын но Якшур-Бӧдья трактэ потонын.

Тыро-пыдо выльдонъёс ортчытэм бере Ижысь аэропорт международной луоз.

Ижлэн 2035-тӥ арозь планаз кылемын на «тӧдьы виштыосыз» но. Одӥгез — Иж тымет, мукетыз — ипподром котырын. Соосты выльдонъя ужпумъёсты эскерон борды кутскозы ни генпланэз юнматэм бере.

 Шедьтоно миллиардъёс

Иж город йырлэн постановлениезъя, генпланэн тодматсконлы 2 толэзь висъямын вал. Та дыр куспын, отчы воштонъёс пыртыны курыса, калыклэсь 250 пала куронъёс вуизы. Берлоосыз кылзонъёс ортчизы кылем арня вискын Иж город администрациын. Залын вырӟыны интыез ӧй вал — сомында калык люкаськиз. Ӵектонъёссэс вераны мылкыд карисьёс гинэ 20-лэсь уно вал. Ленин ёросын улӥсьёс, кылсярысь, туж куризы крематорий пуктонъя ужпумез выльысь учкыны. Чакламъя со ёросазы луыны кулэ. Сое, пе, улон юртъёслэсь палэнэ поттоно вал. Мукетъёсыз куризы: тросгес пуктоно кык-куинь этажъем юртъёс, бордазы 1-2 сотка ке но кизён-мерттӥськон интыез но мед луысал — асьме калык музъем борды дышемын.

076838,город Ижевск,набережная,вода,Ижевский пруд

Иж тымет вылтӥ выж лэсьтоно!

Люкаськемъёс кичабонъёсын пумитазы мукетсэ дэмланэз: Иж тымет вылтӥ выж лэсьтоно! Выжлы тодмо конструкторлэсь М. Калашниковлэсь нимзэ сётоно. Озьы ӧжытсэ кык кечез кутыны луоз: нырысь ик, выжез лэсьтонлы федерал казнаысь коньдон кыскыны луоз, уката ик М. Калашниковлэн юбилеез матэктэ бере. Кыкетӥез, Ленин ёрослэн улон-вылонэз соку ик воштӥськоз. Али отчы улыны выжыны мылкыд карисьёс трос ӧвӧл — центрлэсь палэнэ интыяськемын, Иж тымет вамен выж вылын машинаос котьку тымиськемын.

Иж городлэн йырыз Юрий Тюрин вераз: калыклэн мылкыдыз лыдэ басьтэмын луоз. Нимысьтыз кылдытэм комиссиосын со ӵектонъёсты эшшо одӥг пол эскерозы на. Собере, ваньзэ соосты радъяса, лэсьтӥськоз йылпумъян — туннэ-ӵуказе со дась луыны кулэ. Йылпумъянэз выльысь келялозы Санкт-Петербургысь проектэз дасясьёслы.

Генпланын пусъем ужпумъёсты быдэстон дыр чакламын ӧвӧл на. Одӥгез тодмо: сое улонэ пыӵатон понна кӧня ке миллиард манет кулэ. Со понна утчано инвесторъёсты, соостэк малпанъёсты быдэстыны капчи уз луы.

Элина Кумачёва

Туспуктӥз А. Горбунов

 

Удмурт Дунне
By Удмурт Дунне Октябрь 6, 2016 10:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<