Кузьыли кадь тыршод, «Кизили» кадь пиштод

Удмурт Дунне
By Удмурт Дунне 10 октября, 2016 10:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Та нуналъёсы удмурт нылпиослэн «Кизили» журналзы пусъе 30 ар тырмонзэ. Мар пумысен сюлмаське но малы шумпотэ? Кенешиськом журналлэн валтӥсь редактореныз, Россиысь дышетон удысысь дано ужасен, нылпи писателен Ульфат Бадретдиновен.

zhurnalu-kizili-25-let

У. Бадретдинов пиналъёсты тодматэ «Кизили» журналэн.

— Ульфат Шайхутдинович, 20 арлэсь кема ни тӥ валтӥськоды покчиослы сӥзем «Кизили» журналэз. Озьыен, улон шоры нылпи синмын учкыны быгатӥськоды?

— Адямилэн дунне шоры нылпи синмын учкыны быгатонэз вань ке, сое со уз ышты ни. Нош ӧвӧл ке, нокытысь но, нокызьы но уз шедьты. Сыӵе дыръя нылпи журналын ужамез но уз юртты. Нош «Кизили» журналын ужась понна улонэз нылпи синъёсын адӟон — туж кулэ маке. Та вӧзы медло на нылпиослы эш кариськыны быгатон.  Ми журналмес пиналъёслы зэмос эш карыны тыршиськом. Капчи-а? Ӧвӧл. Тужгес секытэз — пичиос понна тунсыко ужъёс шедьтон но дасян. Туала вакытэ покчиослы удмурт кылын гожъясьёс ӧвӧл, шуыны луэ. Садике пумиськонъёсы потӥськом ке, валаськом: нылпиос азьын ог 10-15 минут  гинэ вераськыны кулэ. Но со вераськон яркыт, тунсыко мед луоз. Озьы ик журналлэн пуштросэз но.

Адӟемды вань, дыр, таӵе суредэз. Пиналлы «Кизили» журналлэсь выль номерзэ сёто. Нылпи соку ик сое усьтэ. Суредъёсты учкыса, ас понназ пальпотэ но серекъя, маке но вераське. Огдырлы со котырысьтыз нокинэ уг адӟы ни. Журналысь куд-ог суредъёсты буяны, шудонъёсты вандылыны ӧдъя. Изьыны выдыкуз, журналэз вӧзаз яке миндэр улаз понэ. Туннэ та пичи лыдӟисьмы понна «Кизили» журнал — яратоно  эш. Но сыӵе  суред тросгес семьяосын мед луоз вылэм.

кизилижурналын

Редакциын.

— Мукет удмурт газет-журналъёсын ӵошатыса, «Кизили» туж егит на. Но мынам тодэмея, удмурт нылпиослы журналъёс кылем даурлэн кутсконаз но вал?

—   Озьы. Удмурт пиналъёслы чаклам нырысетӥ журнал — «Муш» — 1920-тӥ арын потӥз, сое ачиз К. Герд кылдытӥз.  Но та журналлы одӥг ар но улыны ӧз кылды. Бӧрысь потӥз «Кузили», но солэн но сюресэз вакчи вал. «Покчи дэменчи» журнал но 2 ар гинэ потӥз. Собере 55 ар ӵоже удмурт пиналъёс понна анай кылын журнал ӧй вал ни. Таӵе ик югдур возиськиз мукет улосъёсын но. 1986-тӥ арын гинэ КПСС-лэн ЦК-езлэн нимысьтыз постановлениез автономной республикаосын нылпи журналъёс поттыны луонлык сётӥз. Озьы Удмурт шаерын «Кизили» вордскиз.

— Али туж трос луизы яркыт мультсериалъёс, пӧртэм интерактивной шудонъёс, гочатӥсь гаджетъёс.  Валамон, удмурт журналлы соосын вожвылъяськыны секыт…

— Котькытын эсэпез валаны кулэ. Чакламды вань, дыр, куд-ог анай-атайёс  нылпизылы сомында шудон басьто: доразы коть пичи магазин усьты. Пинал бӧрдэ, керӟегъяське — сое нош ик выль шудонэн буйгато. Пумен пинал со шудонъёс пӧлы вые-ыше. Кузьым лэсьтэмез но дунъяны вала меда?

Малпасько, шудонъёсты валаса басьтоно, нылпилэн соос укыр трос медаз луэ. Одно ик мед луозы тунсыко книгаосыз. Ӵошен пуксьыса, лыдӟиськоно, вераськоно. Анай-атайёс уг лыдӟисько ке, пиналлы лыдӟиськон сям пыӵатыны туж шуг. Мар ватонэз, али уноез газет-журнал уг басьто. Сыӵе семьяосын нылпиос уг валало, мар со журналлэсь яке газетлэсь выль номерзэ витён.

Журнал чеберлыко шормуӵ луыны кулэ. Сыӵе мылкыдын ик ужаськом. Лыдӟисьёсты бордамы кыскон понна пӧртэм амалъёс утчаськом. Котькуд номерын медло тунсыко веросэз но выжыкылэз, кылбуръёсыз, выль тодон-валан сётӥсь статьяез, кырӟанэз, шудонъёсыз, йыртӥянъёсыз, чебересь суредъёсыз. Радъяськом конкурсъёс, викторинаос. Вылбамыз чебереныз но пуштросэныз ас бордаз мед кыскоз. Котькуд пинал аслыз кельшымонзэ мед шедьтоз.

kenesh— Мынам тодэмея, «Кизили» журналлэн коллективез 20 ар пала ни уг вошъяськы. Ӟеч-а со, урод-а?

— Со умой. Коллективын ог-огзэс валась, нылпиосты гажась адямиос ужало ке, котькыӵе шуг-секытъёсты вормыны луэ. Школаосын но кусып возьыны каньылгес, милемыз тодо ни угось. Отысь ик ог-огедлы оскон но кылдэ.

30 арскын «Кизилилэн» редакторъёсыз кӧня ке пол воштӥськизы: Вениамин Ившин, Вячеслав Сергеев, Герман Ходырев но мон. Али ужасьёсмы сярысь верано ке, суредасьмы, Удмурт Элькунысь культура удысысь дано ужась Василий Мустаев — тужгес «пересез», редакциын кылдэм дырысеныз ужа. 25 ар пала тырше ни Удмурт Элькунысь дано журналист, кылбурчи Люза Бадретдинова. Алигес пенсие потӥз Удмурт  Элькунысь дано журналист, кылбурчи Алексей Ельцов.

Редакцилы ас понназ гинэ ужаны туж секыт йӧтысал. Милям юрттӥсьёсмы трос. Нырысь ик со дышетӥсьёс, суредасьёс-иллюстраторъёс.  Гуртъёсын но юрттӥсьёсмы уно. Соос подпискаез радъяны сюлмасько.

15 ар талэсь азьло ми быдэс коллективен (ньыль кузя) ёросъёсын «Кизили» журналлы сӥзем праздникъёс ортчытъяны кутским.

— Нош тазэ вордӥськем нуналдэс кызьы пусъёды?

— 12-тӥ октябре котырес ӝӧк сьӧры люкаломы «Кизилилэсь» эшъёссэ: берло конкурсъёсамы вормем нылпиосты, милемлы юрттӥсь дышетӥсьёсты, редколлегилэсь ёзчиоссэ. Соос кизилияськытэк лэсьто нуналмысь ужзэс, сюлмасько удмурт нылпиос сярысь.

«Кизили» журналлэн нимыз туж мусо но со дыре ик мур пуштросо. Но паймисько: кизилиос сярысь калыкмылэн визькылъёсыз туж ӧжыт вылэм. Книгаосысь кыксэ гинэ шедьтӥ: «Кизили кадь пиштыны эн тыршы, кузьыли кадь пишмытыны тыршы», «Кизили пичи ке но, тылыз бадӟым». Мынам та веранъёсты мукет сяменгес кареме потэ: «Кузьыли кадь тыршод, кизили кадь пиштод».

Мон оскисько, «Кизилилэн» луозы на шудо аръёсыз но трос лыдӟисьёсыз.

Елена Миннигараева

 

Удмурт Дунне
By Удмурт Дунне 10 октября, 2016 10:43 Updated