Хозяйствоос уногес йӧл басьто

Удмурт Дунне
By Удмурт Дунне 11 октября, 2016 11:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated
048333,Воткинский район,ферма,коровник,доярка,сельское хозяйство,животноводство

Хозяйствоос 8 толэзь ӵоже скал уллёез 766 йырлы будэтыны быгатӥзы — 106 сюрс 997 скал.

Толэзьысь толэзе шаерысьтымы хозяйствоос уногес йӧл басьто. Туэ 8 толэзь ӵоже 449,3 сюрс тонна йӧл кыскемын ни. Кылем арысь та вакытэн ӵошатоно ке, со 18 сюрс 800 тонналы тросгес. Макем капчиен сётӥське бадӟым лыдпус сьӧры уйиськон?

Гурт удысъя но сиён-юонъя министерствоысь пудо вордонъя управлениен кивалтӥсь Олег Овчинников верамъя, 12-тӥ куарусёнэ котькуд скаллэсь шорлыдын 14,4 килограмм йӧл басьтӥмы, миым сярысь, та 0,2 килограммлы уногес. Тужгес трос йӧл кыско Вавож ёросын — 18,7 килограмм, Грак ёросын 16,2 килограмм люкаське, Дэри районын — 16,1. Со дыре ик Якшур-Бӧдья палан 10,6 килограмм кыско, Красногорск ёросын — 11,2 килограмм, Сюмсиын — 11,7.

Шаерысьтымы хозяйствоос 8 толэзь ӵоже скал уллёез 766 йырлы будэтыны быгатӥзы — 106 сюрс 997 скал.  Зэм, ваньмыз тазьы ушъяськыны уг быгато. Якшур-Бӧдья ёросын 315 скалзэс вандӥзы, Дэриын — 147-зэ, Сьӧлтаын — 81-зэ, Сарапул ёросын — 56-сэ.

— Ёросысь вань хозяйствоос 30-лы-50-лы скалъёссэс будэто, — шуэ Дэри ёросысь гурт удысъя управлениен кивалтӥсь Валериан Никитин. — Умой улыны кутскимы шуыса, малпаськом вал. Но «Леон» хозяйство шуг-секытъёсын пумиське. Лейкозэн нюръяськиськомы шуыса, пудозэс вузало. Уждун тыронэн шуг-секытъёс кылдэмын. Коньдон поттон понна пудозэс вузало. Хозяйствоен кивалтӥсен трос вераськимы ни, скалъёссэ мед утёз шуыса. Уг ни вуза, шуэ. Котьма ке но берло дыре хозяйствоосын кивалтӥсьёслэн мылкыдзы ӝутӥськемын. 2020-тӥ арозь 1 миллион тонна йӧл кысконъя программаез быдэстон вылысь гид пуктӥсь но ӟеч выжыысь скал басьтӥсь хозяйствоослы бадӟым юрттэт вуэ уго. Субсидиостэк но пуктӥськон сярысь малпасько ни вал. Табере юрттэт вуыны кутскиз но, ваньзы сямен лэсьтӥськон борды кутскизы. Таос шоры учкыса, ёросамы фермер кариськисьёс йылӥзы. «Постольское» выль хозяйство кылдӥз, 2 скал гид ӝутэ ни. Зэм, юрттэт басьтон капчиен уг сётӥськы — бумагаосын выронэз туж трос. Куд-ог хозяйствоослэн фермаос улысь музъемзы но регистрировать каремын ӧвӧл. Собере, пуктӥськон материаллы, йӧл кыскон оборудованилы дунъёс туж тэтчало. Куддыр 100 сюрс манетлы дунъёс шуак воштӥсько. Соин ик хозяйствоос вень вылын кадь пуко.

Скалъёслэн лыдзы вылын зол шӧдӥське кунянъёслэн быремзы. Кылсярысь, секыт югдур Юкаменск ёросын — туэ татын ог 206 йыр быремын ни, Кизнерын — 83, Красногорскын — 62, Сюмсиын  — 52. Со дыре ик Камбарка ёросын одӥг вордскем кунянзэс но арам ӧз каре. Умой ужало Вотка но Эгра палъёсын.

— Туэ югдурмы трослы умойгес ни, мукет аръёсын ӵошатыса, — шуэ Юкаменск ёросысь гурт удысъя управлениен кивалтӥсь Константин Бельтюков. — Но специалистъёсмы уг тырмо. Ёросын 10 хозяйство ке, ӝыныяз сямен пудо эмъясьёс ӧвӧл. Уг тырмо зоотехникъёс но. Таин сэрен пудоез сюдонын гинэ но шуг-секытъёс кылдыло. Тыршиськомы семинаръёс ортчытъяны, шаерысьтымы тодосчиосты дорамы ӧтчаны. Оскисько, азьланяз лыдпусъёсмы чебергес луозы. Ог 3 сюрс гектар вылэ кизем трос аръем турынъёс шунды шорын ӝуазы ке но, кунянъёслы турын толлы тырмыт дасяны быгатӥмы. Фуражен гинэ шуг-секытъёс кылдозы. Кулэяськеммылэсь ог 30-40 процентлы гинэ тырмымон со. Комбикорм вылэ выжомы. Комбикорм басьямлы туэ бюджетысь юрттэт вуэ.

Министерствоысь Олег Овчинников верамъя, ёросъёс али гижысь-сюлмысь гидъёссэс толлы дасяло. Вань ёросъёс пӧлысь 7-ез быдэсак дась. Лябгес ужало Сьӧлта но Якшур-Бӧдья палан.

Елена Сараматова

Туспуктӥз А. Горбунов

 

Удмурт Дунне
By Удмурт Дунне 11 октября, 2016 11:51 Updated