Кема возьмам огыр-бугыр

Удмурт Дунне
By Удмурт Дунне 27 октября, 2016 12:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Полина Куликова (паллянысез): мыло-кыдо пыриськиськом Этнокультурной центрлэн ужаз

Полина Куликова (паллянысез): мыло-кыдо пыриськиськом Этнокультурной центрлэн ужаз

Тани вуиз кема возьмам нунал — Можга педколледжысь борддоре ошизы удмурт группае пыремъёсын список.

Синъёсыным со вылтӥ шаплы бызьыса, асме шедьтӥ. Рос-просгес дыше-тӥськод ке, ваньмыз вӧй вылтӥ кадь ортче вылэм. Документъёсме сётыкум, шуизы вал, баллъёсыд, пе, умоесь, одно ик пырод, но мон, оскисьтэм маке, озьы ке но кышкай. Чынзэ верано ке, мылкыды валантэм вал: шумпотоно яке кайгыроно. Мукет интыосы заявление ӧй сётъялля. Уго тодӥсько вал: Можга педколледж — со элитной инты. Лыдъяно ке, 5 ӵыжы-выжыосы татын дышетскемын.

Нырысетӥ арняяз, валамон, группаысьтымы ваньмыз ӝужйымтэ нянь кадесь вал — ваньмы удмуртъёс. Нуллӥзы милемыз колледжлэн музеяз. Мон тодӥсько вал, Можга педколледж удмурт югдытӥсьёслэн, тодмо адямиослэн, тодосчиослэн кебитсы шуыса, но куке мон адӟи, кӧняез колледж пыр потэмын, йыры поромыны кутскиз: кылбурчи Я. Ильин вал директорез, дышетскизы пичи дырысьтым яратоно кылбурчие Г. Ходырев, со сяна, В. Владыкин, В. Ванюшев, Н. Байтеряков, Ю. Байсарова, Т. Архипов…

Дышетскон кутскиз — кутскиз завал. Мыным апае вераз вал, та огшоры ссуз ӧвӧл шуыса. Но таӵеезлы мон дась ӧй вал. Со сыӵе классно! Сомында кружокъёс, занятиос — сояз но мынэм потэ, таяз но сюлэм кыстӥське, урокъёс но дотово трос, гуртысь уж но лэсьтоно, сиён но пӧзьтоно. Мон кема возьмай таӵе «огыр-бугырез». Мӧзмыны маза ӧвӧл.

Группаямы аспӧртэм-лыко омыр. Ваньмы ик удмуртъёс. Дышетӥсьёс но шумпото, «ашкаос» («а» группа), пе, котьку но мыло-кыдоесь, тыршисесь, юн эшъяськисесь. Куке но колледже вуылӥды ке, кылӥды ке быдэс коридор тыр удмурт ӟабыльтэмез, тодэ: со «ашкаос». Ваньмы удмурт кылын вераськиськом ке но, котькудӥзлэн аслаз диалектэз. Со «иностранец в родной стране» порма луэ.

Колледжын ӧвӧл сыӵе: тон бадӟым курсъёсын дышетскиськод ке, озьыен, быгатӥськод зӥбыны первакъёсты. Татын мукет сямен: соос шумпотыса асьсэос дэмлало тыныд юрттэт.

Та арысен колледжын ужаны кутскиз Этнокультурной центр. Ну таиз воксё мынам, мылысь-кыдысь солэн ужаз пыриськисько ни. Кема уг ужа на ке но, малпанъёсмы бадӟымесь. Вуимы ини этнографияя диктант ортчытыны, али дасяськиськомы калыккуспо «Кылбугор» лагерьлы. Центре ветлыса, «Кин со — удмурт?» юанлы ӝот-ӝот валэктон сётыны ӝоген быгато.

Туж кышкасько вал, кыӵе адямиен огъяулонние сюро шуыса. Малпай, кызьы луоз, озьы луоз, озьы кулэ, иське. Сюриськиз ук! Ачим порма ик нылашен одӥг висъетын улыны кемдӥз — Агрыз ёросысь Варклед-Бӧдьялась Даша Сергееваен. Бигер кылэз но тодэ, но малы ке уг вераськы.

Табере мон студент, озьыен, вань студентъёс кадь, быгатӥсько ини ӝожтӥськыны сютэм улон, ӧжыт изён, секыт сессия вылэ. Ма вералом на: дышетскыны секыт ке но, «тяжело в учении, легко в бою». Кин тодэ, оло, мынэсьтым но адями пӧрмытозы?

Полина Куликова

Туспуктиз Полина Куликова

Удмурт Дунне
By Удмурт Дунне 27 октября, 2016 12:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<