Кӧнялы узырмиз удмурт радио?

Удмурт Дунне
By Удмурт Дунне Октябрь 28, 2016 13:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем кӧснуналэ Ижысь «Аксион» культура дворецын ортчиз 5-тӥез «Элькуновидение». Азьвыл отчы пырисько ке вал шаерысьтымы кырӟасьёс, туэ куриськизы Татарстан но Башкортостан, озьы оглом люкаськиз 20 участник — кин ке огназ кырӟаз, кин ке коллективен.

Сцена вылын «Элькуновидение» конкурсэ пыриськисьёс.

 

 Адӟи, но ӧй кылы

Конкурслэн ӟырдыт луонэз тодмо ни вал азьло ик — 400-700 манет сылӥсь билетъёсты син куспын басьтӥзы. Дворецын ӵаш вазиз ни ӵукнаысен ик — артистъёс но соослэн висисьёссы, оло, уйзэс изиллямтэ, Иже туж вазь вуизы, сюлмаськизы эшшо одӥг ке но репетиция ортчытыны.

Шутэтскон нунал шоры учкытэк, удмурт артистъёслэсь быгатонлыксэс учкыны но дунъяны арлы быдэ ветло культурая министр Владимир Соловьёв но Печатья но ивор вӧлмытонъя агентстволэн кивалтӥсез Алексей Воронцов. Соослэн но 2015-тӥ арын вормисьёслэн, пурга пиослэн Андрей Корниловлэн но Иван Котельниковлэн, бакель каременызы кутскиз вожвылъяськон.

Кырӟанъёс вошто ог-огзэс, кин ке кырӟам бере залын чабемъёс, кесяськемъёс золгес чузъясько, мукетъёссэ артистъёсты шыпытгес келяло. Но шӧдӥське, калыклы золгес кельше улэп крезьгур. Конкурслэн куронъёсызъя кырӟан одно выль луыны кулэ, соин, вылды, экран пыр тодмато авторъёсын. Мар бен, ваньмыз шонер кадь, нимтулъёс ялӥсько, кырӟанъёс чузъясько, но малы мыным потэ, тодмо крезьгуръёсты кылӥсько шуыса? Мыным гинэ уг вылэм. Профессионалъёслэн жюриязы пукись музыковед Марина Ходырева шуэ, таӵеез ӧй вал на — тросэз крезьгуръёс асэстэмын! Ма, табере такмак гурез гинэ но асьсэлэн каро ни.

Кылбуръёсты туэ ӧй эскеры, синмыным ӧй адӟы, нош кылзыса 20 кырӟан пӧлысь валай куинезлэсь-ньылезлэсь гинэ кылъёссэ — оло огвыллем луэмысьтызы, оло артистъёслэн текстлы саклык висъямтэысьтызы. Огкылын вераса, блокнотам плюсэн пусйисько Киясаез, Эграез, Глазовез, Шарканэз…

Троссэ номеръёсты быдтэ урод фонограмма — мар кырӟало, валаны уг луы.

Ас поннам нырысьсэ усьтӥ Глазкарысь Ольга Перминоваез. Кельшиз ваньмыз, аслыз тупасьтэм костюмез сяна: ассэ сцена вылын воземез, зол куараез, «бӧрдӥсьтэм» кылбурез, фотосуредъёс… Сцена вылысь кошкеме уг ни пот вал, сокем яраз, шуиз Ольга кырӟамез бере. Ӧйтӧд бен, кызьы дунъялоз жюри.

ehlkunov

 «Тушмонэз» вормиз чеберлык

Мар эшшо син шоры йӧтӥз? Калык акыльтэм огвыллем образъёслэсь. Нырысь ик со адӟиськиз Ижысь Первомай ёросысь куинь сузэръёс Воронцоваос сцена вылэ потэм бере. Вакчи дэремъёсын веськрес нылъёс кырӟамзылэсь зол гочатӥзы чеберенызы. Ух, «Удмурт ВИАГРА», чилектэ соку ик йырын. Нош Можга ёросысь Мария Гроздова сцена вылэ потэм бере валаськиз ни — та вормоз! Тӧдьы юсь кадь чебер но кужмо куараё, американ манеръя гожтэм удмурт текст киное кадь вуттӥз. Зэм чебер. Вот кылъёссэ ке валаны луысал на… Маша удмурт кылэз уг тоды, оло, соин кырӟанлэсь пуштроссэ валаны ӧйлась.

Нялтас вераса, та рад ӧжыт ӧй вал кылэз валасьтэмъёс кызьы ке кырӟан гожтӥсьёс, озьы ик быдэстӥсьёс пӧлын. Ӟучъёс, лэся, интонацизэ мыдлань пукто, соку ик шӧдэ учкись. Но та ласянь мон дурбасьтысал: урод шат, удмурт кырӟан бордаз кыске ке мукетъёссэ но? Оло, ӵап та конкурсысен кутскоз соослэн удмуртомонзы. Мукет ласянь, со вордэ эшшо одӥг бадӟым ужпумез — будэтоно удмурт крезьгурчиосты. Оло, ӵап та конкурс юрттоз ёросъёсын усточиосты дасянъя школаос усьтыны?

 «Аксионысь» — «Италмасэ»

Концертэ лыктэмъёслы ӟеч кузьым лэсьтӥз «Италмас» ансамбль — кыкетӥ отделениын со вакчияк концерт сётӥз. Но «Италмаслэсь» тужгес бадӟым кузьым — та конкурсысь огзэ усто кырӟанэз ансамбль басьтоз аслаз репертуараз! Сое концерт ӵоже туж сак бырйизы Удмурт кун филармонилэн директорез Юрий Фомин но «Италмаслэн» чеберлыкъя кивалтӥсез Семён Байкузин. Кыӵе кырӟан со луоз, ялозы 4-тӥ ноябре, но дано ансамблен кивалтӥсьёс шыпыртӥзы: оло, кыксэ кырӟанэз басьтозы ай. Мон малпамъя, со коньдон премилэсь но бадӟым кузьым.

 Юскиськон но оскон

Нырысь малпамъя, финалэ бырйыны чакламын вал 10 участник, но бӧрысь режиссёр П. Поздеев эшшо 5-сэ жаляз — озьы мукетъёсын ӵош меӵак эфирын асьсэды возьматыны но вормон понна нюръяськыны эшшо одӥг луонлык басьтӥзы на Глазов, Дэри, Дэбес, Балезино ёросъёс но Башкортостан. Оло нош, режиссёр соглаш ӧвӧл ёросъёсысь дунъясьёсын? (Ми но.) Яке малпа, кудзы ке таос пӧлысь шуак вылӥе тэтчыса вормозы? Кин тодэ, оломар но луылэ. Угось 2016-тӥ ар понна вормись быръемын луоз, вань куараосты чотаса: концерт бере пуктэмъёсыз борды ватсаськозы смс пыр вуэмъёсыз но профессионал жюрилэн баллъёсыз. Сыӵе учыръёс луыло: кылсярысь, миым концерт дыръя вормизы вал бӧдьяос, но пургаос ас артистъёссы понна смс-ёссэс ӧз жалялэ но Андрей Корниловез но Иван Котельниковез вормисе поттӥзы. Пиос клубзылы «Удмурт Кенеш» огазеяськонлэсь 40 сюрс манет утӥзы. Но кызьы шуо асьсэос, коньдонлэсь дуно луиз мукетыз — «Элькуновидение» бере соослы удмурт эстрадае ӧс куалак усьтӥськиз, али концертъёслэсь уг ик ваньмыло, табере соосты котькытчы ӧтё.

Нош туннэ нуналлы ворме Можгалась Мария Гроздова — данакез ёросъёс солы синмаськемзэс возьматӥзы вылӥ баллэн. Нош кин, кыӵе ёрос вормоз оглом ӵошатсконын — тӥ бордысь потоз, учкелэ 4-тӥ шуркынмонэ 17 час 30 минутэ «Мынам Удмуртие» каналэз, кылзэ радиоез, эн жалялэ смс-тэс. Меӵак эфир дыръя ик тодмо луозы устоез кылбурчи но крезьгурчи.

 Жингырты, выль кырӟан!

«Мынам Удмуртие» телерадиокомпанилэн тунсыко проектъёсыз трос, но таиз одӥгез устоез, шуыны луоз, малы ке шуоно со огазея калыкез. Татын артист ассэ гинэ уг возьматы — со возьматэ ёроссэ. Одӥг номерез дасянэ пыриське команда: кылъёс гожтӥсь, крезьгур малпась, кырӟась, эктӥсь, режиссёр, фонограмма дасясь, ма, транспорт утчась но, сюдӥсь но, висись но! «Мынам Удмуртие» телерадиокомпаниысь валтӥсь редакторлэн воштӥсез Сергей Касаткин верамъя, 5 ар ӵоже вордӥськиз 100-лэсь трос выль удмурт кырӟан. Тросэз соос ялан чузъясько эфирын. Нош радио пыр тӥляд но кырӟанды мед чузъяськоз шуыса, кайта конкурслы дасяськыны кутсконо ни вал… толон!

Конкурслэн 2-тӥ этапезлэн йылпумъянъёсыз

Можга ёрос — 118 балл

Ижкарысь Первомай ёрос — 90 балл

Глазов кар — 80 балл

Шаркан ёрос — 80 балл

Кияса ёрос — 70 балл

Алнаш ёрос — 56 балл

Пичи Пурга ёрос — 54 балл

Сьӧлта ёрос — 52 балл

Эгра ёрос — 40 балл

Эгра каргурт — 32 балл

Башкортостан — 28 балл

Глазов ёрос — 26 балл

Дэри ёрос — 26 балл

Дэбес ёрос — 26 балл

Балезино ёрос — 24 балл

Ижкарысь Октябрь ёрос — 12 балл

Татарстан — 10 балл

Сарапул — 8 балл

Грак ёрос — 6 балл

Сюмси ёрос — 2 балл

Зинаида Рябинина

Туспуктӥз Стас Иванов

 

 

 

 

 

 

Удмурт Дунне
By Удмурт Дунне Октябрь 28, 2016 13:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<