Ёросъёсысь иворъёс: Юкаменскысь скал кыскисьёс дышетскизы, Дэбесысь кибашлыос но Уваысь школа — устоосыз пӧлын

Удмурт Дунне
By Удмурт Дунне Октябрь 17, 2016 13:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Юкаменск

 Дышетскем понна коньдон

Ёросысь 7 скал кыскись Глазове дышетскыны ветлӥз.

Пудо вордон удысын ужась егитъёс понна ёросын арлы быдэ дышетсконъёс радъялляло. Таяз учыре егитъёслы луонлык сётӥзы, сьӧрло потаса, мукетъёслэн уженызы тодматскыны. Дышетсконэ ветлӥзы Эвелина Абашева («Звезда» эштос), Мария Есенеева но Радиля Балтачева («Нива»), Лиана Горбушина но Ильзира Абашева («Куркан»), Лариса Данилова («Родина») но Любовь Горбушина («Маяк»). Тодон-валанзэс будэтэмзы понна нылъёслы удостоверениос сётӥзы. Ар ӵоже та документъя егитъёс 50 сюрс манет тыр субсидия басьтыны быгатозы.

Глазов

Вашкалазэ улӟыто

Глазовысь медтехникумын дышетскись нылъёс но пиос «Вашкалазэ улӟытон» эскерон уж лэсьто.

Кивалтэ соосын Глазовысь Эшъяськон юртысь методист Антонида Бердова. Алигес студентъёс Куреггурт муниципал кылдытэтэ пырись староверъёслэн Самки гуртазы вуылӥзы но отысь калыкен тодматскизы. Культура юртэ, чипыен-куреген шуэм  сямен, вань гурт калык потӥз. Ӝыт тунсыко ортчиз: староверъёслэн   улэм-вылэменызы, сям-йылолъёсынызы но дӥськутъёсынызы тодматскем сяна, студентъёс соос сярысь видеороликъёс но туспуктэмъёс лэсьтӥзы.

Дэбес

 Узыр ар

Челябинскын ортчиз кибашлыослэн «Уралысь мастеровой» 5-тӥ конкурссы.

Быдэс Россиысь лыктэм 72 мурт пӧлын вожвылъяськонэ пыриськизы Дэбесысь кибашлыослэн юртысьтызы куиськись Наталья Поздеева, пу вылын суредась Екатерина Серебренникова но горд сюен ужась Ольга Селивёрстова. Удмурт кибашлыос отысь вормонъёсын бертӥзы. Дэбесысь кибашлыослэн юртэнызы  кивалтӥсь Екатерина Бушмакина ивортэмъя, таиз ар соос понна туж узыр. Ёросысь кибашлыос, Финляндие, Кирове, Чебоксарые потаса, вормонъёс басьтӥзы, та арняысен соослэн ужъёсынызы адӟытон усьтӥськиз Нижний Новгородын. Отчы нуэмын куролэсь пунэм, бадьпу ньӧрлэсь лэсьтэм но куэм арбериос. Адӟытон ужалоз 2 толэзь ӵоже.

Дэри

Удмурт сэрегзы  луоз

Дэри ёросысь Пероггуртысь «Кильтырнаос» ансамбльын кырӟасьёс, кивалтӥсьсы  Зоя Ушакова кема бызьылӥзы, люкаськылон сэрег курыса.

Соослы пумиськон ӝытъёс, репетициос ортчытъяны нокытын вал. Нылкышноослэсь кулэяськонзэс лыдэ басьтӥзы, Пероггуртысь муниципал кылдытэтлэн юртаз инты висъязы. «Табере милям асьмелэн удмурт сэрегмы луоз», — пичи муртъёс кадь шумпото «кильтырнаос».

Кияса

Ватосэн синпелет

7-тӥ октябре Кияса черкогуртын усьтӥськиз Быдӟым ож вакытэ фронт мышкын ужамъёслы синпелет.

Сӥё-дано ужрадэ люкаськизы ёросысь вань ветеран огазеяськонъёслэн азьветлӥсьёссы, Кияса черкогуртын улӥсьёс, школаын дышетскись нылпиос.  Памятник пуктон пумысен ёрос кивалтӥсьёслы вазиськонэн потӥз вал ветеран огазеяськонлэн правлениез. Киясаослэсь куронзэс быдэстыны басьтӥськиз «КомосГрупп» агрохолдинг. Ӟеч уж улсын та огазеяськон Быдӟым ожлы сӥзем 12 синпелетэз тупатъяны юрттӥз ни.

Кияз культоен нылкышноез но быдэ вуымтэ пияшез возьматӥсь синпелет улэ та нуналэ ватӥзы вуоно поколениослы вазиськонэн капсула. Сое усьтозы Быдӟым Вормонлы 100 ар тырмон нуналэ.

Грак

 Писпу мерттӥзы

 Ёрос администрациын ужасьёс 7-тӥ октябре субботник ортчытӥзы.

Ужасьёсын ӵош писпу мерттонэ пыриськиз выль быръем ёрос йыр Виктор Белов. Та нуналэ администрацилэн юртэзлы ваче пумит корт кенер сьӧры 500 лыз кызъёс, черке нуись сюрес кузя 70 сусыпу мерттэмын. Гуртоос оско, аръёс ортчыса, соос черкогуртэз шулдыртозы.

Ува

Гурт нылпиос шумпотто

Уваысь 2  номеро шор ёзо школа пыриз Россиысь усто 200 гурт школаос пӧлы.

Ӵошатсконын эскеризы нылпиослэсь тодон-валанзэс — ЕГЭ но ОГЭ сётэмзэс, пӧртэм ӵошатсконъёсы но олимпиадаосы пыриськылэмъёссэс.

— Милям нылпиосмы республикаын но солэн палэназ ортчылӥсь ӵошатсконъёсы но олимпиадаосы пыриськыло, отысь вормисьёс луыса бертыло, — данъяськыса вера Уваысь 2-тӥ школаен кивалтӥсь Наталья Нелюбина. — Школаямы 3-тӥ классысен мур дышетыны кутскиськом ӟуч кылэз, нош 2-тӥ классысен — математикаез. Ужам ужмылэн емышез адӟиське: кылем арын Удмурт кун университетын ӟуч кылъя но литературая «Лишь слову жизнь дана» научно-практической конференциын нылпиосмы нырысетӥ но кыкетӥ  инты басьтӥзы. Милям 3 кадет классъёсмы, одӥг кылысь ужаськомы МВД-ен но МЧС-эн. ГТО-лэсь куронъёссэ быдэстонъя шаерамы 3-тӥ интые потӥмы но  коньдон кузьым басьтӥмы. Со коньдонэн спорт удысэз ик азинтомы.

200 усто гурт школаос пӧлы Удмуртиысь сюризы на Шарканысь, Сарапул ёросысь Сигаевоысь школаос но Пичи Пургалась гимназия.

Удмурт Дунне
By Удмурт Дунне Октябрь 17, 2016 13:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<