Ёросъёсысь иворъёс: Эгра каргуртын усьтӥськиз кинозал, Алнаш палан буре вайизы Иосиф Ивановез, Кизнерысь музей потаз гуртэ

Удмурт Дунне
By Удмурт Дунне Октябрь 26, 2016 14:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ува

 Чылкытатӥськизы

Удугучин гуртын утялтӥськон толэзь ортчиз.

Вордскем гуртсы чылкытгес мед луоз шуыса, тулыс но сӥзьыл ӵужон мыло-кыдо куто школаын, нылпи садын, культура юртын, гурт администрациын, аптекаын тыршисьёс. Ужан юрт котыръёсыз утялтэм сяна, Быдӟым оже быремъёслы синпелет но автобус дугдылон дорысь усем куаръёсты ӵужизы-утялтӥзы. Муниципал кылдытэтысь специалист Наталья Огальцева ивортэмъя, толэзь куспын 20 кубометр жуг-жаг люкамын. «Свобода» хозяйство но та ужрадлэсь палэнэ уг кыльы, со техника висъя. Нимаз юртъёсын улӥсьёс но асьсэ корка котыръёссэс чылкытатӥзы.

Эгра

 Кино учкозы

Эгра каргуртын туннэ усьтӥськиз кинозал.

Та вакытэ Эгра ёросын ог 38 сюрс адями улэ. Ёросын 70 пала культура юртъёс. Тужгес бадӟымъёсыз интыяськемын Эгра каргуртын, отын вань Эшъяськон юрт, «Нефтяник» культура юрт, музейёс но калык киужъёсъя центр. Нош дэмен кино учкон интызы ӧй вал. Кызьы ивортӥз Эграысь Эшъяськон юртлэн кивалтӥсез Елена Петухова, кинозал пуктэмын Россиысь утэм грант — 5 миллион манет — чотын. Кинозал 250 интылы чакламын, со туала куронъёслы тупа. 21-тӥ октябре залэз усьтон дыръя люкаськем калыклы нырысьсэ кино возьматозы.

Кез

 Шулдыргес луиз

Ёросысь культура юртъёсын гужем ӵоже выльдон-тупатъян ужъёс ортчытэм бере кырӟан-веран сезон усьтӥське.

Клубъёсты тупатъянлы 1 миллион манет пала висъямын ке, 769 сюрс манетэз уже кутэмын ни. Со коньдонэн Степанёнки клублэсь липетсэ воштӥзы, Зӧк Олыпын котёлзэ но шуныт сётӥсь гумыоссэ тупатъязы, ёрос музейын выль фондохранилище кылдӥз, «Леспромхоз» культура юртын выль сцена пуктӥзы, косякъёссэ воштӥзы, Пужмезьысь клублэсь гурзэ выльдӥзы, Сыгаын шунтӥськон гумыоссэ тупатъязы. Матысь дыре корка пырон ортчытыны чакламын Кабалудын но Югуртын. Выльдэм-тупатъям культура юртъёсы калык мыло-кыдо лыктэ, концертъёс шулдыргес ортчо.

Иж

 Паралимпиецъёслы юрттоно

Рио-де-Жанейро городын ортчем Паралимпиадае Удмуртиысь 3 мурт мыныны кулэ вал, нош соослы бадӟым вожвылъяськонэ пыриськыны ӧз кылды.

Озьы ке но мугорез кыдатон культурая, спортъя но егитъёсын ужан политикая министр Игорь Краснов пумиськылӥз великен ворттылӥсьёсын — Кизнерысь Сергей Пудовен, Ижысь Арслан Гильмутдиновен. Ортчем арлы йылпумъянъёс лэсьтӥзы но матысь 4 арлы выль ужпумъёс пуктӥзы. Пумиськон дыръя сюлмаськонъёссэс но шараязы. Арсланлы ӝегатскытэк операция лэсьтоно, нимысьтыз ӟеч протез пуктоно. Спортсменлэсь сюлмаськонзэ шаерысьтымы кивалтӥсьёс кылӥзы но юрттом шуизы.

Кияса

Пичиысен тодозы

Алигес Вуж Тӥгырмен гуртысь нылпи садын «Огъя семьяын» нылпи фестиваль ортчиз.

Отчы пыриськизы удмуртъёс, бигеръёс, ӟучъёс но армянъёс. Нылпиос учкисьёсты асьсэ гуртъёсысьтызы дано адямиосынызы, кырӟан-веранъёсынызы но сям-йылолъёсынызы тодматӥзы.

— Ужрад пайдалыко но тунсыко ортчиз, — шуо нылпи садын ужасьёс. — Пиналъёс пичиысен тодматско пӧртэм выжы калыкъёслэн сям-йылолъёсынызы,  культураенызы. Данэ потэм адямиос сярысь вераны быгато, соос кадь луыны тыршо.

Алнаш

 И. Ивановез буре ваён

Улын Котныр школаын буре вайизы ас пал адямизэс Иосиф Ивановез.

Ар талэсь азьло улонысь кошкиз Удмуртиысь культура удысысь дано ужась, Алнаш ёрослэн дано адямиез, тодмо журналист но нылпи кылбурчи Иосиф Зотович Иванов. Сое буре вайыса, 20-тӥ октябре Улын Котныр школа борды пул шуккизы. Ӵыжы-выжыосыз, ёросысь дано адямиос сяна, ужрадэ вуылӥзы И. Ивановлэн матысь эшъёсыз: Ижысь писательёс но Россиысь Кунгожсьӧр ужпумъёсъя министерствоын ужам, Алнаш ёросысь Варали гуртын вордскем Борис Семёнов.

Кизнер

Безменшур — музейын

Ёросысь шаертодонъя музейын ужасьёс та нуналъёсы Безменшур гуртэ потазы.

Отын соос гурт калыкен но пересьёсын пумиськылӥзы, гуртлэн историез сярысь юалляськизы, туспуктэмъёсты но вашкала арбериосты утчазы-шедьтӥзы.

Безменшур кылдэм 1774-тӥ арын. Гуртоос кирпич поттылӥллям, бунлэсь пӧртэм арбериос лэсьтылӥллям. Безменшурлы но та муниципал кылдытэтэ пырись гуртъёслы сӥзьыса, шуркынмон толэзе Кизнерысь шаертодонъя музейын адӟытон усьтӥськоз.

Дасязы Валентина Емельянова, Любовь Тихонова

 

 

 

Удмурт Дунне
By Удмурт Дунне Октябрь 26, 2016 14:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<