Ивор сузьет: Глазовын — арлыдо спортсменъёс, Воткаын — усто семьяос, Кизнерын — Горд атасъёс

Удмурт Дунне
By Удмурт Дунне 10 октября, 2016 12:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Глазов

 Зарни арлыд

Ёросысь арлыдоос понна 6-тӥ арзэ спартакиада радъяське.

Ужрадэ пыриськизы ёросысь вань муниципал кылдытэтъёсысь арлыдоослэн командаоссы. Ар ӵоже спортысь 8 амалъя 23 комплект медальёс шудытӥсько. Кызьы ивортӥз Глазов ёрос администрациысь мугор кыдатон культурая но спортъя ёзэн кивалтӥсь Александр Столбов, сентябрь толэзе капчи атлетикая вожвылъяськонэ 126 мурт пыриськиз, пӧлысьтызы 36-ез — инвалидъёс (соос котькуд командаын луыны кулэ). Нылкышноос та нуналэ 500 метре, воргоронъёс 1 иськеме бызьылӥзы. Со сяна, кузьдалае тэтчазы, суй кужымзэс эскеризы, гира ӝутказы, арлыдоослэн огазеяськонъёсынызы кивалтӥсьёс дартсэн шудӥзы. Бадӟым спартакиадалы йылпумъян декабрь толэзе лэсьтозы. Соку ик тодмо луоз кужмоез команда, берло ӵошатсконын тросгес вормонъёс басьтӥзы Понино но Коротай гуртъёсысь арлыдоос.   

Дэбес

Ӝыны арлы огпол

Донорлэн нуналэз дыръя 128 мурт вирзэ сётӥз.

Кылем арня пумын ёрос больницае тачак калык люкаськылӥз. Ӝыны арлы одӥг пол та ёросэ вуыло шаерысьтымы вир басьтон станциысь специалистъёс. Вир сётыны мылкыд карисьёс уно гинэ люкаськизы. Анестезиолог-реаниматолог Андрей Хохряков ивортэмъя, пӧлысьтызы тросэз вирзэс арлы быдэ сёто, 12-ез Россиысь дано доноръёс луо, нош нырысьсэ лыктэмъёс кызё мында гинэ вал. Вуоноез таӵе нунал Дэбес ёросын, ӝыны ар ортчыса, луоз.

Вотка

Устоез семья

Кукуй клубын ёросысь устозэ семьяез бырйизы.

Семьяослэн вожвылъяськоназы пыриськизы 2 но солэсь тросгес пинал будэтӥсьёс. Перевозной муниципал кылдытэтысь Мартюшевъёслэн семьязы кырӟаны-вераны яратэ, Бадӟым Кивар муниципал кылдытэтысь Беляевъёслэн семьязы спортъя ӵошатсконъёсы тросгес пыриське. Озьы вань муниципал кылдытэтъёсысь йӧно семьяос ёрос вожвылъяськонэ пыриськизы. Вормисез шараяны секыт вал. Вотка ёросысь устоеныз семьяен лыдъямын Июльское муниципал кылдытэтысь Шадринъёс. Вань ужрадъёсы мыло-кыдо пыриськем сяна, соос спортэн эшъясько, шаертодонэн тунсыкъясько, сцена вылын но асьсэды эркын шӧдо.

Иж

Фин-угор пумиськон

13-тӥ коньывуонэ 17 часын Тодосчиослэн юртазы фин-угор культуралы сӥзем ужрад ортчоз.

Пумиськонэ пыриськозы поръёс, эрзяос но Татарстан Республикаысь Менделеевск ёросын улӥсь удмуртъёс. Ужрад дыръя докладъёс лыдӟозы тодосчи Альберт Разин, «Ижевск мари» огазеяськонлэн кивалтӥсез Николай Ямаков. Люкаськемъёслы капчи мылкыд кузьмалозы Менделеевск ёросысь «Энтэл» ансамбле ветлӥсьёс. Пумиськон йылпумъяськоз шулдыръяськонэн но чай юонэн.

Кияса

Сезон усьтэмын

Уддяди клубын ужасьёс выль сезонзэс усьтӥзы.

Ёросысь 8 поселениысь гурт клубъёсын сезонэз мытон ужрадъёс ортчо. Кытын ке концерт возьмато, нош Уддядиысь клубын спектакль пуктӥзы. Татчы куное вуылӥзы Вуж Салья гуртысь арлыдоос, соос «Бызьыны вуэм песянайёс» спектакль возьматӥзы.  Артистъёсты юн кичабонъёсын пумитазы. Спектакль бере шулдыр концерт возьматӥз «Инвожо» калык ансамбль. Шӧдске, таӵе шуныт концертъёслэсь калык мӧзмем ини.

Алнаш

Эшъяськон сюрес

Байтэрек школае дышетскыны ветло артысь Татарстанысь но нылпиос.

Та дырозь бигер гуртысь нылпиос школае пыдын ветлӥзы ке, табере соосты но автобусэн нулло. Байтэрек — Тузёгурт сюресэз тупатъязы но сӥё-дано усьтӥзы. Алнаш ёросысь кивалтӥсьёс сяна, Татарстанысь Менделеевск ёросысь кивалтӥсьёс но отчы вуылӥзы. Байтэрек школалэн директорез Сергей Шушпанов верамъя, та вакытэ Тузёгуртысь 7 пинал доразы дышетске. Вольыт сюрес кылдэмен, гуртоослэн кусыпъёссы эшшо но юнмалозы.

Кизнер

Кин тыре тыл?

Кылем арня пумын Айдуан-Чабья гуртысь 4 квартираем юрт ӝуаз, 4 адями быриз.

Ёрос администрациын та пумысен бадӟым кенешон ортчиз. Малпаськыны мугез вань. Туэ 9 толэзь куспын ёросын 23 пол тылпу гомаз, 7 мурт бырыны шедиз, соос пӧлысь одӥгез — пинал. Горд атас ӵемгес кузёяськиз Кизнер, Ягул но Удмурт Бемыж муниципал кылдытэтъёсын. 10 учырын тыл юри понэмын вал. Та дыре быдэс ёросэн утчало юртъёсы тыл поныса ветлӥсь адямиез. Нош 6-яз тыл потэмын кысымтэ тамак пум бордысь. Юонэн эшъяськон но шимес учыре вуттэ. Айдуан-Чабьяын учыр ӵапак сое возьматэ.

Муниципал кылдытэтъёслэн кивалтӥсьёссылы ӵектон сётэмын: калык пӧлын валэктон уж ортчытоно, уй дежурствоос радъяно, ву басьтон интыосты сузяса-утялтыса возёно.

Сюмси

Лыдӟо Ашальчи Окиез

«Удмурт Кенеш» огазеяськонлэн ёросысь ёзэз пӧртэм ужрадъёс ортчытъя.

Кемалась ик ӧвӧл Ашальчи Окилэсь кылбуръёссэ лыдӟонъя конкурс радъязы. Азьвыл аръёсы таӵе ужрадэ пиналъёс гинэ пыриськылӥзы ке, таяз учыре кылбур лыдӟыны быгатэменыз паймытӥз ужась калык. Кыллы усто адямиос эшъёссы азьын удмурт но ӟуч кылъёсын кылбуръёс лыдӟизы. 11-тӥ октябре ёросын удмурт культураез азинтонъя, йылол-сямъёсыз утёнъя бадӟым кенеш ортчоз.

 

Удмурт Дунне
By Удмурт Дунне 10 октября, 2016 12:14 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<